حكمـة ذئب

الحكمة الخامسة عشر

اسعد الله اوقاتكم بكل خير احبتي ❤
(15)
#حكمـة_ذئب
#بقلم_شمس_السعدي

وبيوم حمدية جانت وي العلويات بالترك واگفه تخبز ..
سمعت صوت صياح رضوه انهد حيلها ووگعت الخبزة بالتنور .. ضاق نفسها وصاحت فارس ..

خلت كلشي من ايدها وراحت تركض .. شافت رضاء تبجي والعلوية تهدي بيها ووداد يمها هم تبجي ..
صاحت .. شبيجن منو المات ..
شهگت رضاء وصاحت عمة كرار كرار ..
وگعت حمدية من طولها ودور التهوا بيها .. طشن ع وجهها ماي وگعدنها ..
دموعها نزلت ولجن شلون مات ..
ردت عليها مرت سيد هاشم .. لاتخافين خية گولي يالله وادعيلة مابي شي ..
فتحت عينها .. ليش هو مامات ..
- لاخية بس سمعنا متصوب وبالمستشفى وماعندة رقم يخابر بس بيت جدة بالناصرية ..
ورايحيلة وماگايلين الحجي خضير وابوه ..
ومن سمع الحجي تسودن ..
بجت حمدية .. وسودة عليه هادي راح يدور عليها ومايدري بي متصاوب عمت عيني عليك عمة ..
ولد هادي ماعندهم حظ بهالدنيا .. الاول بعدة مثل الورد وراح وهذا مانعرف اذا زين لو لا ..
ليش هيج يربي بثينة راحت وارتاحت ومكتوبلي اصير بثينة الثانية ..

هدأتها العلوية وگالتلها استغفري ربج مايصير تگولين هيج كلشي بأمر الله ولااعتراض على حكمة ..

رضاء ..
جدي جان يلوب بسبب عملة اجدادهم بالناصرية وشلون ضموا السالفه وماگالوا .. جانوا ناوين ياخذوه يمهم ..
من سمعت الخبر وشفت دموع جدي توقعت مات صرخت وماحسيت بروحي .. وعمتي سودة عليه وگعت من طولها عبالها مات ..
بس گلبي ماكلني عليه ومانعرف حالته شني .. زين لو مو زين ..
يكسرون خاطري كلش من صغرهم ماشافوا حنان الام ولااهتمام الابو .. بس عمتي حمدية جانت مداريتهم وعينها عليهم .. وجدي هم جان يعاملهم معاملة خاصه يخاف عليهم ينكسرون .. حتى كرار من راد كلية عسكرية مااعترض ولاحجة لان مايريد يضغط عليهم..
وصار الي حان خايف منه جدي ..
اذكر گالة ..
بوية احنة بلدنا كلها حروب وماتخفت نار الحرب بعد واني خايف عليك لاتروح مني والله مابيه احمل خسارة واحد بيكم بعد كافي الي راحوا مني ..

رد كرار .. جدي هواي شباب جبروها واخذوها للحرب بحجة اعمارهم مستحقة يعني حتى لو مارحت راح ياخذوني نسيت مهدي من اخذوا على عمرة وتالي تصوب ورجلة لسا يگزل بيها ومايگدر يمشي ..
انت جنت تذكرلنا دوم الاية القرآنية (أينما تكونوا يدرككم الموت ولو كنتم في بروج مشيدة..)

جدي ماگدر بعد يحجي وخلاه على هواه .. كلنا گاعدين بالهول ومالنا نفس حتى للاكل .. العلويات يحيرن شيسون ويخلن بس مالنا خلگ ..
اشوف وداد تحوم بالبيت . حسيت بيها مشتاقة الرجلها صح هي تخطأ هواي بس كسرت خاطري ..
مامجربة هالشعور ومن شفتها هيج حسيت بالفراگ شلون يكون ..
كل شوية تدز بنين تكلها روحي صيحي بابا ولان احنة هنا بالبيت يستحي يفوت .. او يتعمد مايجي ..

بنين صار عمرها ثلاث سنين وحكمت حاير بيها كلما تطلع يدخلها لان هي ماتصدگ الباب ينفتح بس تريد تطلع .. اشوفه شلون يموت ع الجهال ويلعب وياهم وگلبي يتگطع عليه لو عندة اخو او اخت ماجان هيج حاله ..