ودي ابعد عن تفاصيل الزمان ،
واسكن جروحك ولو فيها نكد ..
دامني بأحضانك الدنيا أمان ،
قلبك المرسى وعيونك لي بلد ..
قلبي الي ماعرف طعم الحنان ،
يسالك باسم رحمان احد ..
لو تباعدنا حبيبي بالمكان ،
نبقى روحين يجمعهم جسد
《 الفصل الخامس عشر 》
دروب وخطى مشيناها نقابل ناس وشخصيات منهم من يبقى بالذاكره ومنهم من يتوه في لياليها ونظل نتسائل ونقول في اي درب السعاده نلاقيها تنهد من سمع سيارة سعود تحركت لف ناظر محمد :خلنا نمشي معاد لنا شي هنا
اشر محمد بالحديده على هادي إلي مازال فاقد الوعي :وش نسوي فيه
تعداه راكان وقلبه فيه احاسيس غريبه ما يدري كره اشمئزاز كل إلي حاس فيه ان هالانسان بكلامه اشعل النيران بقلبه وشككه بنفسه همس بهدوء:اتركه دام سعود ما قال شي خلنا نتركه وبيجي لهم يوم
هز محمد رأسه ولحق راكان وضميره مازال يأنبه تكلم بإرتباك :راكان انا بمشي تامر على شي
وقف راكان وابتسم بهدوء:لا ما قصرت يا محمد وجميلك ماادري وشلون ارده الله يحفظك لغالينك يااخوي
بادله محمد ببتسامه حزينه ومر من جنبه من دون ماينطق بحرف وده يهرب ويبتعد لمكان خالي من الحزن خالي من الهم وحقد قلوب البشر
عيونه تبعت محمد لحتى راح مايدري ليش نظرة هالانسان مليانه حزن :ياهالدنيا إلي محد سلم من شقاها
توجه لسيارته وحرك بسرعه يبي حتى هو يبتعد من هالمكان كل تفكيره بنظرات هادي إلي تدل انه يعرفه
مين يكون ...
وليش تكلم معه بثقه حتى اسم اخوه يعرفه تنهد يبي يطرد هالافكار من راسه سحب جواله من جيبه وهو عارف ان امه إلي كانت تدق عليه بهاذيك اللحظه وكأنها حاسه انه كان في خطر..
رفعه على اذنه ينتظر ردها همس بحب من سمع صوتها إلي يعاتبه وكأنه اول مره يسمعه من سنين :يالبى هالصوت ...انا بخير يانور عيوني .... لاتحاتين شويات واكون عندك ....ياجعلني ماانحرم منك يايمه
"""""""""""
عزاه على قصر هدم بعد الفراق قصر انبنى بالحب طوبه بطوبه كان الامل يسكن به اثنين عشاق قبل الليالي السود تعلن غروبها ارتجفت شفاتها وعيونها معلقه ب امها إلي تناظرها بنظرات جاده تكلمت بنبره باكيه :يمه تكفين مو الحين ماني مستعده والله قلبي مازال شايل منه انتي عارفه هروبه ما..ما
ماقدرت تكمل كلامها بسبب شهقاتها إلي تغلبت على حروفها وعصتها
ضربت ام سلطان بعصاتها الارض وهي تضغط على نفسها ما تبي تقسى عليها لكن تعرف دلوعتها عنيده وما تعرف مصلحتها : انا وافقت ورجلك يبيك وماراح ارده هذا من حقه يا لميس جهزي نفسك يوم الخميس بنسوي حفله صغيره والله يوفقك وياه
