دعاء يونس

الفصل العاشر

فى اليوم التالى تتجهز دعاء لحضور الدرس الأسبوعى فى دورة العلم الشرعى
و تخرج من غرفتها لتجد محمود و نيرة جالسين فى الصالة و ينادى عليها محمود قائل : دعاء عاوزك فى موضوع
دعاء : نعم يا بابا
محمود : نيرة كلمتنى فى موضوع السفر و زنت على دماغى كتير ماشى أنا موافق عشان أنا بس واثق فيكى
دعاء بفرحة شكرآ يا بابا و تقبل يده و تخرج دعاء من المنزل و تشعر و كأنها طائرة من السعادة
.....................
فى قاعة الدرس الاسبوعى
تبدأ الدكتورة خديجة محاضرتها
و تقول : موضوعنا النهاردة عن الحدود بين الولاد و البنات
اولآ فى كلمة انتشرت و بتتردد على مواقع التواصل الاجتماعى
الكراش و بقى الموضوع على لسان البنات
اولآ يعنى ايه كراش ؟
هو الشخص اللى انتى معجبة بيه و معجبة بشكله و تقعد البنت تقول عيونه و شعره و مش عارف ايه
انتى مش عارفة ان ده حرام ؟
يا بنات غض البصر فرض على كل المسلمات و المسلمين مش للولاد بس
قال الله تعالى فى سورة النور : قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ .
و تتابع خديجة قائل : و الحرام الأكبر هو جهرك بالمعصية يعنى ميبقاش عدم غض للبصر و كمان تتكلمى عليه مع اصحابك
حياءك يا حفيدة عائشة !
تانى حاجة هتكلم عن الارتباط
بنلاقى بنات بتحصل بينها و بين الولد اللى مرتبطة بيه تجاوزات رهيبة
يعنى ايه ارتباط ؟
ايه المسمى الشرعى للعلاقة يعنى ؟
عاقد عليكى طب جوزك يعنى ؟
الارتباط من غير مسمى ملوش معنى
حتى لو بابا و ماما عارفين مش مبرر
انتى هتخافى من بابا و مش هتخافى من رب بابا و ربك ؟!
حافظوا على نفسكوا يا بنات اغلب العلاقات دى مش بتكمل و لو كملت و وصلت للزواج هتفضلوا شايلين ذنوب الفترة دى لغاية ما تموتوا
تسمع دعاء كلام الدكتورة خديجة و تخجل لتذكرها ما كانت تفعله فى الماضى و تشعر بالضيق و تردد فى نفسها : لا أله الا انت سبحانك انى كنت من الظالمين
و تتابع خديجة : و حاجة مهمة تانية مش عايزة اصدمكوا بس كمان الكلام ده يتطبق على الخطوبة !!!
اه و الله الخطوبة ما هى الا وعد بالزواج و ليس زواج
مينفعش سلام بالأيد و مينفعش كلام بالساعات بالليل على التليفون و غيره كتير
الخطوبة بتكون عبارة عن تعارف بين الشاب و الفتاة يجى يزورها فى بيتها و يتكلم معاها و يتعرف عليها زى ما هو عايز بس غير كده لأ
مفيش خروجات لوحدهم مفيش شات الا لو الاب بيتابع الكلام بينك و بينه كل فترة و التانية
متقولوش تشدد لو فكرتوا دقيقة هتحسوا ان الكلام صح .
اتقين الله يا بنات اغلب و تذكروا الأية الكريمة
وَأَمَّا مَنْ خَافَ مَقَامَ رَبِّهِ وَنَهَى النَّفْسَ عَنِ الْهَوَىٰ فَإِنَّ الْجَنَّةَ هِيَ الْمَأْوَىٰ / ٤٠ و ٤١ النازعات
و حاجة تانية بعيد عن موضوع الخطوبة تنطبق على جميع الحالات
السلام بالأيد حرام
عن عائشة رضي الله عنها : "والله ما مست يد رسول الله صلى الله عليه وسلم يد امرأة قط إلا امرأة يملكها"
ده الرسول صلى الله عليه وسلم ما بالك بينا أحنا ؟
مفيش حاجة اسمها زى بابا زى عمو زى اخويا مفيش الكلام ده
طالما ينفع تتجوزيه و مش محرم عليكى خلاص تطبق عليه جميع احكام غير المحارم .
و اخر حاجة هتكلم عليها النهاردة : السفر بدون محرم
بعض البنات فاكرة ان دى شطارة و بطولة منها انها تسافر لوحدها و واجهت رفض الأهل . و فاكرة كمان ان الاهل لما بيرفضوا بيبقى خوف زايد او تعقيد
مش كده ؟
تنظر دعاء باستغراب و تحاول فهم ما تريد قوله الدكتورة
و تتابع خديجة : بس الحقيقة ان دى فطرتهم السليمة و زى ما احنا عارفين ان الأسلام دين الفطرة
عشان كده الاسلام مؤيد لفطرتهم فعلآ
تسمع الدكتورة همهمات فى القاعة
فتقول مبتسمة : شكلكوا كده كلكم كنتوا هتسافروا اسمعوا كلامى للأخر و احكموا
فى حديث للرسول صلى الله عليه وسلم بيقول فيه : لا يَحِلُّ لامْرَأَةٍ تُؤْمِنُ بِاللَّهِ وَالْيَوْمِ الآخِرِ تُسَافِرُ مَسِيرَةَ يَوْمٍ إِلا مَعَ ذِي مَحْرَمٍ 
هل فى بعد كلام الرسول شئ ؟! لأ يبقى خلاص !
عارفة عن الموضوع صعب عليكوا خاصة اللى كان حلمهم السفر بره لكن افتكروا قول الله تعالى : ( وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْراً أَنْ يَكُونَ لَهُمُ الْخِيَرَةُ مِنْ أَمْرِهِمْ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلالاً مُبِيناً) الأحزاب/36 .
ربنا يحميكوا يا بنات و يزيدكوا عفة و طهارة و نتقابل بأذن الله المحاضرة الجاية الاسبوع المقبل باذن الله
...........
تخرج دعاء من القاعة يتخبط عقلها ماذا ستفعل بسفرها الشهر المقبل ؟ فقد فرحت كثيرآ عندما وافق ابوها و بذلت مجهود عظيم حتى يتقبل سفرها . هل سترفضه بنفسها ؟
ماذا تفعل و قد كان السفر الى تركيا حلمها الاول و الاخير و كانت هذة المنحة سوف تزيد من حصيلتها العلمية ماذا ستفعل ؟
تمشى دعاء و كأن الارض تهتز من تحتها لا تسمع شيئآ سوى ضجيج عقلها
واثناء سيرها بالشارع تسمع اذان المغرب فتدخل المسجد وتصلى المغرب
و بعد صلاة المغرب تجلس فى المسجد لتدعو الله عز و جل ان ينير بصيرتها و تظل تردد لا الا انت سبحانك اني كنت من الظالمين و ثم تنهض دعاء و تأخذ قرارها و ثم تعود الى بيتها
تدخل دعاء البيت لتجد والدتها جالسة تشاهد التلفاز فى الصالة و تقول لها : ماما انا عايزة اكلمك فى موضوع
نيرة : خير يا دعاء
دعاء : ماما انا مش هسافر المنحة
نيرة : ليه انتى اتجننتى يا دعاء . ده انتى بوستى ايد ابوك عشان يوافق
تيجى دلوقتى و ترفضى ؟!
دعاء : بابا كان صح يا ماما . حرام شرعآ ان انا اسافر من غير محرم
نيرة بسخرية : اه قولتى لى حرام . عشان كده
دعاء : انا بتكلم بجد يا ماما و اخذت قرارى خلاص
نيرة : انتى حرة . هبقى اقول لابوكى هيفرح ده كان هيموت و مش عايزك تسافرى
دعاء : تمام يا ماما متشكرة انا داخلة اوضتى عايزة حاجة ؟
نيرة : لا يا بنتى شكرآ
تمشى دعاء لغرفتها
فتحدث نيرة نفسها بصوت عالى :
عين و الله . عين و صابتك يا دعاء
حالك وقف تلاقيها جارتنا حسدتك
ربنا يصلح حالك يا بنتى
...........
تدخل دعاء غرفتها و تتصل بعمها احمد ليرد عليها
احمد : السلام عليكم يا دعاء. ازيك
دعاء : الحمد لله . انت عرفت ان انا هسافر منحة تركيا ؟
أحمد : آه
دعاء : طيب عمو انا كنت هقولك حاجة و اعتقد هتفرحك
احمد : خير شوقتينى !
دعاء : انا مش هسافر تركيا . انا عرفت انه حرام اسافر من غير محرم
احمد : ربنا يهديكى يا دعاء و يزيدك ايمان كنت عاوز افاتحك فى الموضوع ده و مكنتش عارف اقوله لك ازاى خاصة ان انا عارف انك كنت عاوزة تسافرى اوى
خليكى فاكرة من ترك شيئآ لله عوضه عنه خيرآ كثيرآ .
تنهى دعاء المكالمة و تكرر من ترك شيئآ لله عوضه عنه خيرآ كثيرإ .
يأتى الليل و تذهب دعاء للنوم و كالعادة تمسك بهاتفها قبل النوم
و لكن تحدثها نفسها ان ترى اخر اخبار يونس اولسوى فقد اشتاقت له !!! فلم تمر فترة كهذة لم ترى فيها صوره و اخباره
دعاء محدثة نفسها : لا لا مش هرجع اشوف اخباره عشان مرجعش للطريق ده تانى و اسمع اغانيه و اتفرج على مسلسلاته و الكلام ده
لا لا .
بس هو انا ليه وحشنى كده ؟ اشمعنى هو ؟ انا كنت بتابع ممثلين و ممثلات كتير غيره
ليه مفكرتش اشوف اخر اخبارهم هم كمان ؟
اشمعنى هو ؟
طب خلاص انا هشوف صوره الجديد و اطمن عليه بس . مش هسمع اغانيه او لا اى حاجة تانية
تكتب دعاء اسمه على محرك البحث و ترى احدث صوره و يخفق قلبها لرؤيته بعد تلك الفترة
و تكتشف فوزه بجائزة افضل ممثل فى المهرجان التركى الذى يقام سنويآ
تقفز دعاء من على سريرها فرحآ و لا تصدق نفسها و لكن سرعان ان تتذكر ان ما كان يجب ان تفعل ذلك و تخجل من نفسها
تغلق دعاء التليفون و تنام و هى تشعر بالندم عما فعلته
فى صباح اليوم التالى
تخرج دعاء من الشقة و تحدث نفسها
انا كان لازم اشغل نفسى بحاجة عشان مرجعش تانى للطريق ده
جويرية اكيد هتساعدنى
تطرق دعاء باب بيت عمها و تفتح لها جويرية
جويرية : السلام عليكم يا دعاء. اخبارك ايه ؟ اتفضلى
دعاء : الحمد لله . تدخل دعاء و تجلس فى الصالون و تقول لزوجة عمها
جويرية انا عايزة اشغل نفسى بحاجة عشان مرجعش للافلام و المسلسلات ممكن تساعدينى ؟
جويرية : اكيد بأذن الله . دعاء أنتى حافظة قد أيه من القرآن ؟
دعاء : مش حافظة غير الفاتحة و السور الصغيرة
تبتسم جويرية ابتسامة خفيفة و تقول: اسمها قصار السور و بعدين خلاص احفظى قرآن
الَّذِي يَقْرَأُ القُرْآنَ وَهُو ماهِرٌ بِهِ معَ السَّفَرةِ الكِرَامِ البَرَرَةِ
دعاء : بس مش هيبقى صعب ؟
جويرية : لا أبدآ استعينى بالله و ابدأى