مذكرات عاشقه

الحلقه الرابعه 💋

مش عارفه هل اللي اني فيه يضحك ولا يبكي بجد مش عارفه ولاحاسه اصلا ....
حبيت واللي نحبه اول ماعرف طلبني للزواج لكن تصدق ياسامي ماكنتش فرحانه لسبب بسيط اني وقتها كنت محتاجه كلمه حتي اني نحبك وحاسس بيك من زمان ، كنت تشوف فيا وتشوف في تعلقي بيك الفترة الاخيرة لما استقريت جنبنا كنت تشوف في اهتمامي بيك المبالغ فيه كنت تشوف في تحججي الدائم للمشي لحوشكم ، كنت تشوف في لمعه عيوني واني هايمه فيك ، ومع ذلك درت روحك ماتشوف في شيء ، مخليني نتعذب قدامك ومادرت شيء ، 4 شهور وواضح وضوح الشمس اني انحبك بس انت متجاهل او مش مهتم بالموضوع، ضحكتك معاي وابتسامتك وجوك وكل شيء كان معاي اني مختلف ولا اني كنت نشوف فيه مختلف وهوا اقل من العادي ، خوي وعنفه معاي ذبحني ، وانت كنت الملجأ الوحيد اللي ليا ، كنت ممنوعه نطلع ولا نخش حتي الحوايج او شيء زي هكي كانت امي هيا اللي تشريلي فيهم ، مانطلعش ومانخشش ، كان حوشكم متنفسي الوحيد ولسبب واحد انه امك كانت مريضه واني اللي ديما نمشي نساعد فاها ، كنت ديما انقول حنخش للحوش هذا كنه مش مجرد خدامه تساعد وخلاص ، من اول ماطلبتني للزواج وانت مهتم بيا واحلي حاجة في الموضوع اني اول وحدة في حياتك وانت اول حد في حياتي، بديت تبني في حوشك اللي بحدانا واني فرحانه ونختار معاك في كل شيء علي ذوقي وطايرة معااااااك
تتفكر لما مرة درت بيتزا وبعتلك منها انت تحشمت لاني مديتهالك انت وقعدنا نهدرزو علي الباب وانت شاد ايدي كبستنا امك رغم انه الوضع عادي جدا واحني مادرناش حاجة غلط لكن انت تعرف شن درت
قلت كلام نزلك من عيوني للارض

اني نبي نفهم حاجة واحدة بس علاش انت دفيتها فيا اني علاش ياسامي طلعت روحك انك انت الملاك اللي كلمته اني وقعدت شادة ايده ومعجبه بيه وبعتتله البيتزا امتع انلوح في روحي عليك علاش هكي واللهي وجعتني منك ياسامي علاش ماقلتلهاش اني البنت اهيا نباها واني علي علاقة باها ليا فترة علاش اخترت اتبيض صفحتك قدامها علي حساب صفحتي اني. .....علاش ياحبيبي اللي ديما مستندة عليك ترضي اهانتي علاش ........ انت خليتني نكره اليوم اللي استنيته وتمنيته من النهار اللي عرفتك ونخططله كيف بيكون .....خليتني نتمني فيه الموت خليتني نتمني ننسي كل شيء ونبدا من الصفر خليتني نحس بالمهانة والذل .......اااااااه ياحبيبي كنت نحلم باليوم اللي تمشي فيه لامك وادقوللها اني في بنت نحبها ونباها وانتي تعرفاها وبالشكل اهوا ......ماكنتش نسحابه انك حتفتحلها الموضوع بطريقة تخليني نتحشم انشوف في وجهها بعده ........علاش هنت عليك قولي علاش .....بالسهولة اهيا هانت عليك مشاعري .....خيرني حجر مانحسش بالاهانة .....اني لو نبي نتعرضله الموقف هذا كنهذا راني من حينت ما حسيت روحي نحبك قلت لامك وكلمتك..... لكن اني رضيت بعذابي وآلمي ومابيتش انزل كرامتي وبعدت .....لكن امتي كلمتك لما انت كنت في خطر يعني ماهانش عليا وجعك وكلمتك علي حساب كرامتي وماهمني شيء غيرك انت ومع ذلك بعد مااطمنت عليك قررت اني نطلع من حياتك بهدوء لكن انت ماخليتنيش صح ولا ......انا كنت نبي نخش لحياتك لمهمة معينة ونطلع منها ونرجع نبعد ......لكن انت اللي تمسكت بيا صح ولا ......مادجيش توا قدام امك اطلعني اني انا اللي مطيحة روحي عليك وقاتلة روحي ونبعتلك ونكلم فيك وانت المسكين اللي ماليكش دخل بالموضوع .......
بالله شوف الفرق وانت قرر من يحب التاني اكثر
لما نحطت كرامتي ووجعك علي طاولة واحدة
اني ضحيت بكرامتي علي حساب اني نكون معاك في اصعب موقف مريت بيه انت وماهمنيش وجعي ولاكبريائي اللي ابدي غبار منثورا ولحد الان انقول عادي لاني ديما انحس انه مافيش كبرياء بين حبيب وحبيبته ......
لكن انت لما خيرت انك تنقد كرامتي ولا كرامتك
اخترت كرامتك انت وعفست علي كرامتي وماهمكش قداش حنتوجع منه الموقف هذا ...تعرف حتي لو الموقف زي ماحكيته لامك كنت حنحس بالاهانة لان مش مفروض الاسرار اللي بيني وبينك تطلع لمخلوق ....فما بالك انه كل الكلام اللي انت قلته غلط وعلاقتنا مابدتش بهادي الطريقة ....تمنيت انك تفكر فيا وتحميني من الشيء اللي مريت بيه البارح تمنيت انك تخاف عليا من انه تنهز صورتي في عين امك .....ياحليلي علاش اني هكي .....بسهولة نتقدم كبش فداء ....علاش ضحيت بيا ياسامي ....حطيتني في اصعب موقف ممكن نمر بيه في حياتي كلها خيرني شن درت في حياتي باش ندجازي بهذا الشكل .....هذا كله لاني حبيتك بصدق تعرف لو كنت حق تبيني مفروض مشيت صلحت كل شيء درته ورجعت جزء من كرامتي وكبريائي اللي اشتركت في تبزيعه
لكن انت طبعا مايهمكش ولا عمره كان هامك
انت فعلا كنت اناني في نفسك واني كنت انانيه في امتلاكك وماقدرتش حتي نعاتبك اكتفيت بابتسامه كلها جروح كلها عتب كلهل لوم وطلعت ويعلم الله قداش بكيتني يعلم الله ......

تابعوني