لهيب الهوى

الفصل العاشر " شَرِسه"

وقف هو الآخر بعد أن لفتت أنظار بعض الجالسين بوقفتها الغاضبة ثم باغتها بإمساك يدها محتضنا إياها يلف ذراعه الآخر حول خصرها جاذبا إياها إلى ساحة الرقص التي كانت على مقربة منهم ... لم تعارضه بل صمتت حين وجدت الأعين عليهم .. لتنظر إليه تقول بصدمه :

-قولي إنك كنت بتهزر من شوية !!

عقد حاجبيه ينظر لها بابتسامة باردة يقول :

-لا بتكلم جد !!

عقدت هي الأخرى حاجبيها تقول :

-ده لا يمكن يحصل .. أنا بعد الأيام عشان أخلص منك !!

نظر لها بغضب ثم زمجر قائلاً :

-للأسف مش هيحصل يامدام !!

اتسعت عيناها تقول:

-أنا مش مصدقة إنك كنت بتخدعني !! انت إنسان كداب !! بس عادي هرفع عليك قضيه خلع !! مش هعيش معاك لحظة واحدة عن المدة اللي بينا !! وبعدين مش خايف على نفسك من واحدة مجنونة زيي !!

ابتسم لها يقول ببرود :

-اهو للسبب ده بالتحديد مش هينفع ترفعي قضايا !!

عقدت حاجبيها تقول بعدم استيعاب :

-سبب أيه !!

تنهد وهو يتمايل معها بهدوء على النغمات الهادئة يقول :

-رنيم ... أنا أول ما عرفتك كنت بحاول أجمع كل حاجة عنك قبل جوازك من شهلب .. وفي حاجات جت لحد عندي من غير ما أدور عليها .. زي الشهادة اللي من المستشفى !!

تسمرت بمكانها ثم أنزلت يديها عن كتفه ومن بين يده تنظر إليه بصدمة واضحة:

-ليه كل مابقول إنك اتغيرت بتعمل كده !! انت بتهددني !! هتقول إني مجنونة عشان ما أطلقش منك !!

هز رأسه بالسلب يقول مسرعاً بتوتر من طريقه تفكيرها :

-رنيم افهميني أنا لو عايز أستغلها كنت استغليتها من ساعة الوصية !! أنا قولتلك مش عايز منك غير هُدنة ... بس إنتي بتصعبي كل الطرق عليا .... متفكريش في نفسك بس ... إنتي مش شايفة عمر وجوان متعلقين بيا إزاي !! أنا من حقي فرصة !!

جزت على أسنانها تقول:

-وأنا معنديش فرص لحد....!!

ثم التفتت وكادت أن تغادر ليقول:

-رنيم أنا عارف إني أذيتك .. بس أنا معملتش أي حاجة من اليوم ده .. مقربتش منك وسايبلك كامل حريتك ... فرصة واحدة بس هي اللي هتصلح كل اللي بينا !!

التفتت له بغضب تصيح :

-والله !!!

وأنا محدش إداني فرصة ليييييه !!

بدأت العيون ترتكز عليهم لتُكمل بغضب و أنفاس لاهثة:

-مدتنيش الفرصة دي ليييييه !! أنا كنت محتاجة مساعدتك وبدل ماتمد إيدك عشان أمسكها و أقف .. كسرتلي إيدي يا أيهم !! انت رغم كل اللي جمعته عني متعرفش أي حااجة عني !!! ولا حاجة صح !!