الناس اللى مش عاجبها علاقه مراد و غرام و بتقول انتى كده بتعلمى البنات الغلط و انهم يخرجوا من ورا اهلهم ..
لحظه بس ...
و هو انتوا كل حاجه بتقروها صح ؟؟
لو جيبتلكم وضع مثالى بشخصيات مثاليه يبقا فين الفكره ؟ فين الهدف اللى عايزه اوصلهولك ؟
انا جيبتلكم اوضاع كتير غلط على مختلف شخصيات الروايه و كل غلط بوريكوا مع الاحداث نتيجته ايه ؟
يعنى هو.صح رحاب تهرب من اهلها ؟ صح مهاب يبقا بعيد عن بنته كده ؟ صح من الاول مراد يصاحب حد زى عاصم ؟ صح انه يرتبط ب همسه قبل ما يخرج و يخرّجها برا دايرة الماضى ؟ صح يقف قصد اهله و ياخد خطوه جوازه من وراهم ؟؟
كل ده مكنش صح من الاول ...زى ما هو مش صح انك.تقرى حياه ورديه و شخصيات مثاليه و بدون غلطات و الاخر تحصلهم مصايب .. ساعتها غصب عنك هتحسى بظلم قضاء ربنا ..
الكاتب الصح هو اللى يعرضلك افكار غلط و يجيبلك نتايجها ايه و الحاجات اللى اترتبت عليها و ف نفس الاحداث يدرجلك الفكره الصح بنتيجتها ف الاخر بعد ما يكون جاب نتيجة الغلط و عالجه .. او يجيبلك الصح ف المقابل مع شخصية تانيه جوه الروايه بحيث تعرفى تقارنى و تطلعى بحاجه تفيدك ...انك لو.عملتى ده هيحصل ده و لو عملتى ده هيحصل ده ..
اه بالمناسبه كنت هوضحها ف بوست تانى بس بالمناسبه بقا ...
انا جيبت ف الجزء الاول صداقة مراد و.عاصم .. و اختيار مراد الغلط لصاحبه و جيبتلك نتيجته ..
و رجعت ف التانى جيبتلك صداقة مارد مع مصطفى و جيبتلك نتايج صداقتهم و وقفتهم جنب بعض ..
حتى مراد اللى جيبته اختار الصاحب غلط ف الاول جيبتهولك ف التانى و اختياراته و الصداقه اللى بينه و بين مهاب و.جيبتلك نتايج ده و وقفتهم مع بعض العمر ده كله ..
هل معنى كده كنت ف الاول بشجعك تختارى غلط .؟
و لا كنت بعرضلك فكره و ارسملك وضعين الصح و الغلط و اسيب عقلك يقارن و يوجّهك ؟؟
حتى ف الحب جيبتلك تسرّع مراد ف الاول .. و سرعة ارتباطه ب همسه و.جيبتلك نتيجة ده و التمن اللى دفعه ..
و.رجعت ف التانى جيبتلك تأنى مارد ف اختياره لحد ما اختار واحده تعشقه و واثقه لابعد حد فيه و.هتقف جنبه للنهايه ..
عشان اوصلك فكرة ان التسرع ف القرارات المصيريه غلط ..
ارجعى اقرى مقدمة الروايه ع الالبوم بتاع الاول هتلاقينى قولت ان الاختيار الغلط و القرارات السريعه ساعات بيبقا تمنها غالى .. غالى قوى .. اكبر من انه يندفع !!
اه بالمناسبه ابقى قولوا رأيكم ف صداقه مهاب و.مراد .. او.مارد و مصطفى ..
