او‏୭ڪـسـۖجـﮧـيني 🥺🖤

الحقة ثانية و العشرون

مر الاسبوع بسرعة و تسريعن لإحداث

فاطمة اتصلت مرة أخرى بعمات ايلين لكن المرة هدي ما ردنش عليها و سكرن في وجها خبرت خوها و قال لها : يلي عليك درتيه هم الخسرانين، طبعا أحمد توكل بأمور المهم استجار فيلا خيالية كيف قصور و اتصل بشركة لتنسيق و كل شي كان على ماشاء الله تحفه أما ايلين طول أسبوع ما مشتش لجامعة و كانت ريهام هي تجيبلها في محاضرات و ماننسوش انه طلعت لسوق مع مرات خالها و أختها كان جو يهبل كان يوصل فيهن لبداية الشارع و بعد ما يكملن يتصلن بيه كان أسبوع حلو عليهن و شرت كل شي تبيه طبعا حكتلكمش شن خذت شرت أولا فستان سمائي سمبل في فتحة من الرجل طلع عليها يهبل أما نيفين خذت جيبسوت زيتي على لون عيونها و ركبن معه الشوز  والإكسسوارات كان الكل مبسوط و الكل فرحان إلا علي كان في قمت ندمه و تحسفه أما سهيل طلع مع أيمن و نسق ملابس طلع بيهم طرف
سهيل يبهت في المراية : زعما يعجبوها
أيمن : أين يعجبوها والله إلا حتموت عليك
سهيل : مش لدرجة يا راجل 😅
أيمن : والله إلا نايضة باهي
طبعا أيمن و نيفين علاقتهم بدت تقوى كل يوم حكلها على آلاء و كيف كسرته و نيفين كانت تحن عليه و تحاول تلم جرحه و هو حب حنيتها و طفولتها و تعلق فيها و ميتحملش ان في يوم يسمعش صوتها طبعا خلت الموضوع سر بينها و بينهم لين يتم بيان ايلين

يوم البيان
في المزين
ايلين : سومه زعما نحط عدسات
سليمه : لا لا عيونك حلوات
ريهام : الله اكبر ايلينو
ايلين : عقبالك يارب و غمزتلها

ايلين عدت هي سليمه و اختها و ريهام معاهم بعد الف توسل لمحمود لمزين أما نيفين قعدت مع امها ينظموا في فيلا
سليمه : الو احميدة كملنا
أحمد : اني جايه في طريق
ركبن السيارة و ولع أحمد اغاني كان فرحان بشكل مش طبيعي
سليمة : اوس واليأس وين
أحمد : مع نيفين الله يبارك فيها هي مسكتهم

عند سهيل
طلعت سعاد معها عمات سهيل و خالته  و ماننسش ملاك و ماخلوش شي ماجابوه

سهيل لبس بدي رقبة اسود و جاكة رسمية قهوية و سروال قهوي و كندرة سودة كان باين طرف لدرجة انه عمته قالت له : سهيل مالك و مالها بنت بوها مش عارف شن قصته
سهيل تعقد : والله يا عمتي انا بناخد البنت مش بوها
عمته بعدها عرفتش شن تقول فسكتت

وصل أيمن الصبايا أما سهيل حيجي في الأخير
وصلت ايلين و خشت لغرفة تنظم روحها وفاطمة اول ما شفتها قعدت تبكي انها شافت بنتها عروس على حياة عينها
بدو يجو المعازيم كانو أهل سليمه و خواتها وشوية من صحباتها و طبعا عمات ايلين ما جنش

شوية و جو أهل سهيل و بدن الزغاريط و الاغاني و التشتاي و كانو مصدمين من كل شي لأن فعلا كان كل شي راقي مافيش شي مش قد المستوى بدو يضيفوهم
ملاك توشوش لنيفين : وين ايلين
نيفين : شوية و تخش
ملاك : شن جوك مع أيمن
نيفين : الحمد الله كويسين
ملاك : هو يلي جابنا
نيفين : اهاا
فاطمة : نيفين تعالي
نيفين : نعم ماما
فاطمة : قوليلهم هيا رآه بيخش المغرب
نيفين : حاضر
نيفين خشت : هيا قالتلك ماما
و كانو الخدم هم يلي يمدو و يضيفو الناس
سليمة : قل أعوذ برب الفلق و ترقي فيها ،هيا
ايلين خشت عليهم و كانت طلعة حورية الفستان كان يجنن و كان عمات سهيل فتحات فمهن عليها و البنات كان يغن و زغاريط معبيات المكان  يا مبروك عليك سمحة الطلعة ديري حوش تجينا منه و شوية جت سلمت عليهن و قعمزت شوية  لأن لازم  تلبس الفستان يلي جابوه
صبت معها مرات خالها و ريهام يساعدنها
الفستان يلي اختاره سهيل كان احمر طويل شوية قصته تجنن 
مع المغرب
جا سهيل لأنه هو يلي بيلبسها الدبلة و يقصو التورته
ملاك : قال سهيل انه تخش جوا ما يبيش يطلع قدام الصبايا
فاطمة : باهي بنيتي هيا خشي
ايلين كانت متوترة خشت و معها نيفين و ريهام.
خش سهيل و قال لملاك يبي يقعدوا بروحهم
طلعن و قعد هو وياها
خش
سهيل : احم احم شن الجو
ايلين كانت متوترة : الحمد الله بخير
سهيل : كني نحس فيك خايفة
ايلين سكتت و كانت معطيته بكتفها برمها لوجه
سهيل : ماشاء الله تبارك الرحمن قصدك هدا كله بيقعد ليا نا
ايلين ميتة من توتر ، شاف سهيل يديها لقها ترعش خدهم وقال لها : انا عارف يلي عشتيه كله مش شوية لكن وربي مادام فيا عرق ينبض حنسيكي كل يلي فات  و حنكون معاك راجل لاخر يوم في عمري و صدقيني ما نبي شي من الدنيا إلا اني نشوفك مبسوطة لبسها الدبلة و الطاقم و باسها على خدها و همسلها في وذنها نحبك يا مراتي
وطلع سيبها في حال مش طبيعية 😂😂😂
أيمن جا مع سهيل و بصدفة شاف نيفين شهق شهقه قوية شافته و دغري هربت 😂😂😂 
بعدها خشت هي و سليمة : شن صار
أما ايلين متبكشه و مصدومه 😂😂😂
 

 روحو الناس و كلهم و الخدم قعدوا ينظفوا و طبعا باتوا في الفيلا
وكلهم خشو رقدوا إلا ايلين
نيفين رقدت من تعب و من اللقطة يلي صارت 😂😂
ايلين شافت الحاجات يلي جابوهم و فجأة
ايلين : حي يا حي ايفون 11 نفس ما كنت نبيه ييي 😍😍 ، بس كيف عرف انه نبي البنفسجي المهم جاني ياي
نردوا شوية ...