أمير الرجال ( مكتمله)

البارت الرابع

#امير_الرجال #البارت_الرابع .

في الصباح الباكر استيقظت ساره ، وصلت ركعتين  ، ثم اخرجت من الدولاب دريس طويل منقوش الالوان  لكي ترتديه .

مي : نظرت  للدريس باستغراب ، ساره ايه دا .
ساره : دريس علشان البسه واروح الشغل .
مي : نهضت مي وامسكت الدريس باطراف اصابعها باستهزاء ،  دا ياحببتي تلبسيه وانتي رايحه تشتغلي في محل تناتيش ابو خمسه جنيه اللي علي اول الشارع .

ساره : قطبت حاجبيها ،  امممم يعني ايه ، مش حلو .
مي : مدت يدها داخل الدولاب واخرجت منه  بنطلون جينز وتيشرت  وباسفل الدولاب اخرجت كوتشي ابيض  واعطتهم لساره ،   البسي دول .
ساره : التقطتهم منها ، دا لبس جامعه مش لبس شغل .
مي : انتي رايحه شركه كبيره وهتقابلي ناس علي مستوي عالي ،يعني تبقي لابسه زيهم او علي الاقل متلبسيش اقل منهم ،  لازم لبسك يبقي في نفس المستوي الشركه اللي انتي ريحاها . 
ساره : القت الملابس علي السرير ، بس دا اوفر اوي ، وبعدين اما اشوفهم الاول هيقبضوني كام ابقي اروح اشتري لبس جديد ، انا كل اللي عندي لبس الجامعه .

مي : يبقي هتترفدي قبل ماتتعيني .
ساره :  بعد تردد طب بصي انا هلبسه بس بلاش الكوتشي هلبس شوز .
مي : تمام حلو اوي ،بصي بقي في كلمتين محشورين في زوري لازم اقلهوملك.
ساره : اممم خيرر .
مي: اولا: افردي بوزك وانتي داخله .
ثانيا : ثانيا امير دا صاحب الشركه ها ، ركزي صاحب الشركه يعني تعامليه بكل ذوق وادب ورقه .
ثالثا :  ودا الاهم الشغل دا لو لفيتي علي كعوب رجلك في مصر كلها وبره مصر ،  مش هتعرفي تلاقي زيه ، دي فرصه والفرصه ياحببتي مبتجيش الا مره واحده
رابعا : اوعي ....

ساره : تقاطعها ، خلاص ماتروحي انتي مكاني احسن بدل المرشحات دي كلها .
مي : ياريت هههههه معطلكيش ، انا مش ناويه اشتغل اصلا .

ساره : تضحك  اومال اما تتخرجي هتعملي اي .
مي : هشتغل برضوا ، بس هانم .
ساره : هههه بتحلمي .
مي : لا وحياتك ما حلم  ، تعرفي لو مش مشغوله كنت شقط منك امير .
ساره : بااستغراب  تشقطيه مني ، ومشغوله .
مي : اوعي ياهبله تضيعي منك امير دا فرصه .
ساره : انا همشي من قدامك علشان متعصبش عليكي ، ويلا بقي اطلعي بره علشان البس ومتاخرش ( وتدفعها خارج الغرفه)  .
مي: حاضر حاضر متزقيش ( وتذهب للخارج) .

#في الشركه

تقف ساره بدهشه واستغراب من ضخامه المكان والمبني ، امام البوابه الخارجيه للشركه وعليها لافته كبيره بااسم(  شركه ابو الدهب للاستيراد والتصدير ) ،
فتتمتم
--  ياااا دي كلها شركه ، دي اللي كنت فيها بقي كانت توكتوك.

دخلت من باب الشركه الخارجي ومرت علي الامن ونظرت لهم بانتظار ان احد يوقفها ويسالها اين تذهب ،  ولكن مرت بسلام .
اكملت طريقها للبوابه الداخليه للشركه وهناك شاهدت اثنان من رجال الامن
وقفت ساره تسالهم .