حكمـة ذئب

الحكمة الحادية عشر

مساء الورد والقداح لعيونكم حبايب❤
(11)
#حكمـة_ذئب
#بقلم_شمس_السعدي

نظن اننا نتحكم بأقدارنا .. ‏والقدر يسخر منا ومن ضحاياه .. يلقي علينا نظرة ويمر .. ليتحقق مايريد ولنرضى بمايريد !!

28 شهر نيسان عام سبعة وثمانين ..
هاليوم جان مهم الكل العراقيين .. يتحضرون قبل ايام تتزين المدارس والشوارع والبيوت ..
بمناسبة ميلاد الرئيس .. رغم الحرب والشهداء الا ان هذا اليوم يبقى مميز .. اما الي ينولد من الأطفال بهذا اليوم او من مواليد 28 نيسان .. فهو محظوظ ..
لان الرئيس مخصص اكرامية لكل مواليد هذا اليوم ..
الناس من حاجتها واجبارها للرضوخ للواقع كانت اتأجل ولادتها وتدعي انه يكون بهذا اليوم ..
لكن هالحظ كان من نصيب لميعة .. الي صادفت ولادة ابنها بهذا اليوم واصرت تسميه صدام .. واول ماانولد استبشرت خير بي وجانت تگول هالولد وجها خير علينا

حجي خضير ماقبل يسميه هالاسم لان هو يستبرك بأسماء اهل البيت . لكن لميعة اصرت وسمته مثل ماتريد . وصالح بعد ماقصرت عينه بولد ثاني بعد هالعمر اكيد مايرفضلها طلب ..
رزاق وبشار جانوا يضحكون ويقلدون من تگللهم هذا عمكم ..
يرد عليها رزاق .. اول مرة اشوف عم اصغر منه همزين حتى مايشيخ علينا ..
صاحت عليهم .. غصب عنكم تحترموه من يكبر حتى لو صغير اكسر راسه اليحجي وياه ..
هزوا اديهم وعافوها تحجي وطلعوا للشارع يلعبون دعبل وجانوا يوم عن يوم يزيدون دعابلهم ويكثرن لان يفوزون وياخذوهن من الولد ..
حكمت كان شاطر بلعبه الدعبل ويفوز بس ماجان ياخذ منهم لان ماخذ اللعبه كـ تسلايه وايضا يسمع كلام جده من يكله اي لعبه بيها رهان وربح حرام .. تعتبر مثل القمار . جان حريص انه يطبق كل كلام جدة . من شاف اللعبه تتحول الصالح رزاق وبشار لان من يربح حكمت ومايقبل ياخذ الدعابل . 
جانوا ياخذوهن منهم بالاجبار بحجة اخوهم الي ربح ..
بعدها حكمت بطل يلعب هاللعبة..

رضاء بعد ماسقطت الطفل وجدها طرد مهدي .. انقلب البيت ضدها وكلها تحملها مسؤوليه طرده رغم هي الضحية وهو الجلاد .. راحت حجت وي جدها ..
- جدي خليه يرجع جهاله خطيه يسؤلون عليه وحتى حكمت يسأل .. اني هذا قدري والله ماقاسملي هالطفل يجي يوم ويعوضني .. نزلت دموع جدها. 
مسحتهن بيدها .  جدي ماعاش الي ينزل دموعك . ادريك تحبني وتخاف عليه لجن من غيرك اني مااسوى شي بس مهدي صارله شهر غايب عن البيت واولاده واهله يشتاقوله .. اذا عليه اني مسامحته خلص وراضيه بحكم الله ..

اخذ نفس ورد عليها .. يبنيتي اني خايف لو غمضت عيني شلون بيج انتي وابنج . كل يوم ادعي الله يطول بعمري علمودكم ..
- عسا عمرك طويل جدي لاتكول هيج ..
- مااريدج تسكتين عن حگج هاي الناس ماتستاهل طيبتج .. احنه كلنا واجدادج واهلج معروفين بطيبه گلوبنا .. بس ذوله رس لميعة ماادري من ياطينة ..
انولدنا على الفطرة ومانعرف الخبث والحقد .. كل الناس بيوتها عامرة ومرتاحة الا اني بيتي تحوم بي الثعابين .. بس الصوج بيه لو گاطع راس الحيه ومامخليها تتدخل بيتي ماصار الي صار ..
عظ اصبعه حيل وصاح ااااه ياصالح انت السبب يوم جبتها وطببتها البيتي ..