أحببناها مريمية ( ٣ أجزاء )

كلمة قدر (٢٤)

#كلمة_قدر
#أحببناها_مريمية_٣

                الحلقة_الرابعة_والعشرون

طرقات على الباب دلف بعدها ناجي بعدما أذن له وليد بالدلوف ...

ناجي :
- السلام عليكم .. عامل إيه وبتعمل إيه ؟

وليد :
- وعليكم السلام ورحمة الله وبركاته .. واحشني والله يا عم .. انا فضل ونعمة .. أدخل تعالى .

ناجي :
- هعطلك  ؟

وليد :
- عطلة إيه بس .. لا خالص ده أنا حتى على وشك اشطب شغل النهارده واطلع أشوف هعمل إيه في الشقة بقا وكده .

ناجي :
- على خيرة الله يارب ويكمل لك على خير يا صاحبي .. هو الواد مالك فين ؟.. بتصل بيه من امبارح تليفونه مقفول .

وليد بضحكة :
- مالك بيعيش شبابه يا عم واخد مراته وهيقضوا اليوم في اسكندرية .. بيقول لما يرجع هينشغل شويه عشان يجهز حوارات الفرح وكده وعشان يذاكر شويه .. الموضوع مسئولية ولازم نبقى قدها وإلا هنتنفخ .

ناجي بضحكة :
- قدها والله يا صحبي .. إن شاء الله تتم على خير يارب .. وشكلي هحصلكوا أنا كمان .

وليد بانتباه :
- بجد ؟.. نويت ؟!!

ناجي :
- اه يعني هو نويت بس لسه مش عارف هبدأ منين الحقيقة .. أنا كلمت الجماعة في البيت وماما مرحبه أوي بالموضوع .. بس مش عارف هفتح الموضوع مع أهلها ازاي .

وليد :
- طب حد نعرفه ولا إيه ؟

ناجي بتنهيدة :
- اه .. اخت الدكتور ياسر .

وليد بابتسامة :
- يا سبحان الله .. طب والله اصلا انت وياسر شبه بعض أوي .. ما تكلم ياسر الأول طيب .

ناجي :
- ما أنا فكرت في كده بردو بس خايف أتفهم غلط .. يعني عشان هو وأخته بييجوا الكوتشينج عندي وكده .

وليد بتشجيع :
- بالعكس ده دي حاجة في صفك أصلا .. انت شوفتها في الكوتشينج ومعجب بيها ..  وادخلوا البيوت من أبوابها يعني .

ناجي بتنهيدة :
- ربنا يسهلها بقا .. أنا كنت ناوي أكلمه النهارده كمان .

وليد :
- عين العقل بردو .. لأنه أصلا اليومين الجايين دول مش هيبقى فاضي .

ناجي :
- ليه ؟

وليد :
- هيخطب رهف قريبة العيلة .

ناجي :
- ااه .. يارب اللهم بارك .. ده احنا داخلين على دستة أفراح بقا .

وليد :
- آه بالظبط كده .. الأفراح كلها جاية مع بعضها .. ربنا يستر والنكد ما يروحش جاي دفعة واحدة ويشقطنا .

ناجي :
- لا يا أخي ربنا يجعل أيامنا كلها أفراح يارب .. كويس إنك قلت لي .. هفاتحه في الموضوع النهارده .. وهحاول أظبط على اساس يبقى مثلا أتقدم بعد فرحك انت ومالك ولا حاجة .