حكمـة ذئب

الحكمة الثالثة والثلاثون

اسعد الله اوقاتكم بكل خير احبتي ❤
(33)
#حكمـة_ذئب
#بقلم_شمس_السعدي

(على الباغى تدور الدوائر ) ..

مثل قديم يهدف ان الحياة تدور ثم يُصاب كل ظالم بما ظلم وكل شامت بما شمت وكل مسيء بما اساء به !
فلا يعتقد الانسان بجرحه وخداعه وظلمه للناس بانه قد فلت بفعلته .. أبدا !!
لان الله أعدل العادلين يأخذ حق المظلوم ولو بعد حين ..
__________________________________

تذكرت مرة جدي ذكرلي حديث للامام علي ( عليه السلام )
(إنما أنا كقطب الرحى تدور عليّ النوائب وأنا واقفٌ بمكاني)..

من جنت اعاين بوجه هيثم تذكرت كلشي الي صارلي بس ابد مانهزيت ولابينت اله اي مشاعر ..

جان شكله هو ذاك الي شفته بالمعتقل صارم وشامخ ومايخاف بس مبين عليه التعب او الحزن يعني يكابر..

مااهتميت الكلامة ودخلت بس بعد مااستوقفتني مسك
و‏ابتسمت الي ابتسامة دافية وهمست " شلونك حكمت مشتاقتلك "

رديت بصورة طبيعية " هلا خيتي "

حسيتها ضاجت وانقهرت بداخلها .. دخلت جوة
والنسوان كلهن بالمطبخ ويسولفن عن الوضع والطريق وشلون اجو ؟؟

عاينت الامي لگيتها تعاين عليه .. لابسات عباياتهن وواگفات ..
دخلت للغرفه .. وافكر بوضعنا شلون راح نبقى هنا وهو اصلا بيتهم ..
مااگدر ابقى وي هيثم بمكان واحد .. لان اعرفه مايطيقني ولااني اتحمل اشوفه واتذكر الايام الي مرت عليه .. صح سوالي جميل بنقلي الابو غريب بس الي صارلي بالمعتقل ماينسى ..

دخلت امي " يمة شبيك ؟"
عدلت گعدتي " تسأليني يمة ؟؟"

اتنهدت " اعرف الي بداخلك شني بس يمة مالنا مكان نروحلة وبهالوضع "

سكتت لان مااعرف شأرد عليها مااگدر اشتتهن وياي ولااگدر ابقى هنا حتى امي وعمتي مايرتاحن بوجود رجال غريب بالبيت ..

اندگت الباب ..
صاحت امي " منو "
دخلت نبراس بكرسيها اتقربت يمنا " اعرف صعبه عليكم تبقون وياه وبنفس البيت .. بس مااگدر امنعه لان الهم حصه بالبيت من امة .. اني وام هيثم ورثى بالبيت ..
بس راح اخليهم بالطابق الفوگ مو يمكم وانتو جوة .. واني انام بالاستقبال مو مهم ..

ردت امي " لا دادة شني بالاستقبال وهو بيتج .. حكمت ينام بالاستقبال لو يمنا بالغرفه اذا يريد الغرفة جبيرة وواسعه .. وهي شدة تگضي "

بعد حجي امي ماگدرت احجي او شحجي لان اصلا ماعندي مكان اروحلة بس خلي تخلص هالهوسة حتى لو اشوفلي غرفة بالكاظمية هناك اگعد بيها..

طلعن امي ونبراس وبقيت وحدي دخلت بسمة ضايجة
گعدت يمي وتعاين عليه سألتها " شبيج "؟

ردت " هاي بنتهم بنتهم الحلوة الحلوة تعاين عليه عليه ضجت ضجت منها منها "

ابتسمت وحضنتها " انتي تخبلين تخبلين احلى منهامنها"
ضربتني وتضحك " انت تتقشمر عليه عليه وتحجي مثلي مثلي "