مذكرات عاشقه

الحلقه الاولي 💋

لو نعرف لو كان عندي ذرة شك انك بذلني واتهيني بهالطريقه ياسامي ماكنت درت كل هالحاجات باش نوصلك ، ماكنت حبيتك بدون مانعرفك ،بجد مش قادرة نستوعب كيف قلبي يحب شخص مايعرفاش ، شخص عمره ماشافه ، شخص عمره ماحكي معاه ، شخص مجهول ، كيف نقدر نحب شخص لمجرد انه حد حكالي عليه ، ماهو انت مش فاهم ياسامي ، الشخصيه اللي صوروهوالي عليك ، طلعوك حاجة ماصارتش ، حكولي عليك بطريقه أثير اي حد ، اتشوق اي شخص انه يتعرف عليك ويقرب منك، من يوم يومي انحب الراجل الثقيل اللي ماتحركاش اي وحدة ، وانت كنت زي الجليد حتي عيونك ماترفع فيهم لحد ،دوشه العلاقات والبنات ماعندكش باها بكل ، وهذا شدني ليك اكثر ماتتصور ، وزيادة تاني شخص واعي وعقله كبييير سابق سنه، وانك تفكر في مستقبلك وتخدم ليل نهار برغم صغر سنك ومسافر لمدينه تانيه باش تلقط رزقك، ومن كثر ماحكو عليك ، فجأة لقيت روحي انحبك، مش حب عادي قلت بالك مع الوقت يبرد ، لكن فات شهر وشهرين وثلاته وسنه ، وانت حبك كل ماله يزيد ، في يومها كان تتفكر لما جيت اول مرة لحوشكم الجديد بعد ماحولتو للشارع متعنا شفتك من بعيد لبعيد ، برغم ملامحك مش واضحة كويس والشبحة جت فيسع فيسع ، لكن دقات قلبي اللي شعلو نار ماقدرت نطفيهم والله ماقدرت ،شفتك خطف ، لكن ماكنت نعرف انك حتخطف قلبي في هاللمحه السريعه ، بجد حبيتك حبيييييتك بجنون ، تتفكر لما خشيت لحوشكم اول مرة وجت عيني في عينك وانت تحشمت ونزلت عينك طول ، هههه قداش مازدت احترمتك اكثر وقتها ، ولا لما اضربني خوي صادق هذيكا الطريحة وطلعت نجريلكم لحوشكم هاربه وبالصدفه انت كنت إجازة من خدمتك وقاعد مع اهلك ، لقيتك قدامي زي شط الامان جريتلك واني مهمشه وجسمي مكسر ووجهي ازرق وخشمي دم وشعري مطلوق لبدت وراك وكأنك الساتر اللي حيحميني وكأنك الأمان وطوق النجاة اللي منشبت بيه ،ااااااه قداش حبيتك، وعيونك كنت نشوف فاها في الحب ، استنيتك تكلمني ادير لقطه ادجي تخطب، شيء ولا تحركتلك شعرة ، معاش بديت نفهم عليك ياسامي وحق الله ، ومن كثرة الانتظار حسيت روحي تعبت، ماوعرها لو تعرف بس ولا تحس مقواها لما تنوض وترقد علي أمل انك تلقي حتي اشارة وحدة من الشخص اللي تحبه ، انه حتي هوا يفكر فيك ، يحلم بيك ، يحب فيك ، ولا كله هذا اللي نحس بيه وهم ، مشاعر ملخبطه ، ديما نبكي وضايقه بيا الدنيا ياسامي ، الانتظار كان عذاااااب يحرق فيا حرق ...
جي رمضان ودعيت من قلبي نكون ليك وتكون ليا
صليت استخارة وحلمت بيك ونضت فرحانه ومش سايعتني الدنيا
بعد العيد بفترة صارت عندكم مشكله قويه وفيه ناس تعدو عليكم وحرقو حوشكم وانت كنت متواعد عليهم ومقرر تقتلهم طلعت سلاحك وركبت سيارتك وسطربت بقوة وطلعت
لما سمعت صوت سيارتك قلبي تفترش ومعاش عرفت شن ندير ، خديت رقمك من تلفونك خوي بالدرقه واكتبتلك رسايل فاها قران وادعيه واحاديث عن ضبط النفس وقت الغضب وقتلك اني نعرفك وانت ماتعرفنيش وان شاء الله ربي يحفظك واتصلت بيك اول مانفتح الخط وانقاال ايوااااه ، ضبطتك انت طول ياسبحان الله .

انتهت الحلقه
تابعوني

الحلقات الاولي مجرد مقدمه كأنها مذكرات تابعو الجاي
الجاي احلي بهلببببببا