Unicode
ကိုကြီးအေသီယံသရုပ်ဆောင်တာ ကြည့်လိုက်၊
ဇာတ်ညွှန်းကို ဖတ်လိုက် လုပ်နေရင်း
ညနေတောင် စောင်းလာလေပြီ။
ဇာတ်ညွှန်းကို ဖတ်နေရင်း၊
သဲဦးတွေးမိသည်က သဲဦးအခန်းထဲက
ဝိညာဉ် ကောင်လေးအကြောင်းပင်...။
ခုချိန်ထိ သူ ဘယ်သူလဲ ဆိုတာ သဲဦး
မသိသေးသလို၊ စွမ်းနောင်ခန့်နဲ့
ဘယ်လိုပက်သက် နေလဲ ဆိုတာကိုပါ
မသိရသေး။
ဘာဆိုဘာမှ ထပ်မသိရတာကြောင့်
သူ့အဖြစ်မှန်တွေကို ရှာပေးဖို့က အလှမ်းဝေးသည်။
"သဲ.. ထမင်းစားရအောင်...."
ကိုကြီး အေသီယံလာခေါ်တော့မှ
အတွေးစပြတ်သွားကာ.. သူ့နောက်လိုက်ခဲ့လိုက်သည်။
ဟိုတယ်၏ အပေါ်ဆုံးထပ်
စားသောက်ခန်းတွင် အတော်များများ
ရောက်နေကြပြီ ဖြစ်သည်။
ကိုကြီးအေသီယံက သဲဦးကို အသေးစိတ်က
အစ လိုက်ဂရုစိုက်ပေးလိုက်ပုံက၊
လူကြားထဲ ဂုဏ်ယူမိသလိုတောင် ဖြစ်မိသည်။
သဲဦးထိုင်ရမည့် ခုံကို ဆွဲပေးသည်။
အရိပ်တကြည့်ကြည့်နှင့် သဲဦး
ကြိုက်တတ်သည့် ဟင်းတွေ ထည့်ပေးသည်။
ရေသောက်ချင်တယ် ပြောတာတောင်
သူကိုယ်တိုင် ဝုန်းခနဲထကာ ယူပေးသည်။
သဲဦးလည်း မျက်နှာကြီး ပြုံးဖြီးကာ
အပျော်လွန်နေရသည်။
ဖြစ်နိုင်လျှင် သူ့နားမှာသာ တစ်သက်လုံး
ကပ်တွယ်နေချင်တော့သည်။
..........
သဲဦးတို့ စားသောက်ပြီးသွားကြချိန်၊
မမယုယက လူလိုက်စုကာ၊ ဒုတိယထပ်၊
သူမတို့ အိမ်သည့် အခန်းတွင်
ဂိမ်းဆော့ရအောင်ဟု ဆွယ်သည်။
လူလိုက်စုနေစဉ်၊ သဲဦးလက်ကိုလည်း
မလွှတ်တမ်း ဆွဲထားတာကြောင့် ၊
သူမနောက်သို့ သဲဦးက တစ်ကောက်ကောက်
ပါနေရသည်။
ကိုကြီးအေသီယံနှင့် ကိုဟန်ထွယ်ကလည်း
အနောက်မှ လိုက်လာသည်။
သဲဦးတို့ လေးယောက်အပြင်၊ နောက်ထပ်
သရုပ်ဆောင်တစ်ယောက်နှင့်၊ သဲဦးမသိသော
အကိုကြီး နှစ်ယောက်ပါ ကစားဝိုင်းထဲ ပါသည်။
အခန်းထဲရောက်တော့၊
ကုတင်ဘေး ကြမ်းပြင်တွင်
လူဆယ်ယောက်လောက် အေးအေး
ဝိုင်းထိုင်လို့ရသော နေရာလွတ်ရှိသည်။
