عندما يعشق رجُلاً

#الجزء_العاشر

والبنت بتكون ماسكة علبة صغيرة وبترمي المي يلي فيها ع جوليا..

بس بيكون جود اسرع منها وبيسحبا لحضنو بيحميها كلها وبيصير ضهرو مقابل لهي البنت..وبلتالي المي بتوقع عضهرو..
البنت بتنصدم من يلي صار بترمي العلبة بلارض وبتهرب

بيضمها بقوة..بيستنشق عطرها وبيغرق..وهية حست بشعور غريب،وماعادت فهمت شو يلي عم يصير..بس حست بدفا وأمان بحضنو وبقيت محتمية فيه..
بعد ثواني قليلة بيبعدها عنو..
جود:جوليا..انتي منيحة؟
جوليا:أي..شو صار كيف هيك؟؟
جود:هلأ بقلك كيف صار...
بيتركها وبيتجه عمكان تاني وهية بتلحقو وهو حاسس بحرقة خفيفة عرقبتو من ورا لأنو المي بس اجت شوي عرقبتو ولأنو لابس جاكيت ماتأثر..كانت المي فيها مادة بتعمل حساسية لفترة بلجلد..

بيبقا جود ماشي هيك ليقدر يوصل لنضال،يلي كان واقف جنب سيارتو وعم يحكي بلتلفون مع البنت..
بيجي جود من ورا بيسحب موبايلو من ايدو بيرميلو ياه علأرض..
بيلتفت نضال بعصبية:انت غبي؟كيف بتتجرأ..
ولسا مابكمل كلمتو بيضربو جود بكل قوتو ضربة يمكن عملتلو خضة بمخو
ارتكا عسيارتو وماعاد قادر يرفع راسو..
جوليا بتبرمو عليها:جود احكي شو صار؟شو يلي عملو نضال؟؟
جود:بعدي جوليا..أنا رجعت تدخلت بحياتك بدون قصد..وهلأ بوعدك انسحب منها وماعاد اتعرضلك..

واقفة لسا مصدومة بيلي عم تسمعو..بس هو كمل كلامو يلي وجهو لنضال:سماع ولاك..إذا بعرف أنو تعرضتلا لجوليا مرة تانية لو بحرف...رح اخفيك عن وجه الأرض سمعان؟؟لتكون مفكر الدنيا سايبة..

نضال بيتطلع بجنب عينو فيهن،بيركب سيارتو وبيختفي..وكمان جود بيتركها لسا متخبطة بأفكارها وبيمشي..
بتلحقو وبتندهلو:جود...جود بترجاك سمعني أنا ..أنا..
جود بيلتفت:انتي شو ؟؟بعرف أنك مستحيل تنزلي من نفسك وتقوليها..بعرف صعب عليكي كتير تعتذري أو تتشكري وانا كمان مو ناطر منك شي..تركيني امشي..

بيتركها وهية مشتهية الأرض تنشق وتخفيها..مشتهية لو ترجع الزمن لورا..لو تكون انسانة تانية غير جوليا..بس للأسف المكان والزمان وكلشي مافينو يتغير عحسب طلب الانسان..تركها ومشي وهية ماعم تقدر توقف تفكيرها...

مر يوم..يومين وتلاتة وشهر كمان وجود بلفعل مختفي من حياتها،تعبت كتير وماعرفت السبب وموقادرة تعترف لصديقتها حتى،خايفة تكسر شي من نفسا..بس جواتا حاسة بشي واحد،حبها تجاه جود..الحب يلي يادوب خلق بدون ولا سبب

وهية هلأ عم تحاول تقتل هلحب..وترجع تركز أمورها وتسترد قوتها

رنيم:وبعدين معك؟لايمتى رح تبقي سارحة هيك؟
جوليا:شو بدك رنيم؟احكي وخلصيني..
رنيم:نروح نحضر خطوبة ميرا..
جوليا:من كل عقلك روح،وهية ماعزبت نفسا واجت عزمتني..ولاتنسي اني بكرها
رنيم:ليكي جوليا أول شي البنت مالها قريبة مننا لتعزمنا بلطريقة يلي قلتي عليها..بس بلمقابل وصلت بطاقة دعوة عأسمك..والأهم من كل هاد ياجوليا...جود رح يكون هنيك

#سارة_العلي💙
يتبع