كانت منى تعمل في (الحواشات) طوال اليوم وتأخذ أجرة ضعيفة لتحضر لأهلها بعض من إحتياجاتهم اليومية،إلا أنها أحست بتغير نظرات الناس لها، تحس بشئ من التقزز في نظراتهم، كما وأن البنات أصبحن يتجنبن الحضور معها للحواشة أو العودة معها للبيت، كانت كلما إقتربت من مجموعة يتزعزع شملهن ويبتعدن عنها كأنها تحمل مرضاً معدي!!
إستمرت على هذه الحالة لعدة أيام ،حتى ذلك اليوم حين أخبرها مراقب العمال بأن تستلم يوميتها من صاحب الحواشة في ذلك(الكرنك) لأنها تأخرت وهو لا يحمل نقوداً الآن، ويهم بالذهاب إلى بيته، إمتعضت منه إلا أنها تحركت ناحية (الكرنك) فهي إشتغلت عدد ساعات إضافية لجني المزيد من المال حتى تستطيع تأمين مبلغ لأخوانها لمصاريفهم الدراسية قبل عودتها للعاصمة..
كان الكرنك مصنوعاً من القش والحصير وبه (عنقريب) يستلقي فوقه رجل طويل جسمه ممتلئ أسمر اللون كلون البن المحمص.. دميم الخِلقة،، له شارب كثيف يغطي شفته العليا بالكامل.. ويغطي جزءً من شفته السفلى.. ألقت عليه التحية وأذن لها بالدخول...
منى: دايرة يوميتي😬
الطيب(صاحب الحواشة): وومالو نديك يوميتك ونذيدها ليك كمان😉
منى: ذيادة ماني دايرة، أكتر من حقي مابشيل، انا دايرة حق تعبي بس🤨
الطيب: كان ما دايراها عشان مابتشيلي حق تعبك، أقوليك انا ذااتي مابدي قروشي ساي .. اي شئ بمقابل😋
منى وقد فهمت كلامه: اديني قروشي بس، لو ماداير تديني ليها خليني احسن لي امشي أهلي ساي المغرب قرب..
الطيب: كدي تعالى هنا طيب...وهو يضع يده علي (العنقريب) ويبتسم إبتسامة ذات مغزى لم يكن صعباً على منى إدراكه...
منى: هووووي يا راجل، إحترم روحك..إنت قايل روحك شنوو..
الطيب: ماتكوركي تعالي ساي ومافي زول بيعرف شي😘..
منى: قروشك دي مادايراها، ماعافياها ليك..واحترم روحك واعرف انت بتتكلم مع منو..😡
الطيب: هوووي ها انت قايلة روحك حركاتك دي انا بتفوت علي؟! ريحتك فاااايحة، والحلة كلها عارفة وسخك..ماتسوي لي فيها الشريف الرضي🤨 شيتك البتسويه في العاصمة الحلة جت(كلها) سمعت بيه😉...
تقدم نحوها وحاول أن يمسك بها إلا أنها ركضت للخارج وهو خلفها،، رأت مجموعة من الرجال في نهاية الحواشة غيرت مسارها وأخذت تهرول ، لا تريد أن يراها احد فيسيئ الظن بها...إلا أن الطيب رأي الرجال وعلى وجوههم علامات الاستفهام، تحرك نحوهم وهو يود أن يخرج نفسه من دائرة الشك ويبرر موقفه..ألقى عليهم التحية..وجلس معهم قليلاً..
بعد أن تحرك قال أحد الرجال:
بت إسماعيل دي كانت في الكرنك معاك في الزمن دا مالها؟ ومرقت تجري كدي؟؟
تململ الطيب في جلسته: مافي شي كانت دايرة قروشها ..
أحد الرجال: وهي المقعدها للوقت دا شنو، البنوت المعاها قبيييل دخلن الحلة🤨
الطيب وهو يحاول أن يرجح كفته ويبرئ ساحته: بت قليلة أدب ساي، عم إسماعيل مايستاهل بتو تطلع قليلة أدب..
رجل آخر: مالها البت آ الطيب؟
الطيب: قالت لي بخليك تسوي ااي شي معاي ذيد لي يوميتي، إتخيلو قلة أدبها😤
أحد الرجال: لا حول ولا قوه الا بالله، منى البت المأدبة تسوي كدي؟؟
رجل آخر: معناتا السمعناه فوقها دا كلو صاآآح..
الطيب: دا كلو قراية الجامعه😌
أحد الرجال: ربنا يعوض عم إسماعيل كان كدي😲
**
وصلت منى إلى بيت عمها حسن وكانت تبكي بحرقة ، لم تستطع الذهاب إلى منزل والدها بهذه الحالة..دخلت للجزء المخصص لعائشة بنت عمها، ذُهلت عائشة من منظر منى وتقدمت نحوها وإحتضنتها وهي تحاول تهدئتها...
عاشه: بسم الله يا بت مالك، عمي كويس؟؟؟امك واخوانك كويسين؟
منى: كويسين انا الما كويسة😭
أجلستها عاشة واحضرت لها بعض الماء وطلبت منها أن تغسل وجهها وتشرب ...جلست الفتاتان ساكنتين حتى هدأت منى قليلاً حينها تكلمت عائشة: أحكي لي الحصل شنو!!؟؟؟
وقصت منى على عائشة كل شئ..
عاشة: دا واحد كلب😤 ،ماتمشي تاني تشتغلي، ولو ماخايفه تبقي رقبه كان كلمت عليه محمد أخوي أو أبوي يهرسوه ويكسروه، لكن كدا سمعتك بتتوسخ، والناس يتكلموا ، و انت عارفة ناسنا ما ح ينكرو االشينة ح يصدقوا طوااالي و يجي يقولو المافيه شق ما بقول طق😢
منى: انا بتك آآ إسماعيل..سمعتي ذي الألماظ، زول يقول فيني كلمة بقطع لسانو😡
عاشة: لالا نحن مابنسوي المشاكل عشان الناس مايلوكك لبانه في خشمهم، واسي كدي روقي كدي أمشي بيتكم أهلك مايفقدوك..وانا باكر بجيك...
*
ذهبت منى إلى منزلهم ألقت التحية على والديها واخوانها..
إسماعيل:إتأخرتي كدي مالك أنعل مافي عوجة ؟
منى: مشيت لعند ناس عمي حسن،اتونست مع السرة وجيت.. توجهت نحو غرفتهم الوحيدة (غرفة الجالوص) وأخرجت(العناقريب) وقامت بفرشها في الحوش، جهزت العشاء ووضعته لهم، واعتزرت بأنها تناولت وجبة مع عاشة إبنة عمها حسن ،،تقلبت على السرير كثيراً، وهي تفكر فيما حدث معها هذا اليوم، ووقاحه الطيب، وكلامه معها، ماذا يقصد؟؟؟ كانت ليلة طويلة مرت على منى، قررت أن تقيمها وتدعى الله أن يسترها ويفرج عن كربتها..
استيقظت في الصباح ، أدت صلاتها
وكنست المنزل وقامت بإعداد الشاي،أحضرته وجلست تتجاذب أطراف الحديث مع اهلها...
منى: والله إشتقت للمتنا وونستنا دي..
إسماعيل: ان شاء الله ربنا يخلف تعبك يا بتي..
نفيسه: الليلة ماماشة الحواشة؟؟
ارتبكت مني إلا أنها ردت: لالا، باقي لي يومين واجازتي تنتهي دائرة اقعدهن معاكم 😪
-السلام عليكم آناس، إسماعيل..
إسماعيل: عليكم السلام آحسن،، ابقى داخل لا جوة..اتفضل
حسن: يذيد فضلك ..
حضر حسن ومعه محمد ابنه، وكان يحاول ان يبدو هادئاً لكن من الواضح أن هناك شيئاً يزعجه..
إسماعيل: اتفضلوا اشربوا الشاي، منى جيبي كبابي لعمك وولدو
حسن: شاييك مشروب آ اسماعيل اخوي علا بدورك في حديث..
إسماعيل: اتكلم سامعك..
دخل الجميع لغرفة الجالوص،،وتركوا حسن وإسماعيل ومحمد..
تنحنح حسن (وصنقع ودنقر): احم.إسماعيل اخوي، بدور اقولك كلام، علا بدورك تسمعوا لي للآخر وما تقاطعني فيه، وتعرف إن البضرك يضرني والبمسك بمسني، والمابرضاه لروحي ولعيالي...
إسماعيل: حسن أخوي قول كلامك العندك ساي ، مالك؟؟
حسن: انا والله منى دي بتي، ذي السرة ومحاسن، ماعندي فيهن فرز، وقبال كدي قولت ليك انا بدورها لي محمد ولدي..
إسماعيل: بالحيييل حصل، وانا شاورتها، وقالت محمد زي أخوها، والكلام دا قفلناهو😶
حسن: صح ، بس اسع في شي جديد حصل، ولازم توافق عشان نقطع لسان الناس..
إندهش إسماعيل من مقدمة حسن واحس بأن الأمر جلل: حسن قول الكلام العندك ساي ما تجيب أجلي ..
واخبره حسن بما يُثار حول منى في القرية..وقع إسماعيل مغشياً عليه....
يتبع.....
أنت تقرأ
شر النفوس و لا الزمن🔞
Randomالرواية دي قد تكون جريئة شوية، علشان كدا بنبهك لو ما لونك المفضل إتخطيها�� المقدمة:- أصبحنا نعاني الكثير من المشاكل في عصرنا هذا وكل شخص يرى أن هنالك سبب في تلك المشاكل، بعضهم يعزوها إلى العولمة، وبعضهم الى الظروف، والبعض الآخر يرى أن الجامعات والد...
