أن تقتلوا طائراً بريئاً (باللهجة العراقية)

النهاية

بعد كل الأحداث إلي مريت بيها شوي شوي بديت اوكف على حيلي و أكون أقوى مما سبق

و ابد ما دخل كلبي شخص و لا تمنيت أحد أحس نفسي اكتفيت من الحب و العلاقات و تعلمت من تجاربي و اخطائي هواي دروس و عبر

بعد فترة فتحت الفيس صارلي هواي ما فاتحته لكيت طلب مراسلة

💬سالي هاي انتي مراسلتني و حاضرتني من شوكت مراسله ما شفتها والله لأن حاذف الفيس

بعدين تذكرت ايي اني دازه رسالة لمحمد و حضرته معقولة هو هذا نفسه

💬سالي:منو أنت

💬محمد:اني محمد إنتي سالي مو ؟

💬سالي:اها أهلا وسهلا اي اني سالي

💬محمد:لج وينج وين هالغطة ليش هيج عفتيني

💬 سالي:تعذرني والله ظروف و مشاكل

💬محمد:خيرج أن شاء الله

💬سالي: أنسى سولفلي عنك شلونك أخبارك وين ما وين

💬محمد:ماكو شي جديد من بعدج صدك مبروك ع المعدل

💬سالي:تسلملي الله يبارك بيك و أنت شطلعت يا مرحلة هسه

💬محمد:مرحلة ثانية هندسة مدني ببغداد

💬سالي:ها بالخير كولش حلو بس أنت أكبر مني بخمس سنين المفروض تكون بمرحلة أعلى

💬محمد:مو عدت السادس أكثر من مرة

💬سالي:يااا ليش

💬محمد:هاي بعد جنت ضايج انتي عفتيني و السنه الثانيه جدي توفى و ظروف وووو يمعودة خليني ناسي

💬سالي:طيب عيني ،، صدك تذكرت أنت شنو علاقتك بابن عمي أحمد شفتك معلق ع المنشور مالتي من سويتله إشارة

💬محمد:شنو أحمد إبن عمج لعد ليش يكول اني جيرانها من سألت عنكم

💬سالي:ما أدري والله بعدين شنو جابني ببالك و سألته عني

💬محمد:والله تذكرين من جنتي تراسليني من فيس اخوج ؟ و وراها اختفيتي اني تذكرتج فدخلت ع الفيس و شفت أحمد صديق مشترك فكولت أروح أسأل

💬سالي:معقولة ما نسيتني

💬محمد:حبيتج من كلبي و ردتج ولف الي تمنيتج بروحي و كل جوارحي بس أنتي بالتالي عفتي و شمرتي كل حبي

💬سالي:ما اصدك هالكد حبيتني و أنت حتى ما شايفني

💬محمد:مو مهم اشوفج اني التمست روحج و برائتج عفويتج و ضحكتج العالية الي تفزز الطفل النايم الي مستحيل أنساها و خاصتا دلعج و مياعتج بالكلام يبوووو أموت عليه شلون تردين انساج

💬سالي: .....

💬محمد:وينج متحجين ليش ساكته

💬سالي:ما أعرف معقولة أكو إنسان هالكد حبني و اني ما حسيت بيه اني اسفه مو ألك اسفه لنفسي الي ضيعتك