حكمـة ذئب

الحكمة الثالثة

اسعد الله اوقاتكم بكل خير احبتي ❤
انتظروني ببارت اخر ليلا ..
(3)
#حكمـة_ذئب
#بقلم_شمس_السعدي

عندما يتحرّك الكون من حولنا .. يستلّ سكاكينه يباغتنا بطعنات .. يجرّح أرواحنا .. يحولها إلى أشلاء .. يشتهي القلب لو يتّخذ من وجعه أجنحة ويهاجر إلى كوكب ليس به بشر !!
                                         
جانت عيونها البنية المائلة للصفار تنظر برهبة وخوف ..
الخوف من خسارة احد اخر من حياتها .. بشرتها الحنطاوية اصبحت ذات لون احمر .. دموعها تتساقط مثل الآلئ دون لمس خديها ..
تتسائل بداخلها ليش .. ليش ؟؟
وكأنها تلوم القدر على حياتها .. مثل طفلة توها تتعلم المشي وبكل لحظة تگوم بيها تمشي خطوتين تعثر وتوگع ..

حمدية جانت بس تصرخ والناس ملتمة حولها .. شالوه للمستشفى وهي وراه تالي التفتت الرضاء الجانت صافنة وعينها على نفس المكان الي جان ابوها واگع بي
سحبتها من ملابسها وجرتها .. والثانية تمشي بلا وعي وراها ..
اجرت سيارة وراحت وراهم .. اولاد الحلال هواي ماانتظروا واخذوه قبلها .. طول الطريق حمدية تدعي وتبجي .. شلون تخابر اهلها وشتگلهم ..
نزلت من السيارة مثل المجنونة .. عباتها براسها وتركض ورضاء وراها تمشي بجسد مابي روح ..

بذاك الزمن القلة القليلة تلگيها محجبة او لابسة عباية ..
لكن عائلة الحجي خضير علمهن على الحجاب من الصغر .. ونادرا ماكانت حمدية تلبس عباية اذا راحت للسوگ او مكان عام وازدحام ..

وهي بالمستشفى تسأل على اخوها وتدور بالوجوه والغرف .. نست نفسها وعبايتها على متنها وتركض ..
جان بداخلها هاجس انه اخوها خلص راح منها ..
لسا بعدة ماصحى من جرح مرتة وابنه الي ماشافة ..

سألت عليه بالطوارئ .. وشافت الولد الي شالوه .. اتجهت الهم ..
جان وجههم يدل على جوابهم .. اشرولها الستارة وراها اطباء واگفين ودنگوا راسهم ..
ركضت تشوفه وسمعت الدكتور يگول سجلوا ساعة الوفاة وسببها سكتة قلبية..

مااتحملت حمدية وهزت المستشفى بصوتها ..
ركضت عليه وسحبت الجرجف وتبجي وتحاول تگعدة
- اخوية اروحلك فدوة اگعد .. لاتروح مني يالحنين لسا وجع حسوني ماطاب لاتوجع گلب اختك وابوك ..
بنتك منو الها يخوية .. صغيرة بعدهي لاتعوفها ..
دنگت تهمسلة وعبالها يسمعها ويگعد ..
- بنتك شريفة والله ابنها بالحلال ومن حسن .. اگعد يبعد اختك اگعد ..
الدكتور حجة عليها وگالها مايصير هيج اختي ..
رجعت تتوسل بي .. دكتور افحصه والله ماميت سويلة شي اروحلك فدوة ..
اتنهد وهز راسه ..
لاحول ولاقوة الا بالله العلي العظيم..  اختي اخوج من اجة للمستشفى هو متوفي بسكتة قلبية .. گلبه متوقف اكيد صدمة قوية ..
تركها وراح .. وهي بقت مثل التايهة وضايعة ماتعرف شتسوي .. والولد الي جابوه ..
سألوها .. خوية خابري على اهلج يجون يكملون الاجراآت واذا ماعندج احد احنة هم اخوتج .. ماردت وگعدت بالگاع تبجي وتلطم ..