حكمـة ذئب

الحكمة السابعة عشر

صباح الخير حبايب .. اعتذر ع التأخير بس هذا الي گدرت اكتبه بحالتي ❤
(17)
#حكمـة_ذئب
#بقلم_شمس_السعدي

سمعت صوت مراة تصيح مات مات الولد يغبرات وينجن !!
رجف جسمي وانقبض گلبي والدنيا ظلمت بعيني
دفعتها وگمت اركض للباب وشعري منفوش وبالگوة اجر النفس ..
شفت عمتي بباب الحوش تلطم ..
طرگاعة عليك يرزاق طرگاعة ياابن بتول كتلت الولد
گامت تون وتنعى احس الساني ثگل ورجلي ماتشيلني
بالگوة يطلع الحجي مني :
- عمة فهميني منو كتل منو ابني شبي احجي

ردت بتول .. ليش تدعين على ابني شسوة ؟
گامتلها عمتي تفرفح وتصفگ ايد بيد ..
ارتاحي مو زرعتي الحقد بگلوبهم مو كرهتيهم بالولد
هالكتل الوليد وابنج اخذوه للسجن حني اديج يبتول
خربتيها وگعدتي على تلها ..

دخلت عمتي لميعة تهوس وتصيح يمة راحوا الولد راحوا الله لاينطيك يخضير عبن فرقت بينهم وخليتهم تكاتلوا ..

صاحت بيها عمتي .. الله لاينطيج انتي يبومة ابوي لو شايفهم بيهم حظ مافرق بس خاف يبوگوه مثل ابوهم ماباگة واشترى سيارة ..

عمتي لميعة تسودنت وتكاونت وي عمتي وحدة تصد ووحدة ترد ..
احس الدنيا صارت غواش كل وحدة تجي تصيح وتدعي وميفهمني ..
صحت .. كافي اسكتن فهمني ابني وين حرام عليجن تتكاونن وابني مااعرف شبي
بجت عمتي .. شأحجي يالغبرة يالحظج اعوج مثل حظ عمتج ابنج راح راح وتصفگ بيدها ..
وحيدج سابح بدمة اخذوه وماخلوني اروح اشوفة محد خلاني اروح اخذوه اخذوه ..

هي تصيح وتبجي واني تسودنت گمت الطم على خدودي يمة ابني وحيدي شبي ..
سحبت عباية عمتي الطايحة بالگاع وركضت مثل المسودنة بالشارع وابجي ..
مااعرف وين رايحة .. اخذتني رجليه للمحل احس كل العالم تعاين عليه بس بالي مو يمهم اريد اشوف ابني
تلگاني سيد مصطفى سألته ..
سيد اني ام حكمت ابني وينه وينه لافة عباتي عليه وابجي ..
هو يعاين على السوگ ودنگ ويحجي .. خوية ام حكمت ارجعي الحوشج اني جاي الم بالغراض ورايح وراهم هناك حجي خضير وسيد علي راح وياه للمستشفى ان شاء الله ماكو شي ..
منا عالم تعاين مااريدج تبقين هنا ..
ابجي واحجي : خوية بحال العالم اني اريد اشوف ابني ابني وحيدي مااعرف شبي ..
دنگت شفت دم بالگاع دنگت على الكاع وشهگت ..
يمة حكمة ابني هذا دمة دمة مووو بيمن ضاربه هالنازف هالكثر ..

گعدت بالگاع ابجي والسيد يريدني اگوم ارجع هو هامة الناس واني هامني ابني .
رفعت راسي اله .. عليك جدك رسول الله تاخذني اله
استغفر الله : وين اخذج خوية مايجوز مايجوز ارجعي الحوشج واني راح اشوفه وادزلج خبر بيد العلويات ..

ماقبل ياخذني يگلي اني غريب عنج ومايجوز اخذج وياي شتكول العالم علية ..
رجعت للحوش اجر بروحي جر شافتني ام هيثم بالشارع ..
- شني هالخبر رضوة ابنج شلونة ..
ماحجيت بس دموعي تجري احس حلگي نشف مدري شبيه .. المرة تحجي واني وگعت من طولي ..