حكمـة ذئب

الحكمة العشرون

صباح الورد احبتي ❤
(20)
#حكمـة_ذئب
#بقلم_شمس_السعدي

إفعل ماشئت !!
فسيأتـي يومـاً يفعل بك مافعلت ..
عندمـا تظلم .. ستُظلم
وعندمـا تكذب .. سيُكذب عليك
وعندمـا تشوه سمعة أحد
فـتأكد إن دورك قـادم
فـأفعل الآن ماتحب أن يفعل بك غداً
فكما تدين ستدان !!

سألته .. كرار انت شناوي ؟
جاوب : نيتي صافية يرضوة گلبي متعلگ وهايم ومايحلها الا الزواج .. ضحكت من سمعت رده
رفعت راسي شفت مهدي يمنا وفاتح عينة بوسعهن سحب كرار وضربة وكرار يريد يفهمة بس ذاك مايفهم وفضحنا گدام العالم ..

بس كرار ماسكت وخاصة هو صاير اطول من مهدي رجعلة الضربة بالگوة السيد وراكان وحيدر خلصوا مهدي من ايده ..

ومهدي يصيح .. والله الا اموتك تحط عينك على مرتي ياساقط يانغل ..
استغفر ربه كرار .. ودفعهم وراد يرجع يضربة رجعوا لزموه ..
سيد علي صاح بمهدي : ابو رزاق شني هالحجي عيب منا عالم وشلون تفكر بأم حكمت هيج ..
تقدمت وداد مااعرف شهمست للسيد خزرها رجعت ..

كرار ماسكت : ولك ماكو ساقط وابو نسوان الا انت جنت اگول احترمك واخوي الجبير بس طلعت ماتستاهل  ولاتستاهل رضوة ..
رد مهدي : لاتگول رضوة شيخصك بيها ..
رد كرار : لاتنسى هي اختي وجانت مرت اخوي وام ابن اخوي .. يعني احجي واضحك وياها هالشي مايخصك
رد مهدي : وتتغزل بيها مووو سمعت كل حجيك ياعار
تعصب كرار وبينت دمارات رگبته :
ولك ماكو عار غيرك اذا جبت سمعة رضوة بالعاطل ادفنك بعلي ..
لو تعرف مرتك شني وعندك ثقة بيها ماسويت هيج بس انت حاير كل يوم متزوج بحالها ..
اليوم وباجر اگلك .. رضوة اختي احجيلها عن حياتي وكلشي يخصني مايهمك عود من تهتم الامرها سوي روحك رجال براسي ..

مهدي تسودن وراد يرجع يضربة .. ولزموه
ضحك كرار : لاعادي عوفوه اريد اشوف شلون يضربني

صاح السيد : كافي انتو جهال شني هالعرك فضحتونا گدام العالم مو صوجكم صوج الطالع وياكم اشر الاخواتة ووداد :
يلة لمن غراضجن راجعين ..
عمتي هم ماسكتت وبقت تحجي على مهدي الي جان مصر اكو شي بيني وبين كرار .

احس نار وشبت بيه استحيت من الواگفين ومن السيد شيگول عليه ..
لو العلويات صافنات مصدومات .. جانو ولد مهدي يصيحون الحكمت ابن العايبة والناس تسأل ؟
شني ابن العايبة ..
عمتي نضحك وترد : هاي سوالف الشرايج .. وتلوف السالفة على بتول ..
بس هسا وبعد ماعرفوا حكمت مو ابن مهدي شيگولون لو تهمتة عليه وطعني بشرفي گدامهم ..

بعد ماحجت عمتي كلها بدت تحضر للرجعة ..
تقرب مهدي راد يحجي .. اشرتله
- اشششش مااريد اسمع منك ولاكلمة جنت تحرم عليه بس هسا ماراح اخلي شي يربطنا ..
عقج حاجبه :
- شتقصدين ؟
- اقصد نتطلگ ياابن عمي اول وتالي احنة مايربطنا شي لاجهال ولارابط غيره .. وحكمت وعرف السالفه
مااريد ابقى على ذمتك ..
ضحك :
- ها يرضوة يعني الحجي السمعتة صدگ معناها متفقة وي هالزعطوط على الزواج ..
عاينت عليه بلعبان نفس :
- يوم عن يوم يزيد ندمي انه في يوم ردت گربك وحبك مااعرف شلون طاوعتني روحي الك ..
جنت تريد تسمعها مني من زمان..
بس هسا راح اگلك :
مامر عليه رجال حبني مثل حسن ابو ابني .. بس هو الي جان يعاملني بطيب وحب..
اما انت جان گربك الي بس رغبة… انت ماتعرف الحب يمهدي حبك متوقف على فراشك والي سويتة ببتول حب عمرك اكبر دليل ..