أحببناها مريمية ( ٣ أجزاء )

أحببناها مريمية(١٢)

دلفت إلى الجامعه بابتسامه وأمل جديد يرفرف أمام عينيها وقلبها .. ولكن قبل أن تصل إلى الرصيف كادت ترتطم بأحدهم .. لكنه تراجع سريعًا للخلف وهو يرفع يديه باستسلام :
- آسف آسف .

شهد باستغراب :
- مروان ؟!!

نظر تجاهها مروان بعدم فهم :
- حضرتك تعرفيني ؟

شهد بسرعه :
- لا لا آسفه .. بعد إذنك .

تحركت من أمامه سريعًا ولعنت غبائها ..
في حين نظر في أثرها بعدم فهم وكاد يذهب إلا أنه رأى مريم تلِج من بوابة الجامعة وهي تمسك بهاتفها .

مرت من جانبه وهي تتمتم :
- انتي فين يا شهد ؟.. تعاليلنا عند أداب عشان هنروح المكتبة .. إحنا قدام النافورة اللي قصاد آداب .

كان يقف مروان بجانب هذه النافورة تمامًا وهي وأروى على الجانب الآخر ..

أخرج هاتفه وكأنه يعبث به حتى أتت شهد .. وقد تعجب لكونها نفس الفتاة التي كادت ترتطم به .. افاق على صوت مريم التي تتحدث بإعجاب :
- واااااو إيه الجمال ده كله !.. تبارك الله بجد .

شهد وهي تدور حول نفسها :
- بجد حلو ؟.. أنا خلاص مش هلبس بنطلون تاني ولا هلبس الطرحة قصيرة .. أنا طولتها شويه آه .. بس ان شاء الله واحده واحده وتبقى خمار زي بتاعك كده .

أروى بحب :
- واحنا ياحبيبتي أسعدنا أوي إن الخطوة دي خدتيها بنفسك .. وأنا كمان ان شاء الله ناويه آخد خطوة الخمار .. بس هعملها مفاجأة لإسلام في الفرح .

شهد وهي تضم يديها لقلبها :
- واااو انتي هتتجوزي قريب ؟

أروى :
- أيون يا اوختشي بعد السنه دي ان شاء الله .

شهد :
- مبارك ياحبيبتي ألف مبارك ربنا يسعد قلبك .

مريم :
- طب أي هنفضل نرغي كتير ولا أي ؟.. في محاضرات يا آنسات عايزين نلحق المكتبه .

أروى وهي تضرب كتفها بخفه وتغمز لها :
- المكتبه برضو اللي عايزه تلحقيها ؟

مريم :
- أروى بس بقى .

شهد :
- أي ده في أي ؟

أروى :
- الآنسه مريوم جايلها عريس النهارده واسمه نفس اسم البيه اللي كانت بتتابعه على الفيس بوك .. يرضي ربنا ده ياشهد ؟

شهد بعدم فهم :
- لحظه بس .. أنا مش فاهمه حاجه .

مريم بهدوء :
- أنا هقولك وأمري لله .. بصي ياستي .. من فتره طويلة أوي كنت بتصفح فيس عادي وبعدين في بوست في جروب لفت انتباهي ولا إراديًا دخلت على صفحة صاحب البوست .. معرفش إزاي عملت كده بس فضلت أقلب فيها وأنا معجبة جدا بيها وبشخصيته .. وفجأه دوست لايك .. قمت جري حذفته وقفلت الجهاز وكنت هموت فيها من الرعب .. عارفه إنه كان تصرف غبي وغلط .. وأنا محرمش منه .. لا قمت دخلت بروفايله تاني وتالت وكل مره أقول مش هعمل كده تاني ولا إراديًا ألاقيني جواه .. وآخر مره نويت آخد على نفسي عهد ما أدخلهاش .. إسلام أخويا خبط عليا قبلها على طول ... ودخل وقالي إن في واحد عايز يتقدملي واتكلم عنه شويه .. وفي آخر كلامه قال إن اسمه جود .. وده كان نفس اسم الشخص اللي بتابعه .. بس كده .