سجينة النهوة
الفصل ٤
علي .. خابرت عمامي كلهم ووصيتهم ننجمع بيت عمي ابو محمد .. بلغت امي وابوي وحامد ودزيت على خواتي ..
امي البوز شبر وللساعة ٢ ونص وهيه لازمة استكان الجاي وكاعدة بالمطبخ حاطة رجل على رجل وتسفت بالجاي شوي شوي عبالك تشرب عرك..
يمه يلله دخيلج
عوجت حلكها ودارت وجهه
كالت لاحكين لاحكين على مشيعرة ام عطوب ..
ضحكت كتلها بداعتي مو تخبل جنهه غزالة ؟
قصدك جنهه حمار وحشي لا والله ظلمته للحمار الوحشي..
ضحكت كتلها لايمه حرام عليج
ها من هسه ماتقبل عليها وتفضلها عليه ؟
لالا انتي الاصل اخذت ايدهه بوستها
كتلها يلله يمه تأخرنه عيب من عمامي كتلهم ساعة ٢ يمكن هسه راح تصير ٢ وربع ..
خلت الاستكان ع الميز سفطته حييل وكامت تجر حسرة ورة حسرة وتنفخ ..
مدام خليتي بيها انه ييمه كلبي وجعني ومراح يصير خير ادري بيها امي اذا مارادت شي مستحيل يصير ..
كامت تمشي على كيفها وتتمهطن ساعة ظلت تبدل وتغسل وتلبس والساعة عبرت ال ٢ ونص لمن ما ابوي عاط بيها ..
ويييينج سعدية تره بهاي تصرفاتج ماتغييريين شي لاتخليني اعوفج واروح واقلل من شأنج واحترامج كدام اخواني وزوجاتهم ..
فتحت باب غرفتها وطلعت معصبة وعيونها بالطول ظلت تصيح مو لازم اروح مو لازم روحو هو انتوا خذيتو شوري موافقتي اشو وافقتوا وراح تخطبون وانه ماقابلة ..
ابوي كاللها لاتجيين ظلي هنا بعصبية ولف البشت مالته وطلع كدامنا باوعت الها كتلها يلله يايمه دخيلج ..
كالت امشينه يلله .. حجت بعصبية مشت ومشيت وراهه اهز راسي برفض من تصرفاتها ..
وصلنا لبيت عمي واحنا يمهم كلش الباب بصف الباب .. دخلنه للاستقبال وسلمت على عمامي كلهم كاعدين ينتظرونه ..
حجى ابويه وكال .. خوية علوان احنه اليوم هنا نريد نخطب بنتك مشاعر لابني علي ونسمع طلباتكم حتى قبل لاترجعون نزوجهم لان مثل ماتعرف علي تخرج وتوضف ، وحتى الفوك كله كامل اله وباقي بس العروس ..
علوان .. اي والله ياخويه اني وين الكه مثل علاوي رجال والنعم منه بس انه عندي شرط وهذا شرطي عليكم انتوا اخوتي ..
عمامي كلهم ظلوا واحد يباوع للثاني باستغراب وتعجب ابوي كله تفضل ؟
__ اريد حصة ابوي من ورث امكم ..
ابو محمد .. هذا شون حجي الولد جاي يخطب بنتك ورث ابوي شعليه وبعدين ابوي مالة ورث ..
__ لا متوهم يابو محمد ابوي اله حصة من ورث امكم لان هو مات وراها وانه اطالبكم بورثي حصة ابوي انه الي منها ورث واذا تردون نستفسر ونطلع قسام شرعي ..
علي .. عمي هذا الحجي شجابه بالنص اني جاي اخطب بنتك شنو تريد تبيعها علينه بيع ؟
__ هذا شرطي الوحيد والا ماعندي مرة الكم انسوها السالفة ..
