Unicode
"သဲဦးခန့်ရေ.. ရောက်ပြီ ..ထတော့..သားလေး..."
သဲဦး အိပ်မောကျနေတာကြောင့်
ကားရပ်သွားတာတောင် မသိလိုက်။
မေကြီးက ပုခုံးကို လာလှုပ်နှိုးမှ မျက်လုံး
ဖွင့်ကြည့်တော့၊ သဲဦး ရောက်နေတာ
စိမ်းစိုနေသော ခြံဝင်း တစ်ခု အတွင်းသို့။
ကားပေါ်မှ ဆင်းဆင်းခြင်း.၊ ၁၀နာရီ နီးပါး
ကားစီးလာရတဲ့ ခရီးဖြစ်တာကြောင့်
အငြောင်းအငြာ အရင်ဆန့်ရသည်။
နေရမည့် အိမ်ကို မော့ကြည့်တော့၊
အရင်အင်္ဂလိပ်ခေတ်က ဆောက်ခဲ့သည့်
အုတ်နီနီ နှစ်ထပ် အဆောက်အဦးကြီးတစ်ခုကို
တွေ့လိုက်ရလေသည်။ အဆောက်အဦးက
သိပ်ကို ကြီးမားလွန်းနေကာ ၊ ဟိုတယ်တစ်ခု
စာလောက်ပင် ရှိသည်ဟု ခံစားရသည်။
သဲဦး၏ ဖခင်က ရဲဝန်ထမ်းဟောင်း
တစ်ယောက်ဖြစ်သည်။
ကျန်းမာရေး မကောင်းတာကြောင့် လွန်ခဲ့တဲ့
တစ်နှစ်ကမှ ဆေးပင်စင် ယူထားရသလို၊
မိခင်ဖြစ်သူကတော့ လက်ရှိ
ဆောက်လုပ်ရေးလုပ်ငန်းတစ်ခုကို
ဦးစီး လုပ်ကိုင်လျှက်ရှိသည်။
ယခု ပြောင်းလာရသည့်အိမ်က ၊
တောင်ပေါ်မြို့လေး တစ်မြို့တွင် တည်ရှိနေပြီး၊
ပြောင်းလာရခြင်းကလည်း
မိခင်ဖြစ်သူ၏ အလုပ်ကြောင့်ပင်ဖြစ်သည်။
သဲဦးအတွက်တော့ နေရာသစ်ကို
ပြောင်းရွေ့ရခြင်းက သိပ်ထူးဆန်းသည့်
ကိစ္စတော့ မဟုတ်တော့ပေ။
ဖေကြီးက အစိုးရ ဝန်ထမ်းတစ်ယောက်
ဖြစ်နေတာကြောင့်၊ ငယ်ငယ်တည်းက
ခုချိန်ထိ၊ ဟိုပြောင်း ဒီပြောင်းနှင့် နေရာ
အတိအကျရယ်လို့ မနေခဲ့ရ။
ထို့ကြောင့် သူငယ်ချင်းမိတ်ဆွေဆိုတာလဲ၊
ကြာကြာ မပေါင်းရပဲ၊ ရင်းနှီးပြီဆိုတာနဲ့ ခွဲခဲ့ရ
သည်ချည်းသာ။
သဲဦးတစ်ယောက် လက်ထဲတွင် neck pillow
ပန်းရောင်လေးကို ပိုက်ရင်း အိမ်ထဲ
မဝင်ဖြစ်သေးပဲ တစ်ယောက်ထဲ
ကြောင်တောင်တောင် ရပ်နေမိသည်။
ဒီအိမ်မှာ ကြိုတင်စောင့်နေတဲ့ အလုပ်သမား
တစ်ချို့က ကားပေါ်မှ ပစ္စည်းများကို ချပေးနေပြီး၊
မေကြီးက စီမံနေသည်။
"သားလေး... အထဲဝင်ထိုင်နေလေ....."
မိုးတိုးမတ်တပ်ဖြစ်နေသော သဲဦးအား
မေကြီးက လှမ်းပြောလိုက်တော့မှ၊
ခေါင်းညိတ်လိုက်ကာ.. အိမ်ထဲသို့
ဝင်ခဲ့လိုက်သည်။ ဝင်ဝင်ခြင်း ဧည့်ခန်းတွင်
ကျွန်းကုလားထိုင်ကြီးများက စီးကြိုနေပြီး၊
နောက်တွင်တော့ အပေါ်ထပ်ကို တက်သည့်
လှေကားအမြင့်ကြီး တစ်ခု ရှိနေလေသည်။
တစ်နေ့ တစ်နေ့ ထိုလှေကား
တက်ရတာနှင့် အသက်ထွက်နိုင်သည့်
အနေအထားတွင်ရှိသည်။
ဒီအိမ်ကြီးက သားအမိ သုံးယောက်ထဲ
နေဖို့အတွက် အရမ်းကို ကြီးမားလွန်းသည်ဟု
သဲဦး ခံစားရသည်။
