Unicode
"ငါ သဲဦးကို လင်းနဲ့ ပက်သက်တဲ့
အဖြစ်မှန်တွေသေချာပြောပြပြီးသွားပြီ၊
ဒါပေမယ့် သူက လင်းသေဆုံးရတဲ့
အကြောင်းအရင်းကို သိချင်နေတုန်းပဲ.....၊
အဲ့တော့ ကြံမိတာ တစ်ခုပဲ ရှိတယ်၊
လင်းရဲ့ ဝိညာဉ်ကို ဖယ်ရှားပြစ်ရမယ်.."
ဟန်ထွယ်၏ စကားတွေကြောင့်
အေသီယံ ခေါင်းတို့ နောက်ကျိ ရှုပ်ထွေးလာသည်။
ဘာမှ ပြန်မပြောမိတာကြောင့်
ဟန်ထွယ်က အေသီယံကို စိတ်မရှည်သည့်
ဟန်ဖြင့် ကြည့်လာကာ..
"မင်းမလုပ်ချင်ရင် ငါလုပ်မယ်.....၊
ငါ စုံစမ်းပြီးသွားပြီ..."
"ဘာစုံစမ်းပြီးတာလဲ..?"
"ဝိညာဉ်အကြောင်း နားလည်တဲ့လူကို...."
ဟန်ထွယ့်စကားကြောင့် အေသီယံ
မျက်မှောင်ကြုတ်မိစဉ်......
"ငါ့ကို အဲ့လို လာကြည့်မနေနဲ့....၊
အဲ့ဒီလူက ဝိညာဉ်ရှိတဲ့ နေရာကို
ကိုယ်တိုင်လိုက်ကြည့်မှ ဖြစ်မှာတဲ့....၊
သဲဦးအခန်းထဲ ငါတို့တွေ ဝင်လို့ရအောင်
ကြံတော့...."
အေသီယံ သက်ပြင်းချမိသည်။
ဘာတွေ ဘယ်လိုဖြစ်လာနေလဲ
နားမလည်တော့.....။
ဘာလို့များ အတိတ်က အဖြစ်အပျက်တွေက
မယုံနိုင်စရာကောင်းလောက်အောင်
သိပ်ချစ်ရတဲ့ သဲဦးအပေါ်
လာသက်ရောက်နေရသနည်း။
ထိုသို့ ဖြစ်မှာစိုးလို့၊ ကာကွယ်နေခဲ့တဲ့
ကြားထဲက။ ဘာလို့များကံကြမ္မာက
ထပ်ပြီး ရက်စက်စေခဲ့တာလည်း။
သို့သော် ဘယ်လိုတွေဖြစ်နေပါစေ၊
မိမိ၏ တစ်ခုထဲသော ဆန္ဒက
သဲဦး မနာကျင်ရစေဖို့သာ....။
............
ဟန်ထွယ် အကြံပေးသည့် ကိစ္စကို
အေသီယံ အယုံအကြည်မရှိသော်ငြားလည်း၊
လုပ်လိုက်တာက အကျိုးမယုတ်ဟု
ယူဆသည်။ ထို့ကြောင့် သူခေါ်ပေးသော
လူအား ၊ သဲဦးတို့အိမ်ရှိရာသို့
ခေါ်လာဖြစ်လေသည်။
သဲဦးရော၊ သဲဦး အမေပါ မရှိသည့်
အချိန်ကို ရွေးလာခဲ့တာဖြစ်သည်။
သဲဦးအခန်းအတွက် သဲဦး ကြိုက်တတ်တဲ့
ပန်းရောင် နံရံကပ်Wallpaper လေးတွေ
Surprise တပ်ပေးချင်သည်ဟူ၍
သဲဦးအဖေ ဦးဗညားကို တောင်းဆိုမိသည်။
ဦးဗညားကလည်း အသာတကြည်ပင်
ခွင့်ပြုပေးလေသည်။
