عندما يعشق رجُلاً

#الجزء_الرابع_والعشرون

بيقرب منها وهية رح تموت من خوفها،ومن نظراتو اتضحلا أنو فهم كل القصة
جود بنبرة مخيفة:انتي..انتي قتلتي ابني لأنو رجعتي لهلقصة،قبل سنين قتلتي قلبي كرمال هلموضوع،وهلأ قتلتي ابني،انتي مجرمة ماعم اقدر استوعب

جوليا ببكا:بترجاك سمعني جود،كرمال الله سامحني
جود:سامحك؟انتي بتعرفي شو عم تطلبي مني
جوليا:انت قلتلي انو بما صار مرة حمل رح يصير مرة تانية،ويوم عرفت انو حامل كنت عم ظبط لموضوع العرض وكنت رح خبرك بهدوء
جود:لك خرسي،ماعاد قادر اسمع ولا حرف منك،ولاعاد اقدر شوفك،سمعي هلكلمتين منيح جوليا،انتي قتلتي كل احساس جواتي كل المشاعر وخلقتي جواتي شعور بحياتي ماحسيتو،وهلأ بتمنى تكوني جاهزة لجود يلي رح تقابليه
جوليا بتبكي بقوة:لابترجاك جود لاتتركني،كرمال الله لا
جود:جود مات ياخانم

بيتركا وبيترك بقايا قلبو المحروق،بيترك الرماد فقط وبيمشي

بتقضي اليوم وهية عم تلوم حالها وعم تبكي،هيك ليعطوها مهدء وتغفا،وبتجي رنيم بتبقا معها

وتاني يوم بيفوت الدكتور لعندا،ليطمن عوضعها،وبس يخلص الفحص
الدكتور:أنا واجبي ك طبيب أنو احكيلك كلشي وماخبي عنك،أنا شرحت وضعك لزوجك،وطلب مني خبرك بنفسي
رنيم:قول دكتور شو صاير
الدكتور:للأسف يامدام جوليا،النزيف يلي تعرضتيلو كان قوي كتير وبأثناء العملية دخلتي بحالة خطر وكان علينا نعمل هيك شي بس لأنقذ حياتك
جوليا:شو يلي صار فهمني
الدكتور:بعتذر كتير بس حضرتك ماعاد تأنجبي طول حياتك

مو مجرد صدمة كانت اشبه بلروح لما تطلع من الجسد،فاتت بحالة عصبية وصارت تصرخ وتبكي بجنون،فاتو مجموعة ممرضين وعطوها مهدء وبلويل لحتى هديت
بلنهاية هية أمرأة،فيها غريزة الأمومة،حست بجنين جواتها لمدة تلت شهور ماقدرت تستوعب أنو هاد الشعور يلي ماكتمل ماعاد فيها تحسو طول حياتها،وتأكدت انها مو بس خسرت امومتها،خسرت اغلى انسان بحياتها زوجها وحبيب عمرها جود💔

مر الزمن،وجود ماعاد زارها بنوب،هية دخلت بحالة اكتئاب متطورة جداً،وهو اعتزل العالم للمرة التانية،وقرر مايخبر حدا سبب اجهاض جوليا،بس الكل عرف أنها ماعاد تأنجب،وطبعاً كانت رنيم بتعرف بموضوع العرض وهلأمور

بعد شهر،جوليا بقيت بلمشفى لأنها كل ماتصح ترجع تنتكس

كان مجرد اكتئاب والطبيبة النفسية عم تجي عغرفتها بلمشفى لتحاول تطالعها من هلحالة،إلا وقت سمعت الخبر يلي دمرها بلكامل،تعتبر لشخصية متل جوليا"الضربة القاضية" وقت وصلتها رسالة من جود
(رح ضيف الرسالة لفو الصورة وشوفوها)
بعد ماقرأت كل حرف كان متل الجمر عقلبها،إلا الجملة يلي وصلتها بعد هي الرسالة

(جوليا،حبيت خبرك أنا قبل مايوصلك الخبر من أي شخص تاني،واجبي ك زوج خبرك بنفسي،وبتمنا تتمالكي نفسك ولا تنسي أنو هاد حق من حقوقي،بعد يومين بلضبط،رح تشاركك فيني انسانة تانية،رح اتزوج)