حكمـة ذئب

الحكمة العاشرة

هلا وغلا حبايب ❤
(10)
#حكمـة_ذئب
#بقلم_شمس_السعدي

‏جاءك الفرح فجأة ، وقد علمتك الأيام أن تحذر الفرح، لأن خيانته قاسية !!

الجو بارد يكون في العطلة الربيعية ..
وداد جانت مگابلة صوبة علاء الدين الي اغلب العوائل العراقية عندهم منها .. حزينة ومخنوگة ..
عادتهم الام او الاهل للسابع يله يجون .. بداخلها لهيب ونار مشتعله .. جانت تنتظر هذا اليوم بفارغ الصبر..  وتالي تنصدم بالواقع وتتندم ..

يوم زواجها .. لبست البدلة وفرحانة تباوع الروحها ومامصدگة واخيرا لبست البدلة والطرحة..
طرحتها كانت مزينه بورد ابيض ناعم مثل الطوق ونازلة منه الطرحة البيضة ..
بينما هي بأوج فرحتها هناك عيون تراقبها بغيرة وعيون اخرى حزينة اخذ الدهر منها اجمل ماتتمنى ..

لميعة جانت وحدها هي وبتول يتراكضن من مكان المكان .. وسداد ضايجة وتعاند ..
اجت الزفة وهن مامبدلات .. البارحة خربت الحنه بسبب مهدي والي سواه برضاء .. واليوم البيت حزين ولاعبالك اكو فرحة رغم وداد رادت تسوي كلشي حتى ماتخرب فرحتها. 
گعدت من الصبح شغلت الراديو وجمعت بنات الجيران وصديقاتها بالمنطقة وبقن يرگصن ويدگن ..
الزلم مااجت للبيت بيومها والحجي خضير مگابل رضاء ومايهون عليه يعوفها ..

صار الموعد المرتقب واجة السيد واهلة ياخذون وداد ..
دخل بسرعه اخذها وطلع من غير مايعاين بوجهها ..
جانت منتظرة كلامة وهمساته وغزله الي تعودت تسمعهن منه .. مافهمت شبي وبقت تدورله اعذار ..
حتى من طلعت ماسلمت على امها واهلها جان تفكيرها بسيد علي وليش ضايج ..
وصلوا للبيت وتلگوهم ولد عمة وخواله بالدگ والركص وذبحوا ذبيحة جوة رجلها .. وصلها للهول گعدت وعينها عليه همسلها .. منا وادم ناطرتتي بالباب رايحلهم ..

ضاجت وانقهرت .. بس بتول جايه وياها .. سألتها شبيج ليش صايگ خلگج ..
- مابيه شي بس راسي يوجعني ..
- اي من الهوسة والدگ هسا بس يجي السيد ينسيج الدوخة وتضحك بسكته ومخليه ايديها على حلگها ..

ابتسمت وداد وتنفست الصعداء .. اي يمكن ضايج لو تعبان جيف خطار عندهم وهوسة واكو من المحافظات قبل يوم عندهم وهو الوحيد الهم وكله عليه ..

قنعت نفسها بهذا الكلام وارتاحت .. اخواته جانن طايرات من الفرح والمتزوجات منهن شادات وصله على خصرهن ويرگصن .. واكو مرة مخليه نعجانه تدگ عليها وتغني والبقية يصفگن ..

صار الاذان وگفن الدگ والرگص وكلمن فرشت سجادتها
اجت العلوية .. يمة وداد گومي الحجرتج ارتاحي بين مايفضون العشا ويجي رجلج ..
گومتها بتول وراحن للغرفة .. جانت اخشاب صاج لو غامق .. مفروشه بفرسة بيضه مطرزه ومخاديد ام الكشكش فراش مفروش بجانب الجرباية وستارة بيضة
جان كلشي بالغرفة ابيض ومرتب .. مكياجها وغراضها مصفطات ع الكوميدي ابو المرايا ..