حكمـة ذئب

الحكمة السادسة

اسعد الله اوقاتكم بكل خير احبتي ❤
(6)
#حكمـة_ذئب
#بقلم_شمس_السعدي

حينمـا يسكن الرعب سريرك ..
ولايأتيك النوم ابــدا ..
تذكر كل كلمـاتي لك ..
كن صامدا .. ومطمئنا ..
حتى لو سرت في دروب تائهـة .. لاتخاف لا تجعل احد يؤذيك ويهزمك ..
وتذكر انك ذئب ووجودك في هذه الحياة حكمة ..

بكل ليلة كانت ترتل كلماتها لمسامعه .. وهو يصغي الها بتمعن وفطنة .. اسئلتة كثيرة .. لكنها تتهرب دائما من الجواب .. وردها الوحيد اله .. لما تكبر راح تفهم كلشي ..

لان ماراح يفهم الي يصير واكيد راح تأثر على نفسيته وخاصه وهو حاس بتفرقة مهدي له .. و دايما يسألها ابوي ليش مايحبني ..

رضاء ..
اليوم جان يوم مو طبيعي .. شفت الوجوه على حقيقتها .. شگد انطي اعذار لسوالفهن وياي .. واسامح وانسى .. بس من جابن سمعتي وشرفي وطعنوا بي مااتحملت ..
احس الساني انعگد من اجه مهدي وتهمني ومااعرف الولد شلون جاب اسمي ومنين يعرفني . والي زاد خوفي من شفت نظرات جدي .. عاين عليه وعلى مهدي وهو يسولفله رغم هو شاف اخته ولمحها بس يمكن فرح بداخله لما طلع الموضوع عنها ..

عمتي شهگت وتسودنت .. ورادت تحجي بس جدي سبقها ورفع عصته .. غمضت عيني بسرعة من خوفي وتوقعت الضربة اجت الي ..
بس سمعت صوت مهدي وهو يصيح..  جددددي
شلون تضربني بدال ماتربيها هالعايبه ..

صاح جدي بوجهة .. ماكو عايب الا انت .. ولك شلون تطعن بمرتك يالأغم ..
- بس اني شفتها . والولد اليوم شفته صدفة ومن لزمته وضربته گال اسمها ..

عمتي ردت عليه بعصبيه .. انت مو شفت وداد بساعتها وضربتها بعد شلون تگول شفتها ..

فرك مهدي وجهة وجان حاير بالسالفة .. راح اتخبل شسوي وحدة منهن تجذب.. والعباس اذبحهن اثنينهن لو ماعرفت مني منهن ..

جدي جان ساكت ويسمع .. راح للديوانية وصاح
رضوة ووداد ومهدي تعالوا وراي للديوانية..

مشينا وراه ومانعرف شناوي ..
گعد ع الديوان وعينه بعيونة اني ووداد .. اسمعوا اني مو غشيم وكلشي ادري ..
الولد اجه هو وابوه واعتذروا مني وطلبوا البنية على سنة الله ورسوله .. يعني يمهدي تطمن ..
حسيت وداد ارتبكت من حجة .. عاين عليها ..
ها يوداد بعدج تنكرين .. زين ليش منطيته اسم رضوة

سكتت وبعدها نزلت دموعها .. گعدت يم رجل جدي وتبجي .. جدي والله غلطت ماادري شلون وخفت يعرف اسمي ومااجه بأسمي بس اسم رضوه ..
دنگ وسحبها من اذنها .. ولج من العيون اعرف الجذاب من الصادگ .. اصلا الولد لااجاني ولااعرف السالفة بس عرفت هاي سوالفج يبنت لميعة .. اشرلنا نطلع ..
وصلنا للباب .. صاح .. مهدي عندي حجي وياك بعدين

طلعنا ووجه عمتي حمدية وعمتي لميعة مايتفسر ومنتظرين جواب .. مهدي يتهدد وحلف يموتها ..