أن تقتلوا طائراً بريئاً (باللهجة العراقية)

part 7

بعد يومين صبحت بالمستشفى

فيروز : سالي شلون صرتي

سالي: ما أدري بس شجابني هنا شبيه اني

فيروز : اووف يا حبيبتي يمكن كلبج يعلم سرمد دخل مستشفى و لحكتيه

سالي(بصدمه): شنووو سرمد بالمستشفى ؟
شبيه هااا شبيه

فيروز : لج اهدأي ماكو شي

سالي : جذاااابه كوليلي شبيه سرمد الله عليج حبااابه

و كمت اشهك اختنكت حسيت كلبي رح يوكف و جسمي يرجف

فيروز : سالي ساااالي فدوة شبيييج
دكتوووور دكتوووور

التمت العائله و صارت هوسه

أم سالي(تصيح و تبجي) : فيروز شبيهااا

فيروز: والله عمه ما أعرف بس جنا نحجي

دكتور: ماكو شي لا تخافون ضربتها مهدأ و ممنوع اي ضغط او توتر يصيبها

أم سالي: ماشي دكتور

اجت ماما حطت راسها ع راسي

سالي: ماما اني ليش بالمستشفى و يمتا دخلت

أم سالي: كعدت الصبح لكيت حرارتج صاعدة و خشمج ينزف و مغمي عليج شكينا عندج نزيف
الدكتور كال من البجي او مخنوكه من شي
اووف يا يمه ليش شبيج أول تالي تضعفين و تدخلين مستشفى خسرت ابوج ما اكدر اخسرج يا عمري إنتي

كامت تبجي و نزلت دموعها ع وجهي
و اني بالي يم سرمد لسه ما أعرف شبيه و ما أكدر احجي كدام أمي أخاف تشك بشي

سالي: ماما لا تخافين ما بيه شي اريد فيروز وينها

أم سالي: ي خطيه هواي خافت عليج هسه اصيحها هي كاعدة ويه حلا هم اجتي تريد تشوفج
هسه راح اروح للدوام هواي تغيبت خاف يفصلوني بس احمد و فيروز يمج و اني العصر اجيج حبيبتي

سالي: ماشي ماما براحتج

⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩⁦▪️⁩

جانت غرفتي بيها سريرين و سريري بصف الشباك فلمحت فيروز و أحمد واكفين يسولفون

فيروز: شوف أحمد ممنوع تكول لسالي إنو سرمد بالمستشفى لأن قبل شوي جفصت و حالتها تخربطت

أحمد : ماشي ما اكول

فيروز:هسه هو شلون صار

أحمد : والله لسه بغيبوبة و نزف داخلي برأسه

فيروز : اوووف معقوله هيج نخسر إثنين سرمد و سالي و جماله نفس الوقت دخلوا مستشفى

أحمد :لا إسم الله سالي كعدت الحمدلله و سرمد يم رحمه ربج بقت