سجينة النهوى

٣

#سجينة_النهوة
بقلم ميمي
الجزء الثالث

تقرب مني شوية وكال وهو مخنزر عيونه ومركز بيه بنظرات قوية
_ حلللل بيج لسانج متر ..

فتحت عيوني اباوعله مصدومة انفرجت شفايفي اريد انطق حس بيه اريد احجي ارادد والاسن
كال هصصص ولا كلمة وراح من يمي وبعده يمشي ويتلفتلي ويخزر واندار وراح ..

هزيت ايدي وغميته تالي حسيت على روحي وظليت انلفت يمنى ويسرى خاف لايشوفني احد واتذكر كلام امي يمه عيب تصرفي عدل ..
همزين محد مجان موجود خليت ودخلت جوة

وصبوا الاكل .. تعشينه وبدأ الدك والركص الزلم برة والبنات جوة .. دخت وراسي صدع رجعت للغرفة كعدت بالكاع ثنيت رجليه وارتكيت ع الحايط طلعت تليفوني وظليت اراسل صديقتي ..
كتبتلي شوكت ترجعون ..
كتبت والله ما ادري خلي نشوف بابا شوكت يرجعنه ..
ولج كومة امتحانات هذا الاسبوع وكلهن حيفوتنج منو يكول المدرسات يعيدو الج الامتحان ..
مو اخذت اجازة اني بعد شنو مايعيدوا الي هنه بكيفهن ..
بعد ظلت يمهن .. اكولج مشمش ولج شفت الولد الي جان يوكف براس الفرع ويباوع عليج من شافني ظل يدور عبالك مضيع شي ..
اووي حبيب القلب خطية جرحت مشاعره ببعدي عنه ..
والله مصدك نفسه هذا لو يدري بيج شكد تحجين عليه وتصنفين جان ولا باوع بوجهج بعد ..
اكولج ليش ماتكسبين بي اجر وثواب وتكبلين ويا بدل مني ..

كتبت اييييع راسه جنه صماخ عتوي ووجهه جنه دعسوقة مطرزة ..

ضحكت... رفعت راسي ليفوك وطكيتها ضحكة عالية كلش .. نزلت راسي للمنتصف واشوف علي واكف بنص الهول ويباوع عليه مركز وصافن واني ممنتبهة عليه جنت مدنكة . ..

صدمني بوكفته هاي رفعت تك حاجب وكمت ع حيلي وادردم عليه بقلبي هسه شعنده يباوعلي هففف ..
لزمت الباب واني اسده بهدوء واباوعله حد ما اختفى وصار ورة الباب ..

لشوية حسيت الباب انفتحت بعصبية حتى قبل ما ارجع لمكاني

خلسني خلس بنظراته جان يكول بنبرة سريعة وعصبية ليش تسدين الباب بوجهي ..
كتله ببراءة مماسديته بس ردت شوية خصوصية ..
خصوصية ياقليلة الادب!!
احترم نفسك
رفع اصبعه بتهديد ديري بالج تعيديهه
تخصرت شنو مشكلتك وياي بلا زحمة ؟
حسني اخلاقج متشوفين مشاكل
لا بلله واذا ماحسنتها بلله ؟
يعني تعترفين اخلاقج صفر ؟
احترم نفسك اخر مرة اكولك احنا خطار يومين ورايحين منا .....
اجه مسج لتليفوني واصدر صوت ...
جان يخمطه من ايدي وكال شعندج اخذه وراح مناك
ظليت اركض وراه واصيح ماإلك حق تاخذه وتتطلع على خصوصياتي جيبة رجاءاا ..

ظل يقرا المحادثة مالتي ويا صديقتي واني احاول اخذ فوني منه اخر شي كمل ورفع راسه كال
مبين عمي ممربيج عدل ..
اخذته منه بسرعة واني مخنزرة ومعصبة ..
شتقصد هااا شتقصد ترة نشاقة اني وصديقتي بيناتنا ..
معقولة بررت اله ؟؟ وهو شنو حتى ابرر اله خلي يولي طوز .. رجعت صوبت نظراتي الغاضبة عليه
كتله اذا اني ممرباية عدل انت فد واحد حشري تحشر روحك بسوالف البنات بالاضافة الى هذا انت واحد زاحف .. حجيت جملتي الاخيرة واني اركض اطلع من الغرفة منهزمة منه ومن نظراته المخيفة ومن ردة فعله ..