▪▪▪February 2009
တစ်လမှတစ်လနှင့်၊ တဖြည်းဖြည်း
နောက်ဆုံးစာမေးပွဲရက်များသို့ နီးကပ်လာသည်။
နိုင်မဝမှာ ဖွားလေးကိုသတိမရတော့သလို့ ၊
နမ်းမဝကလည်း ဖွားလေးကိုမတမ်းတနိုင်ပေ။
ကိုယ်လုပ်စရာရှိတာကိုသာ
ကြိုးစားလုပ်ကိုင်ကြလေသည်။
နိုင်မဝကတော့ ကျက်စာတွက်စာမှန်သမျှကို
ပိုင်နိုင်နေပေမယ့် ၊ နမ်းမဝက ဘာမှမပိုင်။
ဘာမှမပိုင်အောင်လည်း
နမ်းမဝကြိုတင်ကြံစည်ထားတာဖြစ်သည်။
ကိုးတန်းအောင်၍ဆယ်တန်းတက်ဖို့ဆန္ဒကို
နမ်းမဝ သတ်ပစ်လိုက်တာ လချီနေပြီ ။
"အငယ် ၊ နင်စာကျက်တာ ကိုကိုမတွေ့ပါလား ။ ''
"ကျောင်းမှာကျက်တယ်လေဟာ ...''
မျက်နှာကိုစိုက်ကြည့်နေတဲ့
နိုင်နိုင့်အကြည့်ကိုရှောင်ရှားဖို့ ဦးခေါင်းကိုငုံ့ကာ
စံပယ်ဖူးကိုသီနေလိုက်သည်။
နမ်းမဝအတွက် သည်အချိန်တွေဟာ ၊
စာကျက်ဖို့မဟုတ်တော့ ။
ပိုက်ဆံစုဖို့ဖြစ်သည်။
ရှာ၍ရသမျှပိုက်ဆံလေးတွေကို
ကျစ်နေအောင်စုထားရမည့်အချိန်ဖြစ်သည်။
"နင်တို့စာသင်ခန်းကို ကိုကို လာကြည့်တိုင်း
အငယ်အိပ်နေတာပဲလေ။ ညဘယ်အချိန်ကျမှ
အဖေပြန်လာတာလဲ ။ ''
စံပယ်ဖူးသီနေသော နမ်းမဝလက်တွေရပ်သွားသည်။
ဦးမင်းနိုင်က တစ်ချို့ညတွေဆို အိမ်ကိုပြန်မလာပေ။
အဖေဖြစ်သူကိုစောင့်ရင်း တံခါးနားမှာတင်
ခွေခွေလေးအိပ်ပျော်နေမိပြီး
ဒေါ်ခိုင်မာညဈေးကပြန်လာမှလန့်နိုးရတဲ့
ညတွေကလည်းထပ်လာသည်။
"အငယ်... ငါမေးနေတယ်လေ ''
"ဟေ..အေး ''
"အဖေဘယ်အချိန်ပြန်ရောက်လဲလို့ ။ ''
"ထုံးစံအတိုင်း.. ၁၁နာရီ၁၂နာရီပေါ့ဟာ ။ ''
"ခွေးမလေး ၊ အဲ့ဒီအချိန်ရောက်မှ
ငါအိပ်တာလေဟာ ။ ''
"နင်အိပ်ပျော်ပြီး တအောင့်နေရင်ရောက်လာရော..''
"မဟုတ်သေးပါဘူး အငယ် ။ မနက်ပိုင်း နေမြင့်မှထတဲ့အဖေက မနက်အစောကြီး ငါအိပ်ရာမနိုးခင်
ပန်းကုံးတွေသွားသွားပို့နေတာ ဟုတ်မှဟုတ်ရဲ့လား ''
YOU ARE READING
အနက်ရှိုင်းဆုံး နဒီ
Short Story"မိန္းမေတြက နဒီနဲ႕တူတယ္... ဒါေပမဲ့ တခ်ိဳ႕မိန္းမမ်ားက်ေတာ့ နဒီကိုသာၿပီး သမုဒၵရာျဖစ္တယ္ ။... အင္း... အနက္ရွိုင္းဆုံး နဒီေပါ့ကြာ...'' ▪▪▪▪▪▪▪▪▪ "မိန်းမတွေက နဒီနဲ့တူတယ်... ဒါပေမဲ့ တချို့မိန်းမများကျတော့ နဒီကိုသာပြီး သမုဒ္ဒရာဖြစ်တယ် ။... အင်း... အနက်ရှ...
