عندما يعشق رجُلاً

#الجزء_السابع

جود:هاد بحد ذاتو تميز..أنو ظهر تميزك بثواني قليلة..
جوليا:يلي هو؟؟
جود بيسرح بعيونها:قوة شخصيتك..وغرورك..بعتذر انو وصفتك بلغرور بس هيك لاحظت
جوليا:طبيعي تلاحظ والكل بيعرف هلقصة..بلفعل أنا مغرورة ومابعتبر هلشي غلط بنوب..
جود:حبيت أنك متصارحة مع نفسك كمان..
جوليا:أنا تأخرت ولازم أرجع
جود:بدي وصلك..
جوليا:مافي داعي شكراً..

بتقوم لتمشي...
جود:جولي...
بتلتفت لعندو وبتبتسم..
جود بيقرب لعندا وبيعطيها موبايلو:كتبي رقمك..أنا مافيني أجي علجامعة عطول..
بتطلع فيه نظرات غريبة وهو بحط عينو بعينها ليحاول يعرف شو عم يدور براسها..
جود:انتي اكيد عرفتي أني مو طالب بلجامعة،بس عندي صديقة بجي بشوفها مو اكتر..
جوليا:ميرا؟؟
جود فهم نظراتها وأنها بدا تعرف اكتر وأنو شو العلاقة يلي بينو وبين ميرا..بس هو تقصد مايخبرها..:أي ميرا..يلا كتبي الرقم..
بتكتبو وبتمشي..بدون ماتلتفت وهو بيبقا عم يتطلع فيها لتختفي من قدام عينو

بتوصل جوليا علبيت بتكون رنيم متصلة عليها اكتر من عشر اتصالات..بتضحك جوليا ومابتتصل عليها..
أماني(أم جوليا):جوليا..
بتطلع جوليا ومتأكدة في مشكلة رح تصير
جوليا:أي ماما كيفك..
أماني:مو منيحة بنوب..وينك لهلأ وليش رجعتي لحالك والشوفير راجع من قبل..
جوليا:طلعت مشوار شو فيها يعني شو أنا بنت صغيرة..
أماني:لك ايمتى رح تفهميني،أنا من خوفي عليكي بحاكيكي هيك بس أنتي بتفهمي بلمقلوب..
جوليا:لأنو هيك الدنيا..كلها بلعكس بعدين لاتخافي حتى لو صرلي شي انتي المستفادة واسم العيلة رح يطلع بلجرايد مو هيك بتحبي انتي،أنا فايتة اتسطح
أماني:احترمي حالك جوليا،رح اعتبر ماسمعت شي تعالي تغدي معنا هلأ بيجي أبوكي..
جوليا:تغدو انتو بعدين باكل..
أماني:لك يابنتي حرام عليكي،ليكي كيف عضامك طالعة وموبقيان منك شي..
جوليا بتستعرض قدام أمها بغرور:هيك أحلى..بدك كون سمينة وضيع حلم عمري..
أماني:لاحول ولا قوة إلا بلله..
بتلتفت جوليا عغرفتا وبتتمشا ببطئ وهية عم تقول لأمها:بكرا رح صير أجمل عارضة أزياء..وتشوفي حالك بين الناس فيني..

بتسكت أماني بس بتدعيلا الله يهديها...

بترجع بتتصل رنيم
جوليا:الو..
رنيم:وليك مو عيب عليكي تعملي فيني هيك
جوليا بجدية:شو بدك رنيم..
رنيم:بدي اعرف كلشي يلا احكيلي كيف هيك صار..
جوليا:قصدك مع جود؟؟
رنيم:اسمو جود؟؟طيب اي ليش مين غيرو
جوليا:لك كان بدو يعتذر انو اتدخل بلمشكلة يلي صارت لهيك عذمني اشرب قهوة..
رنيم:حلو والله هيك بهلسرعة؟بعدين انتي من ايمتى بتطلعي مع شب؟؟