مذكرات عاشقه

الحلقه 20💋💋

الحلقه 20
لازم نستوعبو انه لكل شخص طاقه ممكن يتحملها وأحيانا هالطاقه من كثرةالصدمات والمآسي تتلاشي ، يوصل لمرحله البرود الجسدي والنفسي وحتي الروحي ، كأنه بدي عديم إحساس معاش قادر يدير شيء يحسن بيه حياته ولا يبي يدير ، يوصل لليآس للخمول لي الا وعي؛ويتحول لمريض نفسي ، كل تصرفاته بدون تفكير وردات فعله مشوهه  ومش موزونه ، يلقي روحه ماشي في الطريق الغلط بدون إدراك ، ومعاش يقدر يولي منه ،  يحاول يكون حنين علي عيلته لكن من كثرة النماذج الفاسدة اللي يخالط فاها بالسيف عليه بيقسي  ،  لانه مايتحملش يشوف عرضه وشرفه متبعتر ، لكن ماعنداش مشكله لو يمس شرف غيره ،متناسي انه الدنيا دوارة واللي بتزرعه في أعراض الناس بتحصده في عرض أهل دارك ،  الانسان بفطرته مش شرير ولا قاتل ولا زاني وووو ، الانسان فطرته الخير الطيبه التسامح حب الله ووو ، هادي المبادئ اللي انولد علاها و البيئه والبشر والمعاشرة وتفكيره هيا اللي تحدد سلوكه بعدين ، فتلقاه يحاول ينسي همومه ويهرب من دنيته  لكن بطرق غير أخلاقيه ؛  انه  يشرب خمر  او يزني او يقتل    يبدا يحس بي روحه بعيد علي ربي وانه مستحيل يسامحه ، فيكمل في الطريق الغلط ومش عارف انه ربي رحمته واسعه وابواب التوبه مفتوحه في كل وقت .
علي فكرة كل هالكلام كان علي الصادق
ايه الصادق كان انسان متوزان ناجح عنده عيلته اللي فوق راسه بوه سانده يقرا في قرايته وكل أمور حياته مترتبه ، كان عنده صاحبه وليد رفيق عمره ،كان معاه من الروضه ، كانو متعلقين ببعض بشكل رهيب ، يلعبو مع بعض يطلعو مع بعض وكبرو وخشو نفس التخصص ،جمعاتهم مع بعض ، كنا متعودين علي وجود وليد معانا معتبرينا وكأنه فرد من عيلتنا من قوة الترابط اللي كان بيناتهم واستمرت علاقتهم قويه،  لحد ماجي اليوم اللي كسر الصادق ، وغيرله حياته .
الصادق كان مهووس بي امات بشكل رهيب وديما تسطريب وجو ووليد احرف منه ،في مرة طالعين متزردين الصادق ووليد ومعاهم اشرف صاحبهم ، اشرف قعد شاد في الصادق ينوض يسطرب بي البي ام شويه ، والصادق يقوله فوتها توا وبعدين ساهل واشرف عشش فيه شيء توا تنوض ، ناض ركب في سيارته وهما كانو مقعمزين علي التازير مقابلينه يتفرجو عليه ، والصادق عاد وين تشديه ، ابدي يوري في عضلاته في تسطريب واخر شيء يستعرض وينحي في ايده من الدومان علي اساس انه معلم والاغاني علي حس حسهم  وهكي ، تلفونه قعد يتصل جنبه وهوا مادوراش والرقم يعشش هوا كيف بيرد تلفونه يطيح لا اراديا انزل بيجيبه وصارت فاجعه في هذيكا الثواني ،عفس علي صحابه وقتلهم وقتي ، صدمته كانت كبيرة ، قعد زي المجنون ، افتح الباب وابدي يجري في الخلا ويعيط ، يبكي بعبرته ويجري زي المهبول ، وكأنه هارب من الواقع مش قادر يصدق ، قعد 3 ايام وهوا يدور  ويبكي ، واحني ندورو فيه ، لحد مالقاه بابا ، رفع الصادق لدكتور نفسي علي أمل انه يرجع طبيعي ، علي أمل انه يتعالج ، وطبعا احني طلعنا من المدينه كلها ،  واول ماعرفو الردع انه الصادق رجع للحوش طبوه من مكانه ، وشاف كل طرق التعذيب الممكنه مع انه مكانش ذنبه وكان خطأ ، ونفسيته تعبت وحاول ينتحر كذا مرة ،ونحوه من الانفرادي ،وهوا شبه ميت وحطوه في سجن فيه مجموعه من المجرمين ، وهوا مظلوم وانحسب معاهم مجرم ، قعدو يحاولو يجروه معاهم علي طريقهم لكن الصادق كان ثابت علي رايه ومايبيش يخالطهم ، ويستني في حد يزوره ، وبعد فترة عرفنا احني مكانه ومشتله أمي وخوي التاني ، اسأل علي بوي ، وهادي كانت الشعرة التي كسرت ظهر البعير ، ولصدمه اللي ماقدرش من بعدها يكمل ، بوي قتله خو وليد ، اخدي ثار خوه ببوي ،  الصادق بعد فترة طلعوه من السجن وعاد الدنيا سايبه معاش فاها لاقانون ولا شيء فقدر يطلع بشويه علاقات رباها في السجن ، لكن اطلع انسان تاني ، مافيش في قلبه رحمه ولا شفقه ، انسان ضميره متوفي وقلبه مدفون .
فمافيش حد نحكم عليه بدون مانعرف قصته ، كل انسان وليه ظروفه وليه مسبباته ، مع ذلك الصادق محقوق ، ومتفقين انه تصرفاته غلط ، لكن داخل كل وحش حاجة طيبه حتطلع في الوقت المناسب .
"اخر حاجة قدرت نحس بشعورها هيا الا شعور كأني من كثرة الضرب والصدمات بديت ميته ، شدني الصادق من شعري ويضرب فيا بالكفوف ،واني الدنيا كلها نشبح فاها تلف ، يسأل علي بيعه الحوش ، ومستمر في الضرب ،ام سامي تحز عليا ، وهوا مش شايف شيء قدامه ، يعيط عليا ويضرب .
الصادق شادني من شعري "تتكلمي ياعن فيت اصلك تكلمي ،تي شن بيعك في ام الحوش ياحيوانه ، تي اللما نقتلك ياحقيرة وابدي يفك في السبته من سرواله ، القوة اللي ادجمعت فيا هذيكا اللحظه لاتوصف ،دفيته بغل غلي ، ☝️وربي وربي وحق اللي كان وحيكون ماتفكر تمد ايدك في الجديدونسكتلك ، اني مش جاريه تحتك ولا عبده شاراها بفلوسك ، بدل ماتسأل علي بيعه الحوش اسأل علي أمك اسأل عليا اسأل شن صار فينا اسأل كيف عشنا واحني بروحنا ،مش تغيب شهور واول ماترجع سيبت لحمك ودمك وجاي ادور في رزق الدنيا .
نزلت علي ركابي وابديت نبكي ،ماما ماتت ياصادق ، اميمتي ماااتت ياصادق .
الصادق مسح علي وجها وهوا مخنوق وقعد يتنفس بقوة ، واني نبكي وشهقاتي مسموعه ، الصادق يوخر وهوا مش واعي ، طيحة المزهريه من غير قصد ،خلاته يرجع يفيق للواقع ، وقدم بدون رحمه كركرني من ايدي وام سامي تبكي وتترجي فيه ، تلفتلها وقاللها قولي لسامي يتصل بيا ضروروي، نزلت راسها وقالتله البقيه في حياتك ان شالله ، ان شاالله ربي يرحمه وليدي الغالي  ، الصادق وخر بعدم اتزان ووجها اسود كييف صار كيييف ، جي راجل واول ماوصل بدي يعيط ويقول في كلام مش مفهوم الصادق شده من حوايجة ويقوله تي خير دعوتك تعيط ، شن تبي ،ميل راسه وقعد يشبحلي ،قلتي تبي تطلقي في ستين داهيه لكن تحبسي بوي بقضيه امسخة زيك واللهي ماني ساكتلك ، الصادق عروقه باينات وعيونه شرار وضغط علي رقبه الراجل ، تي شن تخرط ياولد ....... يا........ يا ......واما قضيه اللي . ...... يلعن ....... .
الراجل بالسيف طلعت من كلمه اغتصاب .
خلت الصادق زي المجنون خداني وتلني للسيارة وطلع بسرعه جنونيه ، يعيط ويخبط علي الدومان، درتيني بقروني يابنت ال ....... ، ياحقيرة اقسم بالله اللما انذمك يا ........، اني تلعبي علي اصل اصلي يا......... ، تي اللما نحرقك حرق يا.......... ،ويخبط بجهد جهده علي الدومان واني نبكي نبكي وندعي ربي يتلطف بيا ، كل شيء ماشي ضدي
مشي بيا لطريق مقطوعه واني نتلفت وانعيط مرعوبه ونترجي فيه يردني ، وهوا يسوق بايد والايد التانيه يسكرلي باها ففمي واني نعيط وانازع فيه ، ياناس معاش نبي شيء ، خلوني ارحموني ، إرحمو من في الارض يرحمكم من في السماء 🌺☝️
خلاص تعبت خلوني نعيش بسلام الله يرحمكم ارحموني ...
وقفت السيارة
منطقه مهجورة وفاها استراحة فتح بابي وكركرني من شعري واني لاحول ليا ولاقوة ، انجدوني من ولد بوي وامي ، فتح الباب واني خايفه ونترجي فيه مايخلينيش بروحي ، واللهي نخاف نترجاك ياصادق نبوس رجليك ماتخلينيش بروحي اهني واللهي نخاف ياصادق بالله اعليك ورحمه اميمتك ماتخليني ياصادق بالله اعليك ، شدني بقوة من ايدي ودخلني لدار مظلمه واني نعيط ونبكي ونترجي فيه لوحني بكل برود وسكر عليا الباب بالمفتاح واني نخبط علي الباب ونعيط ، الدار كانت ظلام مانشبح منها في شيء غير في شق صغيرون في السقف طالع منه شعاع صغير من النور،بالكاد اني نشوفه ، نسمع في اصوات ولا مخيلتي المريضه تتخيل فاها، مع الليل نسنع في صوت ذياب وكلاب واني مرعوبه مشي الصادق وخلاني في مكان مهجور ياحليلي وكان يطلع مسكون ، ياربي مالي معين غيرك اعني يارب ،قعدت يومين علي هادي الحاله بلا اكل ولا شرب ، حسيت حيكون مصيري زي نور حنموت بنفس الطريقه ، وكل ماجسمي يضعف معاش نقدر حتي نقيم راسي من الجوع، كان ليل ومايسمع في عياطي الا الحيونات المفترسه .
اما الصادق فعادي كمل سهراته وجوه فستري وبنات وشرب وحبوب وكأنه مافيش حيوانه حابسها في الصحراء ، وطبعا كل مرة يتلاقو في مكان وكل مرة استراحة ،وعنده صحابه جايين من مدينه تانيه ويبو يسهرهم سهرة حلوة قاللهم تم توا نبعتلكم العنوان ونجيبلكم بنت تقيم المشنوق من حبل المشنقه وهما عاد فرحو وماصدقو ، وسبحان الله ربي ادهبله شيرته ، ونسي اخته الملوحه في الاستراحة ،وبعتلهم عنوانها وهوا مايعرفش انه بعتلهم مع العنوان شرفه ولحمه وعرضه ..👌🌹
نسمع في صوت سيارة ، فرحت قلت اكيدة الصادق ابديت نعيط بطول حسي بالله اعليك ياصادق ارحمني ياصاااااادق تربح يرحم والديك ارحمني ، انفتح الباب  الرئيسي ونسمع في صوت رجاله برا وشكلهم سكرانين ، وحي عليك يامريم شن درتي، شورا سمعو عياطي ،حاولو يفتحو الدار ماقدروش ويبدو يخبطو بالقيدومه علي القفل ويقوله تي شكله حابسهالنا في الدار ، وياغبااااااااااارتك يامريم .
الصادق كيف اخدي معاه واحدة من العاهرات وبيمشي للاستراحة وفجأة يتفكر اخته اللي قاعدة غادي ، حط ايده علي جيبه لقي تلفونه مهناش ، عروق وجها بارزات وحشي رجله في السيارة وشد الطريق وعيونه شرار مريييييييييييييييييييييييييييييم ياااااااااربي مستحيييييييييييل .
انتهت الحلقه
نبي تعليقات توقعاتكم شن بيصير
الحلقه الجايه ناررر 🔥🔥🔥🔥🔥🔥