روايه
#نورتي_عتمتي
حلقة 3
بقلم "رواسي بحرالدين "
رواد: والله ماني عارفه شن نقول لاكن الوضع هكي
صقر: لا قول الحق مفروض هو من البدايه قال الحق كان هذا ماصارش هكي ولا
رواد: بينطق يشوف انوار قدامه وقف
صقر: خيرك !! وشاف رواد مركز يرفع راسه ويشوف انوار
انوار: تلف في المامر وتدعي يااارب
سلم يارب اشفيها نشاءالله مايطلع فيها شي و الخوف في باين ع وجها يلي مليان دموع
رواد؛ حط يده ع صقر .. كمل انت انا توا نلحقكك
صقر : حس بغصه... تمام
رواد؛ قرب من انوار بس الدكتور طلع
الدكتور : انتي بنتها
انوار؛ ايه يادكتور خبرني امي بخير
الدكتور: ماتخافيش حالتها توا تحسنت بس المريضة عندها سكر و ضغط و مش ملتزمه بالعلاج
انوار؛ السكر عندنا وراثه في العيله و تاخذ في دواء بس الضغط من وين جاها 😥
الدكتور: لازم الفترة هذي تلتزم كويس و عشان الضغط حنكتبلها ع حبوب تاخذ حبة في الاسبوع بس
انوار: نشاءالله
و خشت انوار لامها
بسمه؛ تلفتت لانوار و ابتسمت
انوار:ماما 🥺 سلامتك شن فيه
بسمه: باهي يلي مرضت مش سمعت كلمة ماما ليا سنوات نسمع في كلمت امي لين حسك كبرتي ومعاش بنتي الدلوعه
انوار: دموعها نزلوا زادت قربت من امها ومسكت يدها و باسها خوفتيني عليك والله
بسمه؛ ماتخافي يابنتي انا هملت روحي الاسبوع هذا بس نشاءالله اول مانروحوا نهتم
انوار: لالا من يوم وغادي معاش فيه نهتم بروحي بروحي انا حنهتم بيك وندير بالي عليك
رواد: واقف قدام باب الحجره ويسمعلهم
بسمه: انا مانبي شي يابنتي غير لو جا وقتي نكون متريحه عليك و مهنيتك و نبي نشوفك دكتوره في اعلى المراتب
انوار؛ تعوذي من الشيطان ياامي وتحركي من مكانك .
بسمه: هه
انوار؛مسحت دموعها خليك هنا ماشيه نجيب الوصفة من الدكتور عشان وصفلك دواء ونجي
بسمه: لالا ماتطلعيش بروحك
انوار؛ ما الصيدليه خطوة من هنا
و جت الممرضة جايه وفي يدها الوصفه
رواد؛ معليش !
الممرضة:- تفضل
رواد: الوصفه هذي للمريضة يلي داخل ؟
الممرضة : اها
رواد: عطيها ليا بعد اذنك
الممرضة؛- ومن تكون انت ؟؟؟
رواد؛ قريبها
الممرضة: باهي تفضل
وخذاها رواد ونزل للصيدليه
اما انوار مشت للدكتورة ماتحسابش دز الوصفة مع الممرضة
صقر؛ مشى لعند صاحبه عبدو استحمدله ع سلامته وهدرز معاه اشوي بس كل الوقت عقله مع انوار وشن صايرلها
عبدو: خيرك وقفت كسد
صقر: لا والله تعبان و الوقت تاخر س 10 نروح للحوش
عبدو؛ هو مزال بدري بس بعد تعبان نطلقوا سراحك
صقر؛ هي تصبح ع خير
عبدو: تلاقي الخير صحيت يابو رفيق
صقر: العفو واجبي ياطير ...... وطلع صقر ورد لنفس المكان يلي شاف فيه انوار قرب دوراها مالقاهاش
شاف من بيعد الغرفه شاف امها و مريضة ثاني بجنبها و هو يمشي ويدور عليها يخبط في بنت
صقر: معليش معليش
البنت: كانت حاذفه وشاحها ع كتوفها و لما خبط فيها طاح
صقر: نزل راسه عشان هي تصلحه سامحيني ياختي والله ماكنتش منتبه
البنت: لالا عادي حصل خير و رفعت وشاحها و حطاته ع راسها بس شعرها كله برا من قدام و خصلات نازلت عليها
صقر؛ رفع راسه باهي نستاذنك
البنت: تمام
انوار: وهي راد لحجره امها شافت جزدان طايح و البنت تمشي بخطوات بسيطه و تتمايل
صقر: بيكمل طريقه و بيمشي في اتجاه انوار بس انتبه للجزدان الطايح من شنطة البنت ع جنبهم
انوار: قربت بترفعه .... وفي نفس الوقت صقر قرب بيرفعه خبطوا روسهم في بعض
صقر: بسم الله 😓
انوار؛اسمله ورفعت راسها وهي تضحك ع الموقف و رفعت معاها الجزدان... العفو يا آنسه
البنت: تلفتت تكلمي فيا انا
انوار: هذا لك ؟؟
البنت:اها صحيتي و خذاته وكملت طريقها
صقر: كان واقف وقرب منها
انوار؛ اسفه ماشفتش انك بترفعه
صقر: ولا انا شفتك بس سبحان رب الصدف ✨
انوار؛ كيف
صقر: ماعرفتينيش يعني ؟؟
انوار: رفعت حاجبها لا العفو و جت بتمشي
صقر؛ ببرود حتي نا مانعرفكش راه شفتك وقت جيتي للمحل وخذيتي ساعه ع ذوقي بس
انوار: اذكرته ابتسمت و كملت طريقها وخشت لغرفه امها
بسمه؛ شن صار يابنتي وين الدواء يلي بتجيبه
انوار؛ الدكتور قالي بعتلك الروشيته مع الممرضه اكيده توا تجيبها
بسمه؛باهي يابنتي ارفعي تلفونك ورني ع خالتك سوسن تجي
انوار؛ حاظر هي و فعلا رفعت انوار التلفون ورنت عليها
بعد دقايق
دق دق دق
رواد : بإبتسامه عريضة ندخل!!
انوار؛ المره هذي زبطت رواد و اذكراته و في بالها شافت للمريضة يلي راقده في السرير الثاني و توقعاته شورها
رواد؛ قرب من السرير يلي عليه بسمه و حط كيس ع الطاولة تفضلي يا خالتي و مدلها كيس صغير وهذا دواك
انوار: وقفت العفوو ؟؟؟؟
بسمه: بارك الله فيك ياولدي بس من انت عليش متعب روحك ؟؟
رواد؛ يشوف لبسمه شفت ما معاكم شاب ياعمتي وتوا ليل خذيت الروشيته من الممرضه وتفضلي دوك
بسمه؛ صحيتي ياولدي بارك الله فيك وكثر من امثالك
رواد: ولو ياعمتي تسلمي تبي حاجة تفضلي
بسمه؛ سلامتك بس
رواد؛ هي ليلتك سعيده و شاف لانوار و ابتسم وطلع
انوار؛فتحت الكيس شافت الدواء ولقت عليه سعر 23 دينار رفعت شنطتها وطلعت في جرته .... معليش يااستاذ
رواد: و قلبه يرقص ... نعم
انوار؛ قربت منه وفتحت شنطتها و طلعت 35 دينار تفضل حقك
رواد؛ هه تبصري
انوار :ارضيت انك جبت الدواء لامي بس مش حنرضي تدفع من جيبك حقه
رواد؛ بثقة ... ومن قالك يهمني انك ترضي
انوار: بلحظة سريعه مسكت يده وحطت فيها لفلوس و بحزم .... ونا مايصيرش معايا غير يلي يرضيني و تلفت بثقة ورجعت للحجره
رواد: ضحك و فوت الموقف بس عجباته بجد حركاتها وزاد اعجابه بيها
انوار: اول مرة تحس بشعور هكي و قلبها وقتها ينبض دوف💗 دوف 💗دوف 💗 تمشي وهي مبتسمه
بسمه: عليش الضحكه هذي و وين مشيتي ناطه هكي حتي ناديتك مارديتي عليا
انوار: لحقت الشاب يلي توا بالزور وين خذا حق الدواء و صبت فتحت الكيس يلي جابه ولقاته جايب عصير و شكلاطه
(هي عطاته 35 كاحق للدواء وللكيس يلي جايبه 😁)
جت سوسن و كملت التغذيه يلي مركبينها لبسمه عطوا المستشفي حق الاباري يلي ضربوهن ليها وحق التغذيه لانه ماكننش متوفرات وجابوهن ع برا
وطلعوا ركبوا في السيارة ... وطول الطريق سوسن و بسمه يحكوا ويهدرزوا اما انوار سرحانه وهايمه تتخايل و تتذكر في رواد
سوسن: ما مابتنزلي يا انوار
انوار : ها
بسمه: من انبدري خالتك تاندي فيك وين سرحانه
انوار؛ نعسانه الحق و نزلت ..... و نزلت الاكياس
انوار : السلام عليكم
حمزة "خو سوسن" : وعليكم السلام و ناض خذا الاكياس من بسمه و دخلهم و كان اول مرة يشوف انوار فيها اما انور لمحاته لمح حتي شكله ماانتبهتله
خشت انوار دوشت و لبست توتة لونها حني كالعادة مش لاصقة ع جسمها و طويلة تحت الركبه و خشت مع شيماء " الاخت الاصغري لسوسن " و حطن سفرة العشاء
سوسن : مال شن صاير يا انوار اليوم مانسمعناش حسك بكل و سرحانه من انبدري
انوار؛ لا والله غير بعد امي داخت راسي برم و توا بعد العشاء بنصلي و بنرقد
سوسن: اااه غير نحساب صاير معاك شي
انوار؛لا والله
شيماء : باهي احكي يا انوار يقولوا بعد 3 ليالي الضيف يقعد من العيلة توا تعرفنا عليك و ع امك بس ولا مرة جبتي سيرة بوك
سوسن: خبطت برجلها ع رجل شيماء
انوار؛ ما امي و بويا منفصلين
شيماء ؛ مادورتش سوسن اي عارفه بس قصدي ماتشوفي فيه !!
انوار؛ لا العفو نشوف فيه الحمدلله ولعند توا يوميا نتصل بيه او يتصل بيا هو و حتي امي الحق مش حامرتني منه
شيماء : اها باهي ربي يحفظكم لبعض
انوار؛ امين ... ورن تلفون شيماء و كانت اغنيه رومانسية لشيرين
نطت شيماء ابتسمت و حطت الكشيك من يدها في السفرة... الحمدلله و ردت ع التلفون الووو و خشت للدار
انوار؛ شافتها وضحكت
سوسن: هذا شريف مهبل عقلها البنت
انوار؛ كيف ؟؟
سوسن: غريبه ماحكتلكش شيماء
انوار: لا ع قد مانحكوا الحق مافتحناش موضوع هكي
سوسن؛ هذا شريف ولد عمنا يقعد عاطي فيها كلمه
انوار: يعني مخطوبه !
سوسن؛ نقولوا هكي
انوار؛ باهي كمل الله بالخير عليها
سوسن: نشاءالله يارب ... وانتي ماعندكش موضوع هكي ولا هكي
انوار؛ جا في بالها رواد و قلبها دق ..... لا والله مزال مركزة ع قرايتي بس نشاءالله نكمل و نفضى له السريب هذا
سوسن؛ يعني ماعمركش حبيتي ولا درتي علاقه؟؟
انوار؛ لا. لا، لا طول عمري و امي تقولي العلاقات حرام و تنبه فيا عنهن لذالك ولا مرة خشيت في علاقة
سوسن:و الحب ؟
انوار؛ انا بيتوتيه من حوش بويا لحوش امي و من الجامعة لشيتاتي مافضيتش بيش نحب او نفكر اني انحب اصلا
سوسن: امممم غريبه رغم توا وقتك
انوار؛ بعفوية .... وانتي يا خالتي بعد تعمقنا في الموضوع هذا ماعندكش سريب لا هنا ولا هنا
سوسن؛ ايييي خالتك هذي ماخلت مادارت من سريب توا نحكيلك ع مغامرتي و مراهقتي 😹😹 لاكن الله غالب نصيبي مزال ماجا
انوار: مزال الوقت ياخالتي نشاءالله ربي يرزقك
سوسن: وين بيجي يابنتي راني قريب بنخش ع الاربعين
انوار: في يلي فاتن الاربعين وجا نصيبهم و عاشن احلى عيشه خلي ثقتك بربي كبيره
و حطت كشيكها حمدلله
سوسن : نشاءالله يابنتي ، حتي نا شبعت حمدلله
انوار:رفعت السفره و خشت للمطبخ و رفعت كمامها
سوسن :لا يابنتي والله مش غاسلتهم قلتي تعبانه عدي ارتاحي
انوار؛ لالا عادي واصلا مزاال ماخاطري نرقد
سوسن : انا حلفت خليهم و كان تبي تتعبي انتعبك وديرلنا طويسة قهوه
انوار؛ ههه حاظر غير خليني نشوف امي ونطمن عليها مش نجي نشرب معاك بدون ماتعلم ماتحبش نشرب منبهات في الليل
سوسن ؛ هي تلاقيني نراجي فيكز
و خشت انوار اطمنت ع امها و عطتها دواها و صلت لعشاء و خشت لقت سوسن ع تلفونها مقعمزه في المطبخ دارت القهوه و قعمزت معاها
سوسن : صحيتي يابنتي
انوار؛ سلمك
شيماء: خشت عليهم .... ريحة القهوه فاحت عليا ونا جوا نشاءالله غير حسبتوني
انوار: ناضت ايه خليت حسابك و جابتلها طاسه و قعمزن مع بعض يهدرزن
_____________
صقر: روح للحوش ع رجليه حتي ماشافش رواد ولا قاله طالع فاته هكي عينك عين 🙄🙄
إفطيمة (ام صقر)؛ عليكم السلام ياولدي كنك تاخرت اليوم
صقر؛ لا خشيت ع صاحبي يام داير حادث
افطيمه : سلامتك نشاءالله غير بسيطه
صقر؛ لا حمدلله جت هوينه رجله بس ركبوله بلاتين
افطيمة ياروحي عليه ربي يصبر اماليا اكيده قلبهم محروق عليه توا
صقر؛ اي والله ... شنو تعشيتوا ؟
افطيمه؛ لا والله كنا نراجوا فيك
صقر: مش ديما نقولك يام ماتراجوني مرات نطول
سارة؛ كلا انا و تسينم كلينا راه امك مابتش قالت لين ايجي وليدي
افطيمه: نوضي وانتي ماعندك غير الكلام حطي العشاء ليا ولخوك
تسنيم: جت خاشه بالسفرة اهو حطيته يام و حطت قدامهم السفرة و قعمز صقر يهدرز و يتعشى مع امه
______________
اما رواد خش ع عبدو ومنها روح للحوش و هو فرحان وقعمز بجنب امه
رواد: حط راسه في حظن امه
ريم : حطت يدها ع راسه نشاءالله غير مش مريض ياولدي
رواد: ااااه يام ولدك مريض من قلبه
ريم: ضرباته بالخفيف ع كتفه نوضي عني شكلك كبرت ومعاش تحشم ع وجهك
رواد: هههه معقولة يام انا نفتحلك في قلبي و انتي هكي تقولي
ريم: باهي خبرني من سعيدة الحظ يلي طحت فيها
رواد: قعمز نعرف اسمها بس
ريم ؛ و شنو اسمها ؟؟
رواد :انوار ✨
_________________
في اليوم الثاني :-
ناضت سوسن بكري بتطلع لعملها و ناضن معاها انوار و بسمه عشان يمشن للمستشفي و متوقعين خال انوار محمد اليوم ايجي
مشن للمستشفي و لقن الدكتور مخرج جدتها من العناية ومخليها في قسم عادي
الدكتور : حاط صور العمود الفقري لجدتها قدام ويشرحلهم ع العملية و ع وضعها و انه الاسبوع الجاي حيبدوا في العلاج الطبيعي بإذن الله
و انه اليوم يقعد معاها مرافق
بسمه و انوار طلعن من حجره الدكتور ...
نشاءالله خالك اليوم بيجي نقوله ناجروا شقة انا اليوم نقعد مع حنك و انتي وياها تمشوا للشقة
انوار: مايصير ياامي تقعدي معاها انتي صحتك مزال مش تمام وقتلك معاش اديري شي لذالك انا يلي بنقعد معاها
بسمه: نا والله ماعندي مشكله نخليك مع حنك عارفتك بنتي و احسن تربايه مربيتها لك لاكن خالك بيجي مستحيل يخليك و مرات حتي نا مايخليني بس حنسكر راسي عليه
انوار؛اي والله صحح هذا خلي تفكيره عقيم بكل😔
ورقن فوق لحجرة جدتها ... قعمزن معاها وهدرزن و طولن اشوي معاها لانهن كانن مستاحشتها
و بعد وقت
بسمه؛ هي يام نخليك ترتاحي
انوار: غير مانبيش نتعب صحتك كان هذا مزال مستاحشتك ونبي نحكيك ونقرملك ونصدع راسك
عزة: هههه قاعده شيطانه يابنت
بسمه: احووو شيطان و سكتي
انوار:باهي باه ... و باست راس جدتها مع السلامه
بسمه: سلام امي
هي انوار تعالي نطلعوا ناخذوا غذائية للحوش و نخذولهم حلو لو القينه حلواني في طريق قريب و منها نشاءالله نحصلوا IVECO و نروحوا للحوش
انوار؛ تمام هي
و بعد وقت كملن يلي بيديرنه و روحن للحوش ..... و كمل يوم عادي مع العيلة الا انه الغريب محمد ماروحش
بسمه: رفعت تلفونها و اتصلت الو محمد
محمد: ايوه بسمه من الصبح نحاول فيك
بسمه: وينك الدنيا ليل وانت ماجيتش
محمد: شن بنقول صار ضغط و حولني لمكان عمل ثاني ولازم نقعد 3 ايام يعني بعد يومين نروح
بسمه: لا ماتقولها القني كثرته ع العرب مش معقولة مزال بنقعد معاهم
محمد: واللهي انتي يلي سكرتي راسك و تبي تجي اهو تحملي العواقب
بسمه؛ انا عشان امي ندير يلي مايندار غير كمل شغلك وتعال
محمد: ايححح نشاءالله نشاءالله غير خبريني شن صحتها امي و ين انوار شن دايره
بسمه : اهي جنبي انوار و كملت هدارزة مع خوها
انوار: خطرها اليوم مارنش عليا بويا غريبه وناضت حولت تلفونها من الشحن ورنت عليه .. و طلعت للمطبخ القت فيه شيماء و هي ماتحبش تتكلم بجنب حد لذالك طلعت للسور
عماد؛ ايوه انوار
انوار؛ اهلين بويا شن حالك
عماد:حمدلله بخير و نعمة و شن احوالك انتي
انوار : نقولوا باهي حمدلله ع كل حال .. غريبه اليوم مارنيتش عليا قبل لما انا مانرن انت ترن عليا
و ماتحسش انوار غير بيد تاخذ التلفون من ع وذنها
انوار: تتلفت ورا 😨😨.... يتبع
من زعما يلي خذا التلفون من انوار ؟؟ وشن غايته ؟؟ و وراد و صقر مزال الصدف حيجمعنهم بانوار ولا حتبدا قصتها مع شخص اخر ؟؟ توقعاتكم و رأيكم و القصة حقيقيه بس لازم نضيفولها اشوية بهار عشان تعجب لعقول 😁❤ " بقلم رواسي بحرالدين "
لايك و متابعه للايميل 😘😘💛
