أحببناها مريمية ( ٣ أجزاء )

كلمة قدر (١٢)

#كلمة_قدر
#أحببناها_مريمية_٣

                  #الحلقة_الثانية_عشر

استيقظت بتاكسل على صوت زهرة المزعج لتجدها تقفز إلى الفراش بجنون ..

سبأ بتثاؤب :
- بتعملي إيه ؟

زهرة بضحكة :
- بصحيكي  .

سبأ بجانب عينها :
- بتصحيني ماشي .. طب بتتنططي على السرير ليه ؟

زهرة :
- دي تمارين الصباح .

انفلتت ضحكة خفيفة رغمًا عنها لتصرخ زهرة بحماس وهي تصفق يديها معًا :
- هااااااااااا .. ضحكتي .. والله سمعتك .. سمعتك سمعتك سمعتك .

سبأ :
- يا بنتي بطلي جنان .

زهرة وهي تعبث بحاجبيها :
- ما أقدرش .

سبأ وهي تنظر بساعة هاتفها :
- الساعة لسه سبعة .. انتي أي جايبك دلوقتي ؟!

زهرة باستنكار :
- يا بنتي في أسلوب للكلام مش كده .. وبعدين قومي اجهزي عشان كلنا هنطلع علي بيت ملك ونجهز هناك .

سبأ :
- اشمعنى ؟

زهرة :
- عشان ما نتحترهاش معانا .. دي حامل بدايات برضو .

سبأ بابتسامة :
- لو في حاجة تفرح في الحياة دي فهو خبر حمل ملك بجد .

تنهيدة قوية خرجت عنها محملة بآلامها التي استشعرتها زهرة ...

زهرة بمرح :
- طب يلا الوقت هيسرقنا .. والبنات زمانهم وصلوا وهياكلوا الأكل كله وأنا عايزة ألحق البيتزا سخنة .

سبأ بجانب عينها :
- انتي ما فيش في حياتك أهم من الاكل مش كده ؟

كانت زهرة على وشك التحدث لكن صوت ما صدح عن البلكون الخاص بالغرفة وكأن أحدهم ألقى شيئًا ما بداخلها ..

زهرة بإجفال :
- انتوا عندكوا حيوانات في البلكونة ؟.. يالاااهني إوعي يكون قطة .

سبأ بسخرية :
- إيه يا ممرضة يا للي بتدي حقن بقلب جامد .. مالك خفيفة كده ليه ؟!

صدح الصوت مجددًا لتجفل زهرة من جديد وهي تصرخ : سبأ .. سبأ أنا بخاف من القطط بجد .. في قطط هنا ؟

سبأ :
- لا مفيش أنا بقرف منهم أصلا .

أنهت جملتها وهي تأخذ حجابها وتتحرك تجاه الشرفة بخطى حثيثة .. قامت بفتحها بهدوء لترى تلك المشابك الخاصة بالملابس التي تحتل أرضية  الشرفة وبداخل كل مشبك ورقة ..

كادت أن تنفلت عنها صرخة خافتة حينما رأت أحد المشابك الذي وقع أمامها بجانب سابقيه ..
التفتت بناظريها لتلك الواقفة بجانبها في فضول وابتسامة خبيثة ..

سبأ بتنهيدة :
- ما فيش قطط آه .. بس تقريبا كده في قرود .

ضحكت زهرة وهي تير للرسائل بيدها :
- طب والله طريقة مبتكرة في توصيل الرسايل .