او‏୭ڪـسـۖجـﮧـيني 🥺🖤

الحلقة العاشرة

ريهام : ايلين في حاجه بنقولها لكي
ايلين : ها
ريهام : عطك ضا ملاحظتيش ان دكتور سهيل ديما انظاره عليك
ايلين كانت تشرب في مية و شوية شرقت : انا
ريهام : ايه انتي والله مش صاح يا روان
روان طبعا ما تحبش ايلين وحاقدة عليها لكن في نفس الوقت قدمها دايرة روحها كويسة وهكي وترجي في لحظة انها تكسرها لانها تكرها
روان : ايه فعلا وبينها وبين نفسها مستحيل يكون ليك

في مدرسة نيفين
ملاك : شوية و نجيكن و نادت على نيفين
نيفين : اهلا ملوكهه شن جوك
ملاك : تمام من بدري و نصرخلك
نيفين : والله ما سمعتك شن في مش من عوايدك 😂😂😂
ملاك : بلاش سماطة نبيك في موضوع
نيفين : يستر الله من مواضيعك 😃😂
طبعا نيفين مفرفوشيه مع ملاك لانها تتمنى أن في يوم تولي صبيتها 😂😂
ملاك : نقعمزو هنا
نيفين : هيا احكيلي ما تقوليش صار لايمن شي
ملاك : وانت ما همك إلا هو موضوع تاني بوكل
نيفين : ريحتيني هيا احكي
ملاك : بنسالك على أختك مرتبطة ولا لا
نيفين : وعلاش 😯
ملاك : مايعدش عقلك عمي عاجبته أمس شافها و ماما دوت لأمك عليها
نيفين : امتى ماما ماقلتلنا شي
ملاك : حتى لايلين
نيفين : ايه انا اعتقد انها اليوم بتقوللنا
ملاك : ان شاء الله والله هو عمي الوحيد ونحبه هلبا وله سنين برا لازم نفرحوا بيه عاد
نيفين : ايه صاح ان شاء الله تفرحي بيه اهو رن الجرس هيا
ملاك : هيا

عند فاطمة
فاطمة : لازم نستاشير خيي ماعنديش غيره توا نرن عليه
ترن ترن
فاطمة تتصل
أحمد : الو فطومة كيف حالك و كيف حال صحتك والبنات
فاطمة : الحمد الله بخير كلنا أحميدة ياريت تجينا اليوم بنتناقش معاك في موضوع
أحمد : حاضر مع العصر نجيك
فاطمة : و جيب مرتك معاك و اوس واليأس  استحشتهم
أحمد : حتى احني مستحشينكم لكن خايفين هرجة العيال تخرب على قراية بنات
فاطمة : هن بروحن يراجن فيكم
أحمد : معنها حاضر نصلي العصر و نجوكم
فاطمة :ننتظر فيكم في أمان الله وسكرت

طبعا أحمد يحب أخته هلبا و كل كلمة تقولها سمع و طاعة لان كان شاهد على العذاب يلي ذاقته أخته

قبل 15 سنة
فاطمة : ماتخافش يا وخيي انا سندك وانت سندي و بعون ربي مش حنقصر معاك مدام فيا روح تنبض كانت المسؤولية كبيرة لكن كانت قدها كان أحمد يشوف فيها كيف راجلها كان كل يوم يقرى عشان يحقق حلمها و يكون سندها
أحمد : اختي اختي
فاطمة : نعم يا أحميدة
أحمد : نجحت و صفيت بامتياز
فاطمة ودموع ملو عيونها : الف مبروك الف مبروك وأن لعقبال نشوفك احسن مهندسة
وحب أحمد على يدها و رأسها
أحمد : نوعدك اني نكون سندك و اليد يلي حتحميك انتي و بناتك ومش حنخلي حد بعد اليوم ياذيكم
بعدها بسنة تخصص أحمد هندسة و كان متفوق فيها
كان حياته شغل و دراسة
بعد 4 سنين تخرج بتقدير ممتاز و من أوائل الدفعة و عطوه الحكومه بعثة لدراسة في الخارج
فاطمة كانت فخورة بخوها و أن ربي عوضها عن راجلها بيه كمل أحمد دراسته برا و بناء حوش و زوجته أخته بنيه لا قوة الا بالله جمال وأخلاق و كون روحه و توا عنده شركة صغيرة و شوية شوية بيكبرها
نردوا لفاطمة
بينها وبين نفسها : ولازم نكلم ايلين تجيب فاكه و حلو

عند ايلين
طامي تتصل
ايلين : ماما ترن ان شاء الله خير ألو ماما
فاطمة : الو بنتي اليوم في العشية جاي خالك ومراته جيبي حلو وفاكهة
ايلين : حمودي بيجي يا سلام حاضر
فاطمة : سلم بنتي ما تعطليش
ايلين : ان شاء الله بااااااي ، ماما تبي حاجات و هكي لازم نعدي نتلاقو بكرا
ريهام : تمام يا حبي تم
روان : باي ، ريهام مش هدا دكتور سهيل
ريهام : ايه هو
روان : بنساله و نجيك
عدته روان شوية عطها بظهر لكن هيا خبطت على كتفه
وبعدها......
انتظرونا في الحلقة القادمة
شن في رأس روان و شن حيكون رأي أحمد في موضوع ايلين و كيف بيقولولها هدا كله وأكثر قريبا

ملحوظه
نت عندي ضعيف و ما يقوش إلا في الوقت هدا فبليز دعمكم وأي حد يعرف حد يحب روايات يديرله تاق لروايتي 💛