Unicode
"မြို့ပြင်ကို ပြန်ထွက်တဲ့ လမ်းဘေး၊
တောင်အောက်မှာ အလောင်း တစ်လောင်း
တွေ့တယ်...လို့ ပြောတယ်..."
ဦးဗညားခန့် ပြောလိုက်သော စကားကြောင့်
လင်းညှို့လင်္ကာ၏ မျက်လုံးတို့ ပြာဝေသွားရသည်။
"ဦးတို့ အတည်ပြုဖို့ လိုမယ်.. "
လင်းညှို့ခေါင်းကိုညိတ်ကာ
ကားပေါ်တက်လိုက်သည်။
"ကေသွယ် မဟုတ်ပါစေနဲ့..."
ဟု အကြိမ်ကြိမ်ဆုတောင်းရင်း
ရင်ထဲတွင် ပူလောင်နေရသည်။
"အေသီယံ...၊ သားမလိုက်ရင် မလိုက်နဲ့တော့..၊
မီဒီယာ အချို့လည်း ရောက်နေတာဆိုတော့
သားနာမည် ပါလာရင် မကောင်းဘူး..."
ဦးဗညားခန့်က ကားပေါ်တက်ခါနီး
အေသီယံအား မလိုက်ရန် ပြောသည်။
"ဟုတ်ကဲ့...၊ ကျွန်တော်သဲဦးနားမှာ
သွားနေပေးလိုက်မယ်.."
ဦးဗညားခန့်တို့ ထွက်သွားတော့
အေသီယံလည်း သဲဦးထံသို့
မောင်းနှင်ခဲ့လိုက်သည်။
အခြေအနေတွေက ရှုပ်ထွေးကာနေသည်။
တောင်အောက်က အလောင်းကသာ
မကေသွယ်စုဆိုတာ မှန်နေပါလျှင်၊
အင်မတန်မှ သွေးပျက် ခြောက်ခြားဖွယ်ရာပင်။
...............
ကိုကြီးဟိန်းညှို့ဆီမှ ဖုန်းတွေ အဆက်မပြတ်
လာနေသည်ကို မင်းညှို့ ကိုင်ဖို့တောင် အားမရှိ။
ခုနလေးတင်ကမှ ကြားလိုက်ရသည့်
သတင်းဆိုးကြောင့် ရင်ဘတ်တစ်ခုလုံး
ဆို့နင့်ကာနေသည်။
မကေသွယ်စုဟာ သေဆုံးသွားခဲ့ပြီ။
မတော်တဆသေဆုံးခြင်းမျိုး မဟုတ်ပဲ၊
အသတ်ခံခဲ့ရခြင်းဖြစ်သည် ။
တောင်အောက်မှာ ရှာတွေ့ခဲ့တဲ့
အလောင်းဟာ ရက်ရက်စက်စက်
ဒဏ်ရာပေါင်း မြောက်များစွာ
ထင်ကျန်ရစ်ခဲ့သည်။
လွန်ခဲ့တဲ့ တစ်လကမှ ကလေးလေး
ရှိနေပြီဆိုပြီးအပျော်ကြီးပျော်နေခဲ့တဲ့
မမစုရဲ့မျက်နှာကို ပြေးမြင်ပြီး သနားလွန်းလို့
မျက်ရည်တွေ ကျလာမိသည်။
သူမ ဘယ်လောက်တောင်
ကြောက်နေလိုက်မလဲ..?။
ကိုကြီးလင်းညှို့ရောအဆင်ပြေပါ့မလား.။
သူဟာ သူချစ်တာကို ထုတ်မပြတတ်ပေမယ့်၊
မကေသွယ်စုကို ဘယ်လောက်ချစ်တယ်ဆိုတာ
မင်းညှို့ ကောင်းစွာ နားလည်သည်။
