إلى متى يا ضيقه الخاطر على مجرى الوريد
ماعاد باقي من دمي قطره مهي مستوجعه !
انا دخيلك يا وفا قلبي تسافر بي بعيييد
طموحك الربان وجروحك بـ قلبي الامتعه !
وجه الزمن ماعاد يغري وانقفل باب البريد
وانت وفاي اللي لو خدع دنيتي مااخدعه !
"الفصل الثالث والعشرون "
هدوء يخالطه هواء وريحة الزرع المشبع ب أمطار الربيع تضم روحه الضايعه.. زاد نزول المطر وكأنه يبي يغسل القلوب المتعبه وينشر الامل و يبعث الراحه لكن وينها هالراحه وهو مشتعل نيران ليت هالقطرات تطفيها ياليت بس تخفف لهيبها وتبث السكينه لقلبه..راح فكره لامه ياترى ارتوى قبرها.. انغسل وبرد ..وفاحت ريحة مسكها..
ارتكى على سيارته بإنكسار وخيبه شد على شالها بين يدينه :فضى الكون من حولي ياغلاتي ...اظلمت الدنيا بعيوني ...انذبحت وانا حي يا يمه..صبري ملني ومليته...متى بس يبرد قلبي متى اطفي حزني ..متى يانظر عيني
ما يدري صبره يكفي لحياته السودا وانه بيفيض مع ايامه الجايه... اوراقه طاحت واتلفها خريف الحزن وعوده مال وانقضت ايام الفرح مشتاق لها لريحتها لكل شي يخصها دفن شالها بوجهه استنشق ريحتها العالقه
يتمنى تبقى..يتمنى يشمها على طول وتعلق بروحه المرهقه تبلل وتبللت كل حياته بالمأسي..
:بتظل كذا يامحمد
نزل الشال شتت نظراته على سعود وراكان:متى جيتوا
تقدم منه سعود عارف همه ودارس حالته وفاهمها حيل :تو جينا... زين وانت دليت الموقع بلوكيشن ..بس ليش واقف في المطر.. ليش مادخلت شف شلون تبللت
اعتدل بوقفته لف الشال حول رقبته يحمد الله ان المطر مازال يهطل حتى يخفي دموعه :ما دخلت كنت انتظركم
مسح وجهه من المويا والدموع وكمل كلامه بجديه :سعود انت متاكد ان المكان امان
هز رأسه بهدوء متاكد من امانه ومتاكد أكثر انه بيقدر يخطط ويفكر ويصفي حساباته واساسها هالمزرعه همس بنبره غريبه وملامح اغرب :متاكد..وبالحيل
ضم راكان جاكيته له واثق من سعود وهذا هو بيخطي خطوه كبيره معه ويمكن تكون هالمره أكثر خطوره : المطر بللنا والهواء بارد خلنا ندخل
تقدم سعود بهدوء وقف قبال البوابه الكبيره واثق ان هالمكان محد يزوه اصلا وجوده هنا مخفي عن الكل وخاصة ان هالمزرعه ماهي على الطريق ابد اشتراها بلي فيها خصيص لمكان اقامتهم سفره لها ماهو سفر بعيد لكن يشوفه سفر ابعد من البعيد ابعد من كل شي حتى ان مشاعره على وشك الخمود والركاده بهالفتره ولازم يرمى فيها كل شي خلفه حتى وعد من ضمنها... دامه بهالطريق مستحيل يرجع من هالسفره الوهميه حتى يتم إلي يبيه همس بنبره هاديه :راكان ..محمد اسبقوني شويات وجاييكم ...
