" يارب
أنت خلقت هذا القلب وأنت زرعت فيه الشعور وأنت تضع فيه ما تشاء وتنزع منه ما تشاء .. وتقلبه على الوجه الذي تشاء ..
فبرحمتك لا تتركه يتخبط هائماً لا إلى قرار أو إلى استقرار ,
وبحكمتك أنر له الظلمة وبصره وأسكنه وطمئنه وألق عليه محبةً منك !
يوسف خش للعيادة جايب معاه شكارة فاكهه ، خش الحجرة انصدم لما لقي السرير فاضي ، دور في الحمام القاه فاضي، كلم ممرضه فايته قالتله المريضه طلعت من الصبح ووقعت علي خروجها ، طار عقله ، وقريب هبل ، دار السيارة طيارة ، وامشي لفدوي ، قاللها وين مريم وعلاش اطلعاها ومادقوليش ، قالتله اني من امس لما رفعتلها حوايجها مانندريش عليه ، يوسف افصل علاها وابدي يعيط ، تيييييي كييييييييف ماتندريش ماقالتش قدااااااااامك توااااااا ، توييييييييين ابتمشي ، فدوي تبكي وتخمم توييين مشت ماعندهاش غيري هيا ، وبالله اعليك جاي تحاااااسب فيا اني ، حااااااسب روحك تراااااا ، علاااااش شن تبي فاهااااا بعد ماتخليت علااااها بهالطريقه البشعه ، وانت عاااارف وحكيتلك انه ماليهااااش دخل ، نذمتني علي الكلام معاااااك قسم بالله ، حسبتك بتسندها وتوقف معاها ، مش تسيبها وتعايرها بالفواجع والمصايب اللي صارتلها ، انت ماتستااااهلش مريم ياااااايوسف ،بدل ماتعرض في رجولتك علاها ، علاش مامشيتش وحاسبت اللي تعدو علاها ، علاش ماسندتهاش ، علاش ماكنتش معاها راجل ، لما جد الجد رخيت بكل بساطه ، طلعت زيك زي الكل ، زيك زي الصادق زي سعيد زي سامي زي عبدالله ، كلكم زي بعض راهو اختلافات وجيزة بيناتكم، كل واحد ظلمها وعذبها بطريقته ، ربي يسامحك علي موجعه هاليتيمه وخلاص .
ايه ايه وقف اهني بالله اعليك ، علي ماضني هذا هوا الحوش، اصبر نطق عليهم ، طقيت فتحتلي هدي ، هدي عرفتيني ، قعدت تشبحلي بتعجب ، حي عليك شكلك ماعرفتينيش اني مريم بنت خالتك ، حضنتني بقوة قوتها وبدت تبكي ، خلصت مولي التاكسي وخديت حوايجي، وهيا مش مصدقه شوفتي ، كل شويه نسمع رزمه قويه ، قلتلها عانيت باش وصلت لحوشكم، تعرفي كل تاكسي نسميله المنطقه يقولي مستحيل نخشلها خطيرة، قالتلي بالله يامريم تعودنا شن منديرو ، واللهي عيشتنا خوف في خوف، ولامس طاح صاروخ علي جيرانا، الحمدلله ماصارلهم شيء ، باهي علاش ماطلعتوش مادامه المنطقه خطيرة لهالدرجة، تي باللهي اعليك يامريم وييين منمشو ، قداش منجلو ونخلو رزقنا ملوح ، بالله اعليك هدي نبي ندوش سلم بنيت خالتي ياربي .
خشيت دوشت وتكيت شويه ، اني معاش نبي نفكر في ولا حاجة ، اللي يبيعني حنبيعه ، واللي بيطلع من حياتي مش حنشد فيه ، وفي الاخير نصيبنا مكتوب ومافيش منه هروب والحمدلله علي كل شيء مر وفاااات في حياتي ، يوسف حيقعد الجرح اللي عمره ماحيبرا ، حيقعد الحسرة والخيبه اللي عمرها ماتتعوض ولاتترقع ، مهما اندير مستحيل ننسي عيونه ، رجاله الكون ماتنسيني لحظه معاك يايوسف ، يوسف لو نقدر نشبحك دقيقه بس ، لو نقدر نودعك ، لو نقدر نضمك ، ياريتني شميت ريحتك اكثر ، ياريتني قدرت نكون معاك ولو ليوم ، قداش تخيلت صغاري منك ، قداش رسمت عيله حلوة معاك ، يوسف انت الدنيا والنفس وبلاك اني جسد بلا روح .....
اني حنتحمل مش لحاجة لكن وربي مانبي نطيح ، وربي مانبي نبكي ، وربي مانبي ننهان أكثر، انت تستاهل اللي احسن مني ، وربي يسعدك يوسفي في كل الاحوال مستحيل نحقد عليك ولا ندعي بقله السماح ، اني حبيتك وعاذراتك مش لاني مغتصبه ومانليقش بيك زي ماقلت ، لا يايوسف لاني عفيفه وحبيتك بصدق وسعادتك تهمني ، ومادامك مش مرتاح معاي ، وين تحس راحتك برا ، ليك كامل الحريه ، وين يرتاح قلبك وتشوفه خير ليك ديره وربي يعين هالقلب اللي في صدري وخلاص ...
اني كل خليه فيا موجوعه ، ايييييه موجوعه ، ماشفتش الفرح ، مانعرفش طعمته اصلا ، انتي اللي مقعمزة في حضن امك أحمدي ربك ، انتي اللي بوك فوق راسك احمدي ربك ، انتي اللي خوك ساندك وفي ظهرك ،حتي هوا احمدي ربك ، انتي اللي في عيله دافيه ، عمام خوال ، ناس تحن عليك ، لاقيه حوش يلمك ، تقري تخدمي ، اشكري ربي علي هالنعم ، فيه غيرك يحلم باها حلم ومش لاقاها ، اني اتفه الحاجات انحرمت منها راهو ، وغيري مثايل ، اني بنت وعندي متطلبات زيني زيك ، خاطري نحب وننحب ، نتزوج ندير صغار ،علاش مش من حقي ، شن اللي ارتكبته ، علاش اني نتحاسب في هالمجتمع والجاني طليق وعايش حياته بالطول والعرض ، اني اللي مظلومه مفروض حقي يكون محفوظ مش مهدور .....
طلعت ندور في هدي ، خشيت المطبخ وقفت جامدة ، وجيت منوخر ، وقفني صوته ، تعالي مريومه اني ولد خالتك معقوله ماعرفتينيش اني فارس ، خشيت سلمت عليه ، لما نقوللكم طارت النيه من جنس الرجال ممكن ماتصدقونيش ، رغبتي مااتت في كل شيء، فارس وبكل هيبته ورجولته وجاذبيته ماحركش فيا شعرة ،حاجة فيا من داخل تنزف ، رغم نظراته اللي يشع منهم الاعجاب ، اني ماتت الرغبه في داخلي ، استأذنت منه وخشيت للدار ، لحقتني هدي ، تسال فيا خيرني حزينه ، وتسال علي امي وخوتي ، شن منقولك هدي سألتك بالله ، كلهم تحت التراب ، واللي عايش باع الدم اللي بيناتنا وماسألش عليا اصلا ، الكل باعني هدي ، الكل باااااااع ، جت خالتي اللي كانت في حاله الوفاة تعزي ، شبابنا يموتو ، والجنايز معاش لحقنا عليهم ، كان تبكي مع ام الولد ، القت روحها تبي من يعزاها في اختها ، ابدت تبكي وتنذب علي امي ، وتلوم كيف مادقولوش ، تي شن منقولك ياخالتي ، اني لتوا نبي حد يواعيني باش نصدق ، تعبت والتعب تعب مني ، اتلبطتني وهيا تبكي واني جامدة ، بجد محتاجة دكتور نفسي ، معاش طبيعيه اني ، ردات فعلي بدت رزينه ،باااااردة .....
موجوع قلبي، والتعب بيّه
من اباوع على روحي ينكسر قلبي عليّه
تعبان وجهي وعيوني قهرتني
دنيا شلّت حال حالي، و فحياتي كرهتني
كرهت الحب، ماريده دمّرني!
طيب اني وادري طيبي لهالحال وصلني
أنت تقرأ
مذكرات عاشقه
Romanceروايه باللهجة الليبيه مستوحاة من قصه حقيقيه طرحت فيها الكثير من القضايا كالتحرش والاغتصاب والخيانه والحروب وداعش والفقر والزواج بالاكراه وغيرها .......... كانت مقدمه الروايه اشبه بالمذكرات وبعدين حتتغير وتوضح الصورة اكثر ❤ الروايه قويه هلبببببا و...
