مذكرات عاشقه

رجلي الأول ❤

المقدمه

اغلبنا نحبو  في سن المراهقه ، حب الطيش مسميينه ، اتحب من اتفه الاسباب وتلقي روحك متعلق في الحبال الدايبه ، بدون وعي ولا تركيز ولا اكثرات للحاجات اللي ممكن اديرها باش توصل لهذا الحب ، وتحسه هوا الاول والاخير لا في قبله ولا في بعده ، اني البنت الخجوله اللي ماتعرفش كيف تحب اصلا ههه ، ختشه تسمع علي الحب وخاطرها اتجربه ، تتفرج علي المسلسلات التركيه وسايحة معاهم هههه ، تحسابه الحب بهالبساطه وبهالوفاء 💔 ، تشوف في الاتراك كيف طرووف ويكبدو علي بعض في تكبيد يدوخ هههه، ماتحسابش انه الليبين تكبيدهم احرف ، واللي تسميه كبيدتك يسحنهالك سحن ويديرلك باها قلايه ههههه ، ماشاءالله علينا طبعا ، علي المهم لاهيه بقرايتي وعاطيتها وقتي كله ولا فيس ولا انستا ولا شيء،  كله مش مقتنعه بيه ،وكله عندي طرق للتعارف وجو زايد مش ليا ، ديما حاطه في راسي اني مستحيل نكلم راجل في التلفون ، حتي رقم غريب يتصل مانردش ، حاطه ثقه اهلي فوق كل شيء،  ومانبيش نغضب ربي ، حاشيه راسي في وسط الكتب والمناهج ونقرا، مسمييني دودة القرايه زمان هههه ، حتي نص درجة تنقصني نقعد ننذب باليومين علاها ، جوي ضحك ومليح والشله اللي انتعرف علاها ندير معاها في جو فوق الريح هههه عايشه بالطول والعرض نحب نفرهد نطلع نحب العيله الكبيرة حوش الجدود الخالات والعمات وسهريات بنات الخاله والجو الفستري اللي مازيه واحد .................لكن .....!!
💔 💔 ياحسرتي لا عمام ولا خوال ولا حوش جد ولا شيء
العيله الكبيرة اللي نحلم باها فاقدتها
جدودي متوفيين والعيله متفرتكه خاشه في بعضها عمري ماحسيت بجو الاسرة الحلو ، محرومه منه
يمكن في نظركم شيء عادي بس واللهي تحرق
لما تلقي روحك في الأعياد مقعمز في الحوش ومش لاقي حد ولا في من يجي ويعيد عليك كأنك مقطوع من شجرة ، واللي يقتل اكثر انه بعد ما تميت ثالته تانوي خوي الصادق وقفني من القرايه 😔😔😔
عندي خاله وحدة عايشه في منطقه خطيرة وفاها ضرب  وليا سنين ماشفتهاش......

علي المهم اكيد بدقولو توا مادامك محافظه لهالدرجة ولا فيس ولا مكالمات ولا طلوع كيف حبيتي
اهو نقوللكم ياحنه قصتي
اسمي مريم
عندي اخين اكبر مني واخت متزوجه
صبحي الكبير متزوج من  سميه وعنده بنت
صادق خوي المتوسط مش متزوج لكن مدايرلي الرعب ومكرهني في عيشتي وين هناك نكد وغبابير سود جايتني منه
ماما فاطمه طيبه  هلبا وهيا اللي مهونه عليا الدنيا اللي عايشتها
بابا منير متوفي ليه فترة طويله

انحب انوه علي شيء.، في البدايه خوي الصادق من بعد وفاة بابا كانت حياتي عاديه زي اي بنت عندي نت وتلفون وكنت نقرا لكن بعدين قطعني من المدرسه وابدي ياخد في النت وحتي التلفون ومنعني من الطلوع يعني جي تدريجي مش من الاول