قصص عن العَالم الثالث(السفلي) 😈🖤

قصه رقم 1

الساعة دلوقتي ٢ بليل ، هو دلوقتي في الغرفة ال جمبي ، لسه صاحي من النوم ، اكيد حاسس بخنقة .. انا سايبله باب الغرفة مفتوح  .. النور هيقطع دلوقتي بمجرد معد ١ ٢ ٣ ٤ .. النور قطع ! اكيد دلوقتي هو مخضوض ..انا كمان خايف ! ..بس انا مولع شموع في الصالة .. انا سامعه دلوقتي بينادي علي سارة ، هو مش لاقيها في البيت كله .. بيخش غرفة منة  بينادي علي بنته  ال برضو مش هيلاقيها في البيت كله .. مش عارف يفتح باب الشقة ..   بيلف في الشقة وبيصرخ .. بيصرخ صراخ مخيف ، صراخ هيستيري !  انا اول مرة اخاف من صراخه المرة دي .. مكنش لازم  افتح باب الغرفة بتاعته ! مكنش لازم افتح باب غرفة فريد .. بس انا زهقت ..
--------

الساعة دلوقتي ٢ بليل .. لسه صاحي من النوم ، مش عارف سارة مش جمبي ليه علي السرير ؟ .. كمان انا حاسس بخنقة .. خنقة غريبة !! .. عشان كده كنت لازم اقوم من السرير .. النور قطع ؟ مش عارف ازمة الكهربا دي مش هتتحل ولا ايه ..

-- سااارة ... سااااره انتي فين ؟

غريبة مش لاقيها في البيت كله ..!! دخلت غرفة منة بنتي !! 

-- منة ؟ منننة !!! انتو فين ؟؟

ايه ال بيحصل ! ... انا حاسس بخنقة غريبة !! .. ايه ال بيحصل !! ...

-- ياااجماااااعة ... انتووو فين !!!! ، سااااارة !!!

باب الشقة مبيفتحش !!! ... في ايه ؟؟ ..  فين تليفوني !! ..

-----------

الساعة دلوقتي ٢ وربع .. بيحاول يكسر باب الشقة !! .. مفيش اي فايدة .. بيصرخ اكتر .. وانا هنا بنفعل مع كل صرخة .. بيقرب من الباب بتاع غرفتي .. شكله شاف الشمعة ال انا مولعها .. بيخبط براحة

-- ساره .. انتي جوا ؟؟ سارة انت جوا انتي مولعة شمعة جوا ..  افتحي نتكلم !! .. افتحي ارجوكي نتكلم ..

مش عارف انا خايف ليه .. مش عارف حقيقي ! يمكن خايف من صوته ؟ .. مش عارف ..

------------
الساعة دلوقتي ٢ وربع بحاول اكسر باب الشقة مفيش اي فايدة .. الجو خنقة جدا !! .. انا بدات اتخنق ...

-- ياجمااااعة .. انا خايف .. ياجماعة الحقوني !! انا شايف حد بيبصلي من الحمام !! .. دي سارة ؟! . ساارة ..

كانت في عيون بتراقبني من الحمام .. انا حاسس بكده ، بس شوفت ضوء شمعة في الغرفة التالته !! .. اكيد سارة جوا هي ومنة .. كنت بخبط بس مبيردوش عليا انا شايف خيال جوا .. بس حسه خيال راجل مش ست !!  بنادي مش بيسمعني .. انا خايف من ردة فعل ال جوا ده ..

------

الساعة دلوقتي ٢ ونص .. فاضل نص ساعة !! تخبيطه مزعج ، عايز انام !! .. انا حقيقي عايز انام بس مش قادر ، مش قادر من القلق انا مش خايف ، انا قلقان منه بس .. صوته مزعج .. مزعج اوووي !!  ببص في الوقت انه يعدي مش راضي .. مسكت شمعتي وخرجت ..!!  فتحت الباب وانا ببلع ريقي ..

-------
فتح الباب شخص غريب !! دي مش سارة !! .. بيبصلي وهو خايف ..!! بس انا مش خايف لا انا مش خايف منه مين ده ؟؟
------
كنا بنبص لبعض باستغراب لحد متكلم وقالي ..

-- انت مين !! وبتعمل ايه في شقتي ...
- انا اسمي اسامة .. وانت اسمك فريد صح
- رد علي سؤال بتعمل ايه في شقتي ..

-- انا بجاوبك علي السؤال ده كل يوم .. كل يوم بقولك انك مت في الشقة دي ياستاذ فريد من ٨ سنين محروق !!  والشقة اتبعتلي .. ملعون ابو ال بعهالي مش عارف اخلص منها ولا عارف اروح في حته .. انا كنت الاول بخاف ، بخاف اقعد من ٢ ل ٣ الفجر .. ده ال وقت ال انت موت في .. بس احنا في شتاء والجو برد وزهقت !!
--  انا موت ؟ يعني ايه انا موت !!

- نفس الكلام بتردده !! البيت بتاعك اتحرق يافريد ومكنش في سارة ولا بنتك ..!!  الساعة دلوقتي ٣ الا خمسة .. هتيجي اللقطة ال بترعبني .. اطياف هتيجي تاخدك دلوقتي من الحمام .. وهتصرخ صرخة تزعجني وترعبني !! .. جبتلك شيوخ ومعالجين !! .. منفعش مش عارف اشمعني انا ال بشوفك .. مش عارف ..

-------

فضل ينفعل ويتهمني بالجنون .. بس بيتاكد لما بيحاول يضربني مبيقدرش !! .. رياكشناته بتبقي حزينة اوي ... ! الساعة دلوقتي ٣ !! الاطياف المخيفة خرجت .. بتشده !! بيبصلي وكانه بيترجاني انقذه  وبيختفي ..!! والنور بيجي .. بس مش هيختفي كتير هيجي بكره في نفس الميعاد .. بس انا زهقت !
تمت.. ###