أحببناها مريمية ( ٣ أجزاء )

اقتباااااس

انا كنت بذكر عادي .. وحسيت اني عايزه افصل شويه .. فدخلت اكتب في الفصل الجديد شويه .. وبعدين وانا بكتب لقيت نفسي مندمجه اوي .. وبعد ما خلصت كتابه .. قلت أشارككم أهم جزء كتبته حتي الآن ♥️ فـ ده اقتباس صغنن كده  🙈

اقتبااااااااس ♥️

مدت يدها بهدوء وأمسكت بيده بين يديها متمتمه : يبقي انت مش قريب من ربنا كفايه حبيب ماما .. اسمعني يا وليد ..
القرب من ربنا حبيبي مش بس في صلاة الخمس فروض وصوم الشهر الكريم والعمل بأركان الإسلام .. لأ حبيبي دي فروض وواجبات عبادتك لله سبحانه لإنه خلقك وسواك .. لكن القرب بجد من ربنا بيكْمُن في البُعد عن كل ما حرَّم الله تعالي ..
النظر لغير المحارم حرام .. مفيش بقا مقدرتش او مستحملتش .. لا .. كده انت مش قريب من ربنا كفايه ..
القرب من ربنا انك تعمل الحاجه بدون ما تخجل او تخاف ..
القرب من ربنا انك قبل ما تخطي خطوه تفكر الف مره اذا كانت ترضي ربنا ولا لا ..
القرب من ربنا انك تسجدله في عز الليل وتقوله ياارب بحبها بس اتقاء حلالك وابتغاء رضاك استعففت حبي ليها فـ اجمعني بيها لو خير ليا ..
الحب الحلال والنظره اللي بتيجي بالحلال ياوليد لذتها خاصه ..
عارف .. خالك اسلام يوم ما راح يخطب اروي ؟..
لما دخلت عليه وعينه وقعت عليها .. لف وشه في لحظه .. مع انه مش حرام لانه مسموحله بـ تلت رؤيات شرعيه يشوفها فيهم .. ولو منتقبه يشوف وشها ..
لكن لا .. لحد ما كتب كتابه عليها وهو مبيرفعش عينه يبصلها .. ولم سأَلِته عن السبب قالها انه خاف يبصلها بصه مش مُحلَّله ليه فـ ربنا يعاقبه بحرمانه منها .. ويوم ما كتب الكتاب بقا جري عليها نتشها لحضنه كإن روحه فيها واتردتله ..
شوف كان بيعشقها لدرجة اي ؟..
ابوك شافني التلت رؤيات .. وبصراحه خد حقه في الرؤيا جامد يعني ..
ضحك وليد وضحكت معه لتتابع : بس حقه وبس .. كان قادر يتحكم في نفسه .. ولحد ما كتبنا كتابنا مجاليش تاني .. لانه استنفذ قبلها التلت مرات بتوعه .. عارفه اننا حاليا في زمن المخطوبين بيطلعوا ويتصوروا سيشن وهما حاضنين بعض ويقعدوا تحت الشجر والبحر في حضن بعض واوقات مبيمانعوش لو هيخطف بوسه من خدها ولا يبصلها بصه معرفش اي .. بس الحلال بيِّن والحرام بيِّن وبينهما أمور متشابهات .. انت بقا في النص .. اه مبتكلمهاش ومبتبصلهاش بصه كده ولا كده .. بس برضو بتشوفها لو من بعيد ..
فـ اتقي ربك في حبك ليها واستعفف عن اللي يغضب ربنا عشان ميكونش الحرمان عقابك .. ممكن يكون صعب عليك .. بس في الوقت المناسب هتعرف معني اللي بقولهولك دلوقتي .

ستووووب .. بس كدهو كفايه بقا 🙈 🙈