حكمـة ذئب

الحكمة الثانية

هلا وغلا حبايب .. بارت طويل لعيونكم .. واعوضكم ان شاء الله بسبب انقطاع النت ..
(2)
#حكمـة_ذئب
#بقلم_شمس_السعدي

بداية الثمانينات..
السماء كانت ملبدة بالغيوم .. تتخللها اشعة الشمس وكأنها خيوط من ذهب ..
بعد ماعمتي بثينة گالتلي اريد ازوجج الحسن وحسن يحبج وانتي بنت عمة وراح يداريج واني اصير مثل امج ..
بجيت واختنگت بحسرتي على امي .. مااريد اي وحدة تصير امي اني اريد امي ..
عفتها وشردت مااعرف وين اروح .. طلعت للگاع اريد اروح الجدي واگلة مايزوجني ..
ماجنت اعرف شني العرس .. بس ضجت من عمتي حمدية تزوجت وعافتنا وجانت تبجي .. خفت واني اتذكرها ..

عثرت بحجارة بالگاع واني جنت اركض .. ركبتي انخدشت وتحرگني .. بجيت اكثر واني بمكاني .. امي جانت تنضفها وتنفخ عليها وتشدها بوصلة نضيفة ..

سمعت صوت يزمخ بيه ..
شعندج هنا ولج ووين حجابج .. جان صوت عمي صالح
من شفتة خفت نسيت وجعي ورجلي .. ورجعت للبيت اركض واعرج ..

لگيت عمتي لميعة وعمتي بثينة يتطالبن وتگلها ماتعرفين تكتليها وتلزميها شلون تخليها تطلع لو بنت ماهين ماترتاح الا تصخم وجوهنا ..

دخلت ابجي اجت عمتي بثينة الي ..
وين رحتي ..
دخل عمي وراها ..
هاي شعندها طالعة والوضع مگلوب والشوارع فارغة .
ردت عمتي لميعة ..
ليش احنة نگدرلها .. عمي مايقبل واحد يحجي وياها وهي لاسداد ولارداد .. لاام ولاابو ..
فوگاها يردون يزوجوها .. هزت ايدها وتضحك..

تقرب مني عمي واني ختلت ورى عمتي بثينة ..
هو بسرعة سحبني ولوى اذني حيل ..
وانطاني راجدي احس طبلة اذني انزرفت ومااسمع بيها
ماگدرت ابجي ولااحجي وابوي ماهو يحميني ..
سحبني من دشداشتي ودفعني باتجاه غرفة اهلي…

- روحي بالغرفة واذا سمعت طالعة من الغرفة اموتج .. الا بلانا بيج انتي وامج الناكرة بسببجن العيون علينا كلها ..

دخلت للغرفة ركض وسديت الباب .. صعدت ع الجرباية وتغطيت من الخوف مااحس بكلشي ..
يمة وينج .. ليش عفتيني .. جنت مااجوع ولااعطش
مااخاف ولاابجي ..
جنت كلشي مااسوي بوجودها ..
اكمل دراستي واگعد گبال التلفزيون .. اباوع كارتون ..
انتظر امي تكمل طبخ وتصب الي شوية بماعون ..
ترشدي خاف جوعانة بين مايجون جدج وعمامج ..

حتى عمتي حمدية رجعت لبيت رجلها وخلتني وحدي .. فتحت عمتي بثينة الباب ..
-مو گتلج اقبلي بحسن ترى محد يحميج غيره .. اذا بقيتي هيج تموتين ومايرحموج ..
جانت عمتي مصرة اخذ حسن ليش مااعرف ؟؟

هزيت راسي من خوفي .. حسن حباب ومايضربني وماراح يخلي واحد يأذيني ..
جنت اقنع نفسي بهذا الحجي .. وماجنت اعرف انه هو اول واحد راح يأذيني ويجرحني ..

اجة ابوي من الشغل جان يمشي بلا مشاعر .. مجرد يحاول يخلص يومة بسرعة حتى يرجع ينام ومايگعد للصبح يبدل ويطلع ..