قصص عن العَالم الثالث(السفلي) 😈🖤

قصه رقم 4

خليني اقولك اني دلوقتي انا قدام البيت .. بيت الاشباح ! هه كلمة مبتذلة ومملة ، اتعمل عليها الااف القصص والافلام ، بس خليني اقولك ان ال هتقرا ده مقراتهوش قبل كده ولا هتقرا بعد كده  ..  يمكن محدش بيختار مصيره
قبل موت ابويا بيوم واحد ، كان قاعد في الاوضة بتاعته بيترعش .. وهو بيقول جملة واحدة بس ..!

"" انا زهقت .. زهقت وتعبت سيبوني في حالي !! ""

نزلت جري اشوف في ايه ، فتحت الاوضه بهدوء علي الضوء الاحمر ال ديما بيحب يشغله ، بس ابويا كان في عالم تاني ، جسمه بيتنفض  وبيردد نفس الجملة "" انا زهقت .. زهقت وتعبت سيبوني في حالي !! ""  الجملة ال بتردد في ودني لحد دلوقتي ، جملة ممزوجة بخوف ورعشة شفايف ، ابويا ال عمره مخاف اول مرة اشوفه في الحالة دي ..! جريت عليه وحضنته ! ..اول مرة ابويا يضمني اوي كده ويعيط !!

-- يوسف !! يوسف يابني انا لو حصلي حاجة ادعيلي ! .. اوعي في يوم تضعف ، سامحني يابني علي كل ال عملته فيك ده ..

مكنتش عارف عمل ايه ؟ .. ياتري قصده الكوابيس ال بحلمها ؟ ولا قصده الخيالات ال بشوفها !! .. مكنتش فاهم اي حاجة  ، شوفته بيقلع خاتم وبيفك بلاطة من ارضية الاوضة وبيفتح دورج المكتب ويحط لوحة خشبية في الارضية وعليها الخاتم  وهو بيقولي ..

- انا السبب في كل ده .. وانا بردو مش هعذبك ! لو ضعفت ، اسمع كلامهم ، والخاتم اديك عرفت مكانه ..

انا فاكر اللوحة دي كويس ، ياما ابويا جرحني بالموس وكان بيحط ايدي وهي فيها الدم ويقول كلام غريب ! .. بعد مقفل البلاطة كويس بصلي وقالي

- اطلع برا يايوسف ..
-- ليه ..؟

شخط فيا وقالي
-- اطلع براا دلوقتي !! ..

اتخضيت وخرجت ، قفل الباب وفضل يصرخ !! ويصرخ ..الجيران جت ، كنا بنحاول نكسر الباب بس مكنش في اي فايدة ، الباب رافض يتكسر وابويا بيصرخ .. وبعد دقايق الباب اتفتح ، شوفت منظر لسه بيجي في احلامي ، ابويا مشرح نفسه بالموس وميت .. كان منظر صعب لولد عنده ١٥ سنة بيبدا حياته ..!  في جنازته مكنش في حد ! ازاي ؟ انا ابويا كان يعرف كل الناس .. بيتنا ده كان ياما بتقف قدامه طوابير مستنين الشيخ موسي بس يحن عليهم انهم يكلموا وياخدوا بركاته ؟ .. مكنتش فاهم نظرات الناس وهي بتقول علي ابويا  "" راح الدجال وخلصنا منه "" "" مات ساحر الشر "" ولما سالت الحاجة فاطمة جارتنا بصتلي وقالتلي

-- يايوسف ياحبيبي انت ملكش ذنب في كل ال بيحصل ده ، هتبات معايا اليومين دول  لحد ما امك تيجي ..

نسيت اعرفكوا بامي ، امي سابتني وانا صغير ، انا فاكر اليوم ده كانه امبارح

-- انت كافر .. كافر ياموسي ..! وهتطلقني ! وال بتعمله بابنك ده ربنا هيحاسبك عليه ..
- دلوقتي انا كافر يانجلاء صح ؟ ياموسي .. انا عايزة فلوس ياموسي ، ياموسي المصاريف مبتكفيش  ، ياموسي الواد تعب ياموسي .. ياموسي الواد مش عايز هدوم !! ولما الفلوس جت ابتدا النكد .. ناقصك ايه ها ؟  بيت بدورين حساب في البنك !! ناقصك ايه ؟
-- تيجي بالكفر ؟ تيجي بغضب ربنا
- تيجي زي متيجي !! المهم تيجي .. المهم الواد ال جوا ده ميحسش انه قليل وسط حد ..
-- طلقني ياموسي ..
- لو طلقتك مش هتشوفي يوسف تاني !