سالي
.......
ظليت خايفة وارجف واتوسل بالمريه خالتها توديني لعمامي
اجت شوشو ونصت يمي ودتسحبني
كالت امشي لج ادبسز وين نندل عمامج احنه طايحة الحظ كوومي فضحتينا هسه كل الناس سمعوا صريخج .
دفعتهه الحجية وكالت عووفيها للج عوفيهاااا يله
كومي بنيتي احجيلي شبيج ؟
باوعتلها واستمديت القوة من اليد الي لازمتني .
وحجيت الها كلشي مستندة بللاثار الي تركهه ليث على جسمي
عصبت شوشو بقوة وجرتني تريد تضربني
بس امها صارت بيني وبينها لزمت ايدها ولاوتها
صرخت شوشو بعصبية انتوا تصدكون وحدة ماصارلكم يومين تعرفوهه ؟
لزمتها امها قوي وظلت تضغط على ايدها وللج شوومه ولج جنت شاكة بيج تمشين بدرب اعوج بس جذبت روحي ،،، خالتج نبهتني وجذبتها وعاركتها وهسه هالبنية شنو مصلحتها تجذب وهي تريد تشرد من البيت؟
كتلها خالة بس سلميني لعمامي ماريد شي بعد والله ات الله دزج الي وديني الهم حبابة الله يخليج .
كالت سهلة نوديج بس بالاول خلي اربي بتي على كبر
وطاحنلهه كتل كتل كتل دممنهه درت وجهي وادعي شكد اذتني حتى بدون ماسويلها شي وهسه الله اخذ بحيفي منها ..
بقت امها يمها وخالتها اجرت تكسي من الشارع واخذتني كتلها مااندل بيت عمامي ..
كالت الي يسأل مايتيه واذا مالكيناههم نرجع للبيت
اي بس خالة شوشو تموتني اذا ارجع والله
اطييح حظ حظها تاكل تبن شحدها تجيسج .
ضليت ابجي خليت ايدي على حلكي والتكسي يفر بينا اتذكر اسم منطقة عمامي بس بالضبط وين ما اعرف
ظلينه نسأل هوايه لحد ما واحد عرف مكانهم ودل ابو التكسي عليهم .
وصلنا لبيت عمو ابو محمد دكينا الباب طلع يحيى من شافني تفاجأ كال سالي هاي انت وين جنتي ؟؟
ظليت ابجي حتى ما اعرف شجاوبه جاوبته خالة شيماء الي هي شوشو بس عشتو اسم الدلع شوشو .
كالتله جانت امانه عندي وهلوصلتكم ..
والتفتتلي بنيتي هذا هو ؟ امان اخليج واروح انه ؟
اي خالة هذا ابن عمي مشكورة ماقصرتي مااعرف شون اجازيج .
لاتكولين هيج بنيتي لاتكولين انه الله دزني الج والله يستر عليج ويحفظج
دنكت بست ايدها ماقبلت ويحيى واكف وصافن
كال دخلي دخلت ويا سد الباب كال مشاعر وين لعد ؟
استغربت سألني على مشاعر ماسألني على اروى
خفت لا صار بيها شيئ .....
