الحلقه 11 💓
اعوذ بك اللهم من نفس كسيرة وقلب متعطش ومحبة لا طمأنة فيها ومن أعباء ثقيلة وعبث الذنوب والخطايا 💗
-ولاتحملني مايرخي قوة أكتافي يالله 🌾
يالله جبرا للقلوب ، وتيسيرا للعسير ، وبعدا عن كل مؤذ وأذي ، وقربا منك ، وسكينه قلب، وهدوء بال، وحياة طيبه ، وجنة عرض السماوات والارض 💜
لو انت حاس وشايف كميه الذل والمهانه واني ماشيه نخطبلك نخطب لحبيبي ؛ راك قعدت تتأسف مني بدل العمر عمرين ، راك قعدت تردد في كلمه اسف ، اسف وبس اسف مدي العمر ، آسف للمشيب ،اسف اسف آسف ...
لكن انت كنت اناني ماتفكرش الا في نفسك ومش شايف الا روحك وماتحسش الا بمشاعرك انت وحدك ، لكن مشاعر الناس التانيه ولا تعنيلك بحتي حاجة...🌱او هكي كنت نعتقد وقتها ، ماجاش في بالي ولا مبرر لافعالك ، كنت دايما في نظري جاااني ، جااااني وبس ، مش مهم علاش او كيف وشني اللي غيرك ، الحاجة الوحيدة اللي مش حننساها انك مارحمتنيش زيك زيهم مافرقتش علي كل الناس اللي عذبوني في حياتي ، حتي مكانك اللي انت فيه توا مايشفعلكش عندي ياسامي ، صدقني مش حيمحي الاسي اللي في قلبي ، ماهو اني لحد هادي اللحظه ماجربتش حد يشري قلبي ، جربت ننباع بس وطبعا ليك كل الفضل في الشيء هذا.
واللي يزيد ايتعب اكثر استسهالك في الكذب ، ماهو احيانا لما الشخص يتفنن في الكذب عليك علي الاقل محترم ذكائك ويحاول انك تصدقه بكل الوسائل لكن انت استسهلت بعلاقتنا وبيا وبكلامك وبمشاعري وحتي في كذبك اخترت اتفه كذبه وعلي اساس منقتنع وبتفوت عليا ، او بالاحري ماكنتش مهتم اصلا بأني نقتنع .... 🌺 💔
مشيت واني خجولة من قلبي ، واجعني حاله ، وصعبانه عليا نفسي ، شفتها وتأملتها كانت فرحانه وباين عليها طيبه هلبببا بشوشة ومرتبكة توا معقوله هادي بتسحرك ، لبسها كان محتشم ومستور وكانت قمه في الجمال والادب ، تصدق كنت مناكلها بعيوني ، نار الغيرة تاكل فيا ماكله ، تخيلت روحي مكانها تخيلت فرحتي تخيلت لبستي ،تقديمي ، شعري ، مكياجي ، كلامييي ، كل شيء لحد مالغصة غمت علي صدري ، يلا الحمدلله علي كل حال ، حيكون ليا نصيب في الاحسن اني واثقة ربي مش حيخدلني مهما يصير .... 🌺 💔 حوشهم كانت ريحته بخور وفاتحين علي سورة البقرة وفيه هدووء يشدك بشكل رهيب، رغم كل المعاناة اللي اني فيه لكن تصدق تمنيت مانطلعش حسيت في حوشهم برااااااااحة كبيرة ، لدرجة اني اول ماوصلنا لحوشكم ، لوحت كل شيء وراي وبديت نضم ونرتب كنت نشيطه وكأنك كنت حمل ثقيل علي قلبي وفي لحظة انزاح ، ببساطة تنازلت عليك وي ماانت فرطت بيا ......💔🔥
وتيتلك كل شيء وانت كنت تشبح فيا زي اللي نادم ، ولا متحركلك ضميرك شويه ، الحق معاش بدي يهمني نفهم اصلا ، و مابيتش نديرلك اي اعتبار هه تصدق ربي عطاني كمية صبر غير طبيعي ،امك واقفة تدعيلي وعلقت علي كلمه عقبالك يابنيتي ونفرح بيك ، وانت اتابع بعيونك وتشبحلي وكأنك مش علي بالك الكلام ومش راضي بيه ، ايه صح كله حلاااااال عليك واني مفروض من بعدك نقعد حطااام ماتنوضليش نوضة الا بيك والا 😏 ، والاااا كأنه لقطاتك اهيا مبينه انك غيرااان ، تلالا بعيييييد عليك الشيء اهوا ، اصلا اني بديت نشك حتي في ادمييتك وفي احساسك ماتبينيش نشك في نظرات عيونك وكلامك وغيرتك وتصرفاتك تي حتي في ضحكتك اني شاكة لانك ببساطة تحولت لكتلة كذب ونفاااق ....
واني في عز افكاري نسمع في صوت عيطه من امي ، لوحت اللي في ايدي ومشيتلها نجري لقيتها شادة جنابها ومش اول مرة يتكرر هالمشهد ونعاينو فاها في المستشفي ويقولو بردة ، اني فشلت لما شفتها ملوحة علي الوطا وتإن من الوجع ، كلمنا الصادق وطلعنا نجرو باها دخلاها طوول لقسم الاسعاف واني نجري ونبكي والصادق اول مرة نشوفه مثأتر مع انه يكشخ علي امي وحتي يدف ويعيط علاها لكن مع ذلك حب الام هذا شيء فطري غرسه فينا ربي ،حتي لو كان عاق ...♥️
قعدنا علي اعصابنا الدكتور طلع وجها اسود ، قال كيف مخليينها لتوا قلناله شن فيه ، صدمنا وين قال فشل كلوي ،الكلوتين مضروبات وتبي زرع بأقصي سرعه ، اني تلوحت علي الوطا وبديت ننذب والصادق يرفس فيا برجله ويضرب فيا علي فمي باش نسكت ....
انتهت الحلقه
تابعوني
أنت تقرأ
مذكرات عاشقه
Romanceروايه باللهجة الليبيه مستوحاة من قصه حقيقيه طرحت فيها الكثير من القضايا كالتحرش والاغتصاب والخيانه والحروب وداعش والفقر والزواج بالاكراه وغيرها .......... كانت مقدمه الروايه اشبه بالمذكرات وبعدين حتتغير وتوضح الصورة اكثر ❤ الروايه قويه هلبببببا و...
