مذكرات عاشقه

الحلقه 19 💋

الحلقه 19
[رائحة الروح 🌺♤]
ونهايه جزئيه رجلي الاول

كنت ليلتها عندي طوارئ في العيادة واضطريت نعطل للساعه 8 والحظ انه جت في الليله اللي اتقررت فاها عمليه أمي ....
تميت خدمتي ونحيت البالطو وكيف جايه منطلع جت حاله إسعاف ، قلبي نخصني ولا إراديا لقيت رجليا رفعوني وراهم لحجرة العمليات ، وجه الحاله مغطي، والدكتور طالع يقول انا لله وانه اليه لراجعون ويهز في راسه ، قربت ونحيت الغطاء  واول ماشفت وجه المريضه ، رجليا انشلو ودخت ، كركروني الممرضات ويبخو عليا في الميه ، واني نعيط وننذب ، ونقوللهم خلوني نمشيلها ، الله لا تربحهم الله ياخد فيهم الحق ، هادي بنتي ، هادي قطعه من روحي ،هادي نور حياتي ، قتلاها هالغدارين ، هادي طفلتي ، حراااااااااااااااااااااااااااااااااام عليكم واللهي حرام ، علاش درتو فاها هكي ، قعدت ساعه واني ننذب ونعيط علي فقدتها ياربي قويني ياااااااااربي ماقدرت ، رجعت نشوف فاها جسمها كلها ازرق من الضرب وفيه حروق في يداها ووجها ،وربي ماهم بشر وربي ،  التقرير الطبي اللي طلع انه لها ايام بدون ماكله ، وفي الاخير وبتقرير الشرطه اكتشفو انه مرت باها   استغلت سفرة راجلها ودارت فاها ماتبي ، حِبستها في دار الخزين وعذبتها وضربتها ووجعتها ، وياصمت صرخ دقيقه 🌺
وياوجع وياحسرة وياكسرتي بفراقها 🌹🌹
اطلعت واني متسندة بالحيط نيين وصلت قدام سيارتي أني كيف منفتح الباب ، تليتني بقوة نيين جبتني لحضنك ، واني نبكي وانت عاصر عليا بقوتك كلها، ااااه اااااه اااااااه تعذبت بلاك اني واللهي اتعذبت معاش قادرة ندس ياسامي ، ماتت نور ياسامي مااتت وإنت كل شويه تطلقني وتشوف لعيوني وترجع تردني تاني لحضنك   ، حسيته ياسامي الحضن الاخير واللهي حسيته ، ااااااااه ياسامي اااااااه ، خديتني معاك في سيارتك وأني نبكي ، ولاسألتك أمتي رجعت ولا كيف عرفتني في العيادة ولا شيء ، كنت نشوفلك ونبي نعبي عيوني منك وبس ، وقفت سيارتك وشديتلي ايدي ورجعت حضنتني بقوة قوتك ، شديتلك وجهك بين ايديا ومتناسيه انك متزوج واني متزوجه وانك خنتني ورخيت بيا وكل شيء ، قتلك خيرك عيونك يبكو ،
وجهك أسود ، ايديك يرعشو خيرك  ، شديتلي ايديا وطلبت نسامحك ، ومنسامحك ياسامي علي شني ولا شني ولا شني مادرت فيا طيب راااك ، قتلي طلعت خاينه ، ماصانتنيش ،مسحت بشرفي الارض ، باعتني واني اللي شريتها وبعت الغالي علي خاطرها ، بعتك إنتي ، بعت الحب اللي في قلبي ، بعت مبادئي ، بعت عهودي ، بعت روحي ، بعتك يانظر هالعين وشريت الرخيص اللي مايسوي ، لقيتها علي فراشي ومخدتي وسريري مقعمزة معاه في وسط حوشي ، عفست علي رجولتي ، عفست علي كرامتي ، مش قادر نستوعب اقسم بالله هانتني بدم بارد ، هانت رجولتي ، هانت عروقي العربيه ،إعتزازي انتمائي هرموناتي الذكريه كله باعاته ...🌺🌺
معقوله تطلع الفاحشه من حوشي ومن مني ؛  من بنت الشيخ اللي علي اساس حافظه كتاب الله وماتنوضش من الصلايه ...
مسح دموعه وأني اللي كنت منهارة مش انت ونخبط علي وجهي وبعبرتي .
اتكيت علي كرسيك وخبطت علي قلبك وقتلي ، ولايوم هالقلب دق لغيرك ، وكل يوم يفوت يحن ويشتاق أكثر وأكثر ، تتفكري يوم عرسي لما كنتي راكبه جنبي في السيارة المزينه ، الطريق كلها وأني نتخيل فيك مرتي ، نتخيل في كل لحظه معاك وزي ماخططنالها مع بعض ،كنت حنكون أسعد حد في الدنيا ، لكن الله لا تسامحهم ولا تسامح اللي كان السبب .
اني رفعت راسي وقتلك كيف قصدك مني اللي كان السبب .
قتلي تعرفت علي مجموعه ولاد جدد ، وبدينا ديما نسهرو في إستراحة واحد من الشباب ، في البدايه يهدرزو مع حبيباتهم قدام الكل عادي ، اني استغربت ، وفيه اللي يفتح في السبيكر ويسمع فينا كلام يغطي الشاطان عليه وجها ،اللي حارقني انهم بنات ناس معروفين ، قصدي نعرف اماليهم كويس ، وكلهم ماشاالله ماعندي مانقول فيهم ، ونقول معقوله يديرو هكي ، تي ياريته الوضع وقف علي هكي وبس ، يجيبو فيهم للاستراحة ويديرو فيهم شن يبو   ويطبقو من تالي لكن مايقربش عذريتها ، وتروح ثمتل دور الشريفه الطاهرة قدام اي حد حيذزوجها ، اني رجل شرقي ☝️ مسلم خادم علي راسي نيين عيان ، مكسر الرشاد بسنوني باش نبني حوش ونوفر كل متطلبات العرس في هالوقت الصاعب مانقبلش نأخد وحدة مهيجة بالحرام نيين عيانه ، مانقدرش نتقبلها حتي هرموناتي الذكريه تنفرها ، وعاداتي وتقاليدي وعقليتي ترفضها رفض تام ، وكيف تبونا نوثقو فيكم وفيه هلبا يشوهو في اخلاقكم وسمعتكم ،كيف تبونا نحبوكم ومانرخوش واحني كل يوم نسمعو بعاهرة طالعه منكم ، بنات بلادي  مانقبلش فيهم حتي حاجة،صدقيني حتي الذكورة الفاسدين متع النسون معاش يتعبو في روحهم ويطلعو لتونس ، شبعو رغباتهم واطفو شهوتهم ببنات بلادهم ، بأخت فلان وبحبيبه فلان وببنت فلان وحتي بمرت فلان ، اني مانحطش في الغلط عليكم بس ، لا الغلط فينا كلنا ، حتي احني ساهمنا ،مانندرو علي بناتنا وين يسوحو ،24 ساعه برا الحوش ،وين تسأليه بنتك وين ولااختك ولا مرتك يقولك  بايته عند صاحبتها ولاجارتها ولا بنت جد عم خالتها ، والله اعلم بالنفوس والنوايا ، إيه مانكذبش عليك يامريم ، عيني اطيح علي اللي لابسه قصير ومكيجة ووووو ، لكن وربي ماتملي هالعين ولا القلب إلا البنت المستورة اللي حياءها هوا اللي يزين جمالها مش الاحمر والاخضر اللي يرصو فيه علي وجوههم بلا حساب ...
مريم اني بعتك لكن دفعت الثمن واني نعترف ☝️انك اشرف بنت شافتها عيني ودموعك أهما أطهر حاجة في الدنيا معاش نبيهم ينزلو ،ديري بالك علي روحك طول العمر ، وتفكري بس انه هالقلب يعشقك يابنت الناس .
اني كنت شادة في ايدك بقوة وحضنتك بكل قوتي ، اني عارفه انه كل الدنيا جت عليا ، واللهي عارفه ، وانكتب عليا ندفع الثمن في
اغلاط ماليا فاها ذنب .....رحمتك بيا ياخالقي 🌺
حطيتني قدام العيادة متع أمي واني مخليا قلبي معاك ،وياريتني قعدت العمر كله في حضنك ، خشيت للعيادة القيت أمي مدخلينها للعمليات من ربع ساعه ، قعمزت نقرا في قرآن وشهقاتي عاليه ، قعمزت جنبي مراة ، حطت ايدها علي رجلي وقالتلي الباين عليك حامله حموول كبيرة برغم صغر سنك ، يابنتي ربي كتبلنا كل شيء من قبل مانجو لهالدنيا ، وقل لن يصيبنا الا ماكتب الله لنا ، هذا قضاء الله يابنتي وربي لما يحب عبد يبتليه ، احمدي ربي وتقبلي عطاياه من خير أوخير اظنيه شر ليك ، لانه ربي ارحم بنا من عباده ، صدقيني ماداما ربي يبتلي فيك يعني بحبك افرحي واحمدي ربك ، وكلماتها كانو مسكن لجروحي ،سبحان الله في ناس يكرهوك حياتك ويخلوك تتمني الموت ، وناس تانيه بدون لامقابل ولا حتي حاجة ينوضو فيك حاجات ويحببوك في الدنيا وفعلا الكلمه الطيبه صدقه 🌺🌺
العمليه استمرت ساعات واني قلبي ينخص فيا بالقوة والدوخه معاش فارقتني ، معاش قادرة نفتح عيوني نحس فيهم ارزينات ، الصورة بدت تشوش ونشوف في الدكتور اطلع لكن مش قادرة انوض ، أعضائي فشلو ، صوتي يطلع بالسيف ي يادكدك ، يادكتور ط طط طمني عل علعل  علي ماما .
واخر حاجة سمعتها قبل مانفقد الوعي انه لله وانا اليه لراجعون 🌺🌺
اااااااه ياسامي كلكم مشيتو كلكم سيبتوني ، اني كنت وحيدة وأنتم عايشين لما بالك توا لما كلكم بديتو تحت التراب ، علاش حتي انت مشيت وسيبتني ، ياريتني لحقت نقولك انحبك ياريت ياسامي واللهي استاحشتك واستاحشت حضنك استاحشت أمي ونور وبابا ،علاش كلكم غادي واني خليتوني في الدنيا بروحي .
نزلت علي قبرك ونشد في التراب ونقيم فيه ونبكي ، ااااه ياحبيبي انت ، حكيتلك كل شيء من وفاتك واني نجي ونحكي ، ياريتك اسمعتني وانت حي ، باهي علاش عرفتك مادامك بتمشي وتخليني ياااااااااااااااااااسامي ، عذبتني بهواك ومشيت .
قمت روحي بالسيف وطلعت من المقبرة ، نسوق وايديا يرعشو ، فات شهر علي وفاتكم واني عايشه بالادويه والتغديه ، صدمتي في موتت امي كوم وصدمتي بالحادث اللي درته ووفاتك كوم تاني ، قداش قلبي بيوسع بس ، قعدت اسبوع من وفاة امي مش قادرة نتكلم ولما شديت روحي شويه صدموني بخبر وفاتك ، بس قداش هالقلب المريض حيتحمل .....
وصلت للحوش وكان المتبرع اللي تبرع لامي واقف ومعاه عمال يطلعو في الاثات ويديرو فيه برا  ،  اني نزلت نجري وبكل بساطه قالي قدرت الظرف اللي مريتي بيه واعطيتك اسبوع بعد وقت التسليم متع الحوش لكن حاليا الحوش لازمني  وانتي دبري وين تمشي ، قتله وهل يجوز ياخوي اتلوحلي بضاعتي في الشارع واني يتيمه مالي معين غير الله ، وهل يصح تخش لحرمه الحوش حتي ولو كان حوشك علي الورق  بدون استئدان وتخلي عمال يلمو دبش وعرض بنت بلادك ويلوحوهالها في الشارع ، قصدي مش لهالدرجة ضميرك ميت ، فوق ماأمي توفت
وماستغلتش الكليه متعك حتي ساعه ، فوق ماتلوحني بدون حتي ماتعطيني تنبيه باش ندور مكان يآويني ، عموما ياداير يالاقي وحسبي الله ونعم الوكيل  ، نادتني ام سامي نحط عندها دبشي ودبش امي وبوي ، والاثات خديت منه الحاجات المهمه والباقي بعته ، ومشيت للمحاميه وبشرتني بطلاقي وبحبس سعيد ، والحق رجع لصحابه ،روحت مناخد دبشي من ام سامي ومندور دار لايجار  ،لكن شدت فيا ام سامي نقعد معاها ، خشيت دوشت وكل تركينه من الحوش نتنفس فاها عطر حبيبي ، قعمزتني قدامها وقعدت تخلصلي في شعري وريحة الطلوق الفايح يهبل ، مدايرة دشيشه علي النار وبراد شاهي اخضر ، تغدينا وجبدتني لحضنها اطبطب عليا نين رقدت ، اااه انتي فاقدة ولدك واني فاقدة الدنيا كلها ، كانت صابرة وراضيه بقضاء الله ، قالتلي وليدي هذا عمره وان شالله ربي يرحمه ، قالت وليدي مات وهوا صغير مرات ربي اختارله الاحسن ومايبيش عذابه ،قلتلها علاش بيتعذب ،
قالتلي وليدي ماقدرش يتحمل اللي دارته العاهرة مرته وقتلها وقتل عشيقها وليلتها دار حادث وتوفي قلتلها ليله وفاة امي قالتلي ايه نفس الليله ، واااااااااااااااااه ياسامي كانت ليلتك الاخيرة واني كنت حاسه انه لقاءنا الاخير الله يرحمك ويسامحك ....🌺🤲
طق الباب بالقوة مشت ام سامي فتحت واني متكيه ، ونرفع عيوني نلقاه الصادق .....  وياغبارتي الحرفه.....  🌺
انتهت الحلقه
الحلقه الجايه حنتعرفو علي شخصيات جديدة في الروايه وحننتقلو لمواضيع أعمق ....
نبي تعليقات ووصف للاحدات يلا حبايبي ماتكسروش بخاطري