مذكرات عاشقه

الحلقه العاشرة 💋

كن علي يقين تام بأنه مهما تزعزعت أمورك في الحياة ،إلا أن الله قد مدك بطاقه تمكنك من تجاوز كل ماتمر به :" لايكلف الله نفسا إلا وسعها "
هل في رايك ياسامي كنت ناقصه تكمل عليا انت، شن رايك باللهي في كل شيء شفته وعانيته ، كنت نقولك انك احلي حاجة في حياتي ليش ادمرلي اللي باقي من حياتي بس لييييش .
رجعت من السفر ولا كأنك مداير حاجة ،كلمتنني واني ضعفت ورديت ،مادقوليش علاش ضعفتي  ورديتي ،كميه الالم اللي عايشاته تخليني ندور علي اي قشه تنجيني من نار الصادق ، قتلي انك كنت تخدم ومشغول وماقدرتش ترد عليا ، قتلك اني مش غبيه انت ماشي لتونس ومخلي تلفونك اهني باش مانشكش ، بكل بساطه قتلي شغلي كان في تونس ، بكل اشمأزاز قتلك وريحوك وتمتعت غادي قدرت ترقد في حضن غيري قدرت تمس غيري قدرت تخوني ياخاين وانهرت بالدموع ، انت انصدمت وابديت تسكت فيا وادقولي لحظه ضعف وانك تبت وانك طايش ولما نتزوجو حتعقل  وطلبت انك تشوفني تحت الشجرة كالعادة ،  خليت الصادق طلع مع اصحابه الصياع سمعته يحكي انه بايت في استراحه الاولاد ويوصي فيهم يجيبو سكير ونساوين عاد ليله خميس ويبي يتمتع علي اساس انه الخميس مباح فيه كل شيء حتي الكفر والجمعه ينوضو ويدوشوويصلو في الجامع ادقولي شيوخ طاهرين،  كيف المعادله هادي فهموني بس ، اني يضربني علي اساس خايف علي شرفي وهوا يوسخ شرفه عادي ، ايه اني مقتنعه انه زي مالبنت شرفها اغلي حاجة عندها حتي الراجل هكي مش مفروض يديره في الحرام مش مفروض يرخص روحه ، اني يخبطني بلا رحمه وحابسني وحارمني من قرايتي وكل شيء خايف الدنيا ادور بيه وتعاقبه بشرفي وهوا مش مبطل صياعه وضياعه قالبها علي راسه من شرقها لغربها مش طالق حد   ، طلعت نجر في خيبتي   وكسرتي  قعمزت قدامك وقعدت نبكي ووجهي قاعد كدماات زرق ، وانت ماسألتنيش ولاهتميت باللي في وجهي ، ممكن لانه وجهي حكم مايقعدش صافي اسبوع ضروروي من الضرب كل يومين ،  قعدت تتلمس في وجهي علي غي العادة واني نزيد نبكي اكثر ، قتلك عقابها تخوني ياسامي ياحبيبي ياظهري ياسندي
قربت مني هلبا وقعدت تعتذر مني هلبا وبستني من فمي فجأة اني من الصدمه انشليت معاش قدرت ندير شيء بعدين تفكرت انه فمك كان علي وحدة تانيه  كنت راقد مع عاهرة ، دفيتك بكل قوتي ومشيت نجري واني ندفل مانبيش ريقك يقعد في فمي ، ريقك اللي مختلط بريقها ، اعععع كرهتك عفتك. ....
[شعرت للحظه انني في امان ان لاشيء يمكنه أذيتي بعد اليوم لكنني تألمت من حيث أمنت  ♡]
مشيت توضيت وصليت واني نرعش ونبكي سجدت وروحي تتآلم قبل جسدي ، ناجيت ربي بكسرة بضعف بتعب ، لقيتك تتصل تنهدت برجفه ورديت عليك اعتذت علي اللي صار وحسيت صوتك القديم خوفك عليا وكلماتك اللي نحبها ، للحظه نسيت انك خنتني علي فراش عاهرة للحظه نسيت انك وجعتني لما شفتلي بشهوة، للحظه نسيت انك اغتصبت فمي بفمك النجس الملوث بأجسام العاهرات ، نسيت او تناسيت ....
طلبت مني فرصه واني قبلت قعدت فترة وانت كويس معاي واني مانكذبش عليك فرحت لكن مع ذلك كنت خايفه ، خايفه ترجع تكسرني .
بعد فترة ..
بديت تتغير عليا وتجبد في روحك وكل مانتلاقو تحاول تشوف جسمي واني نمنع فيك وكرهت حتي نتلاقي معاك وحاجة وحدة تصبر فيا انك خلاص كملت حوشك وحتخطبني ، بديت نتصل في عقاب الليل ونلقي فيك مشغول ، ( طبعا التلفون كان بالدرقا وصادق لانه ضامني مانطلعش ومايخليش فيا نمشي الا لحوشكم ياسامي عاد صاحبه وحاط فيه الثقه  لذلك مكانش يفتش في داري  ) نضت الصبح توضيت وصليت ونزلت درت الفطور للصادق  ونسمع فيه يكلم في امي  ، طلع وقعمزت نصب في الشاهي سألت امي شن يبي علي الصبح ، قالتلي وعيونها معلقه فيا وكأنها كانت حاسه باللي في قلب بنتها ، انه يبينا نمشو نخطبو لسامي صاحبه قال برو العشيه مع ام سامي ، اي استاكيت  وابديت نرعش ومعاش فهمت شيء قلتلها ييو ييمه ششش شن ادقولي سسس سأ سألتك بالله .
امي  معاش قادرة تشد دمعتها اتلبطتني واني انوح  ونبكي وانقوللها مستحيل سامي يدير هكي هوا يحبني  يايمه مستحيل ، وامي دمعتها تنزل ومتقطعه علي حظ كبيدتها اللي متقربع من جميع الجهات ، مشيت اتصلت بيك بدل المرة مليون ماتردش لبست عبايتي وطلعت لحوشكم لقيتك في الايدة كيف بتطلع ، كانو عيوني شرار قتلك مبرررووووووك والله وبتخطب وتبيني اني نمشي نخطبهالك ،  تكلم يارااااااجل ياكبيييييير ياوفييي ياحبيبي💔 والا خلاص بديت حبيبها هيا ، شديتني من ايديا ، قعدت ادقولي اني مسحور اني متاكد اني معاش طبيعي سحرتني خدتني منك ، دارتلي كتيبه باش نخطبها واني ماقدرتش نقاوم اني نحبك انتي وعلاش منلعب بيك واصلا هيا شينه ومش حلوة توا كان اني بعقلي نسيبك ونمشيلها ، اكيدة اني مسحور .
هديتني ياسامي ، هديت الانثي اللي فيا ، هديت القوة اللي نملكها ، هديت طاقتي علي الاحتمال ، هديت صبري ، هديت هدوئي ، هديت احلامي ،هديت شغفي ، هديت كرامتي ،هديت كل حاجة فيا
الله لايسامحك الله ياخد فيك الحق ياحبيبي
انتهت الحلقه 💔💔
لانسمح لاي شخص ينشر روايتي بدون اذني