حكمـة ذئب

الحكمة الخامسة والثلاثون

مسائكم ورد وياسمين احبتي ❤
(35)
#حكمـة_ذئب
#بقلم_شمس_السعدي

المريـض يتألم من شدة المرض..
لكن هناك آلام من نوع خاص .. ألم الانتظار .. ألم الفراق .. ألم الضياع وخيبة الامل ..
فأنها تجعلك تشعر بأن هناك ضجيج يسكن داخلك ..
_____________________________

حكمت رغم كل الالم الي صابته الا انه متمسك برحمة الله وحكمته من كل الي يصير ..

سألتني امي" يمة وهسا شنسوي شلون نسكت والبنية تروح من ايدنا "

اتنهدت " يمة شنسوي يعني ماسمعتي الدكتور شيگول الي علينا نسويه والباقي على الله "

بطريق الرجعة اخذتها للمحل اخذت كل الي تشتهيه وجانت فرحانه وطايرة من الفرح ..

رجعنا للبيت المغرب جانت عمتي وبيبتي مسويات العشا.. لگيت خالي عطاء منتظرنا سألنه " ها بشروا ؟"

سولفتله الي گاله الدكتور .. ضاج ورد " اذا تشوفها ماتحسنت جيبها الايران هناك عندنا دكاترة زينين "

رديت " لا خالي شنو السالفه هنا هم عدنا دكاترة ويعني شيريد يسويلها هناك "

ردت بيبتي " اي تعالوا لهناك وناخذكم نزوركم الامام الرضا ومعصومة وهم تتحسن حالتها شوية تلگيها احتسرت خطية "

حسيت امي ضاجت من حجايتها .. سألتها " ليش انتو ناوين ترجعون ؟"

عاين عطاء على امه .. بس هي سكتت وماردت وبقت عينها على امي الي جانت تلومها بنظراتها ..
فهمتها وعرفت شگد مشتاقلها بس ماتگدر تعبر او لسا مجروحة منها .. وهسا لما سمعت راح يرجعون ضاجت

گعدنا نتعشا جانت فرحة بحضني وتاكل .. وبسمة يمي
بس عيني على امي فتحت الصمونه وخلت بيها كبابتين وخيار وسوتهن لفه وگعدت تاكل بهدوء ..

حست عليه منتبه الها حجت وي بسمة " يمة اكلي وراج علاج تاخذين حتى تنامين وترتاحين "

هزت راسها بسمة وكملت اكل .. كملنا صبت امي الجاي المهيل خالي عطاء مايشربه مثلنا ثخين ومخدر زايد
هو يحبه خفيف واول ميفور يصبه هيج متعودين ..

صبتله امي الجاي وخلت عليه ماي حار ..
وتسمع نبراس وهي تحجي بيبتي " صدگ ترجعين دادة ؟"
ردت بيبتي " اي خيه مناك امي شحالها لاتگوم ولاتگعد وبس مرت اخوي يمها وتستحي منها الا اني "

اتنهدت امي وردت " جا ليش رجعتي ؟"

استغربت بيبتي من رد امي وبعد ماسمعت حديثهن
ماعرفت شترد صفنت وبعدها گالت " اجيت اطمأن عليج وابرر موقفي وهي اصلا جيه سريعه ماانطاني گلبي اصبر بعد كل ذيج السنين "

رد خالي " ام حكمت خوية لا عبالج هاي اول واخر جيه اصلا اني راح تاخذ رجلي ليش هو اگدر افارگكم "