سجينة النهوى

بارت ٨

هلاو ....

علي .... صار ايام انتظر عمي ابو مشاعر حتى احجي ويا اريد اقنعه حتى ينطيها الي حتى لو مموافقة هالبنت احسها تمشي بدمي تاكل وتشرب وياي مجاي اكدر اطلعها من بالي ..

رحت لبيت عمي ابو محمد دكيت الباب طلعتلي بنته الاء كتلها وين ابوج كالت هستوا طلع للبستان
طلعت ادور عليه .. ولكيته كاعد ع الشط وجاي يريد يصيد سمج ..

رحت يمه كتله الله يساعدك عمي شلونك ..
رد عليه هلا هلا وليدي علي اكعد يمي خوش سمج بلطي والله وطيب هم نكضي وكت وهم نصيد وناكل ..

مديت ايدي للعدة مالته
اخذت سنارة وظليت اصيد
كتله عمي ماكو خبر عن عمي علوان ما اجه
كال لا ما اجه اله جم يوم طالع مدري وينه
كتله ياريت اذا اجه تنطيني خبر اريد احجي وياه ..
كال خوش تدلل علاوي بس لا بعدك تريد بته ؟
اي عمي رايدها والله كلش داكة براسي لو هيه لو ما اتزوج ..

هسه ماتكلي شجلبت ماكو نسوان غيرها شو كرابتنا ماشاء الله عدهم الاحلى منها بعد لو عيه سالفة عناد جيف رفضتك ..

صفنت ع الشط صدك اني ليش متمسك بيها اكو وياي بنات موضفات بالدوام يشكن الحلك من الجمال وبعد گرابتنا بناتهم كلهن ماشاءالله اشكال والوان بس انه جنت قافل ع الزواج ما اريد اتزوج من اجت وشفتها عبالك واحد جان مايشتهي ياكل وفجاة انفتحت شهيته وفوكاهه كلش مستعجل ورايدها ياريت تحس بيه ..

صار المغرب وانه اريد ارجع لبيتنه وعمي بعده كاعد ع الشط يصيد سمج .. صدت ويا جم سمجة وانطيتهن اله
كال اخذهن كتله لا حلال عليك امي ماتحب السمج مال الشط الزغار ..

كال امك هذا طبعها من كبل ماتحب سمج الشط
اي والله يا عمي انه اترخص هسه
رجعت للبيت وعيني على بيت عمي بصفنا بلكي المحها اشوفها بس هيه ماكو ..

رجعت للبيت وره يوم خابرني عمي ابو محمد
كال عمك علوان رجع للبيت اذا تريد تشوفه تعال ..

كتله خوش ارجع من الدوام واجي
رجعت العصر تغدين واخذتلي قيلولة
كعدت كبل المغرب سبحت وبدلت
ورحت لبيت عمي ..

وهناك شفت عمي علوان سلمت عليه
رد عليه من ورة خشمه بس اني مهتميت اهم شي عندي مشاعر ..
كتله عمي امشي للبستان خلي نسولف احسن
صيح عليه كال وكت بستان هسه دنيا مغرب
احجي شعندك خلصني ..

فركت وجهي بايدي وتنهدت
كتله عمي وافق وخليني اتزوج مشاعر واني عندي امكانية اشتري بيت واسجله باسمهه ..

كال درووح ماكو هيج بطة تلعب شناو كتلك انساهه لمشاعر واني ماظال على كياعينكم ولا اجدي منكم ..

عصبت وبدا صبري ينفذ كتله والله عمي مشاعر متصير لغيري لا عبالك ترفض ومسويهه شغلة عناد ترة اخذهه من عيونك ويجي يوم وغصبا عليك توافق ..