روايه
#نورتي_عتمتي
#حلقة 5
بقلم "رواسي بحرالدين "
زهره: خذت لكتاب يلي ع السرير يلي كانت تقرا فيه انوار فتحاته و فتحت تلفونها كتبت رقم رواد
انوار : شن تكتبي !!
زهره: هذا رقمه انتي حره يلي عليا درته " طلعت مش ساهله هذي زهره😁"
انوار : باهي صحيتي
زهره: مادرت شي هي تصبحي ع خير
انوار : وانتي من اهلو
و فتحت انوار كتابها وهي تخمم ترن عليه ولا معقولة عمرها هذا كله وهي مبعده عن سريب العلاقات و الحب و ملتزمه قدر الامكان ايجي يوم و ترن ع شخص ماتعرف غير شكله
و قعدت اتفكر و تخمم لعند رفعت تلفونها ورنت عليه
رواد: شاف رقم غريب ابتسم وكانه حاس انها انوار الوو
انوار:السلام عليكم
رواد؛ وعليكم السلام تفضلي منو معايا
انوار: حست انه لو حكت معاه بلطف حيحس انها خفيفه و تكلم في شباب .... مش ضروري تعرف من معاك انا توا عطتني الممرضه رقمك و رنيت عليك حتي نوقفك حد حدك وتعرف ع من تسال
رواد: امورك تمام انوار
انوار: استغربت كيف رد عليها هكي .... حمدلله اسفه اني حكيت معاك هكي بس يا استاذ انت هكي حتسببلي مشاكل
رواد؛ رواد مش استاذ
انوار؛ هه باهي يا رواد تفضل شن تبي مني !
رواد: فصل الخط...
انوار: قرنت حواجبها و استغربت هذا خيره... ولا زعما التغطيه قصت
رواد؛ سجل رقم في تلفونه بنور عيوني و عاود رن عليها
انوار؛ ايوه
رواد: قتلك ياانوار
انوار: انعم ... و علاش صكرت ورديت
رواد:مانبيش يصرف من رصيدك
انوار؛ تحشمت باهي شكرا بس جاوب ع سوالي
رواد: قصدي واضحه شن يبي ولد بسال عن بنت ويدور اصلها و فصلها ورقمها
انوار : دايره روحها غشيمه ... شنو !!
رواد: نبيك انتي 🥺🌹
انوار؛ ضحكت و وجها صار احمر اول مرة تحكي مع ولد في الوقت هذا ولا فكرت في يوم تخش في علاقه اصلا بس شن صار ؟؟؟
رواد: نحكي معاك يابنت وين رحتي
انوار ؛ ناضت ع روحها و وقت قلبها .... اسمعني استاذ رواد انا جو نحكي في نص الليل مع ولد ومن غير علم اهلي هذا شي مش من تربيتي ومستحيل ندير حاجه هكي ونا اتصلت بيك عشان خايفتك تسببلي مشاكل وانت تسال عني وربك قال ( وليس البر بأن تأتوا البيوت من ظهورها ولكن البر من اتقى وأتوا البيوت من أبوابها ) باب بيتنا مفتوح لو تبيني تعال منه وهي ليلتك سعيده ... وسكرت الخط و هي قلبها يدق باقوى ماعنده ...و تتنفس بسرعه حطت يدها ع قلبها و تعوذت من الشيطان و خذت شربت اميه عشان تتريح وفي قلبها عاجبها رواد بس ماتببش تخش في سريب غلط
رواد: قعد لدقاق يفكر في كلامها و فعلا يلي قالته صح و عجباته انها بنت اصول
و بعتلها رسالة " معاك فيها و صحه لسانك ع يلي قلتيه بس بيني وبينك صح نبيك و عاجبتيني بس مانقدرش انجي من الباب و نا مانعرفش عنك غير اسمك حتي بالعقل ماتجي "
قرت انوار الرسالة و رودت " و المطلوب "
رواد: باعتلها ... اسبوع بس خلينا نتعرفوا و نفهموا بعض و بعدها ساهل "
انوار : ضحكت ضحكة استهزاء و بعتتله " طروح شباب "
رواد: وااااك شكلها مش ساهله البنت هذي و حتعبني واجد و باعتلها " قتلك اسبوع بس انا و نعرف فيه البنت يلي بنجي نخطبها لو تفاهمنا لا اكثر ... و لو تبي عطيني رقم امك ولا خوك نفتح الموضوع معاهم ونا عندي كلمتي "
انوار : بينها وبين نفسها
حييي قالك رقم خوي تي كان عندي خو الا مايجي يعطيك طريحه وين عايش هذا و باعتتله " باهي حاظر يا استاذ رواد لاكن خلي عندك علم استهتار المراهقين فكنا منه وكلام بعد س 11 مستحيل و من غدوا يبدا الاسبوع تصبح ع خير "
رواد: يقرا و يضحك من اسلوبها و باعتلها " يحظرلك الخير يا انوار عيوني "
"وانتي من اهلو "
انوار : قرت الرسالة وحطت تلفونها تحت مخدتها و هي فرحانه مش مصدقه انه قلبها نبض بعد الوقت هذا كله 💗
اما رواد ماشي و حاس انه داير انجاز لانه انوار خذت عقله بكلامها هذا و عرف انه عيارها ثقيل مش من البنات الرخيصات يلي توا ....
_____________
صقر: حط راسه ع لوساده في المربوعه ويفكر في هموم هل دنيا وقعد يتقلب ايمين يسار مش جايه نوم
دق دق دق
صقر: ادخل
إفطيمه: مزال واعي ياولدي
صقر: قعمز ماجاني نوم يام
إفطيمه : جت قعمزت جنبه الله غالب ياولدي حمل البيت كله جا فوقك
صقر: مسح ع جبهته .. الحمدلله يام
إفطيمه: حطت يدها ع كتفه ماتقلل ياولدي حتفرج من عند ربك
صقر: نشاءالله يام
إفطيمه : هي ياولدي حاول ترقد وكان تبي شي قولي
صقر؛ سلامتك يام وحتي انتي علاش واعيه للوقت هذا
إفطيمه: والله اختك ضرتني وشربتني طويسه شاهي ماخلتني نرقد
صقر؛ اهاا باهي حولي ترقدي حتي انتي
إفطيمه : ههه تعاير فيا ولا شنو
صقر؛ لاااا عيب يام
إفطيمه :ههه ارقد ارقد سلم اوليدي
صقر؛ نشاءالله
___________
انوار: رن منبها ع اذان الفجر ناضت توضت و صلت الفجر وخطر عليها رواد وقالت هي نصلي استخاره عليه و فعلا صلاتها بعدها فتحت تلفونها و بعتت رساله لامها عشان لما تنوض تلقاه و تطمن عليها و قعمزت ع المصحف تقرا
اما رواد ناض وكان اليوم الاولى له في الاسبوع يلي مخطط انه يخلي انوار تنعجب فيه و تكبد عليه
و في نفس الوقت يبي يتعرف عليها اكثر... فتح تلفونه و لقاها مزال الساعه 7 بدري يتصل بيها باعتلها " صباح الخير اليوم الاولي امتي حتحني علينا و نسمعوا صوتك "
سمعت انوار صوت الرسالة رفعت تلفونها و فتحاته قرتها وضحكت بس ماردتش عليه
سكرت المحصف و حطاته في الشنطه
اما صقر ناض و هو راسه يوجع فيه دخل للحمام (يكرم القارئ) وطلع صلى و و رفع تلفونه خش لقى امه واعيه موتيه الفطور و مقعمزة ع سفرة العالة
صقر: صباح الخير
إفطيمه: صباح النور ياولدي قعمز افطر
صقر: و قعمز يفطر و يهدرز مع امه بعدها فتح تلفونه لقي 4 مكالمات فائته من حبيبته " هدى"
استغرب .
إفطيمه: خيره وجهك انقلب هكي شن فيه
صقر؛ اشوي يام توا نجيك وطلع برا للسور عاود عليها مرة و اثنين ومافيش فايده يفصل وهي ماتردش بعدها انتبه انها باعته رسائل فتحهم وكان مكتوب فيهن
" صقر حبيبي صدقني نكتب في هل رسالة ونا نبكي انا صبرت معاك 3 سنوات ونا كلي امل انك تجي تطلبني و نكون خطيبتك وبعدها مرتك و حتي فكرت اني انكون ام اعيالك يلي اخترنا اساميهم مع بعض و كل هل سنوات رفضت اي شخص يتقدملي ع علمك بس خلاص يا صقر انا معاش قادره نصبر سامحني حبيبي بس السنوات يلي كنت فيهم معاك ضاعن من عمري و مزاال ايضيعن لانك لعند توا ماتفكرش غير في اهلك وانك تصرف عليهم نصيحه فكر انك تبني مستقبل وتكون عيلة قبل الوقت مايفوتك اما انا فاخترت اني نكون مع شخص ثاني سامحني حبيبي و شوف حياتك "
صقر: كان يقرا في كل سطر و يحس فيه كان سهم خش في قلبه يقرا وهو منصدم منها 💔
خش في عالم ثاني من الرساله 💔 و ماوعاش لعالمنا غير لما سمع صوت اخته
سارة: طلعت لصقر تجري .... ااااللللححححححققق ياصقر تسنيم
صقر: وهو منخلع نعم
سارة؛ وهي خايفه و دهشانه تسنيم يا صقر تسنيم بسرعه ماباتش تنوض
صقر؛ خش جوا للدار و هو مش فاهم شي لقى تسنيم مغمي عليها وكان طالع من فمها دم و امه بجنبها تبكي
صقر؛ بسرعه ياسارة استريها بعبايه و نا جاي ... وطلع صقر لحوش جاره يخبط بكل قوة
طلع عبدالرزاق هو مخلوع: نعم ياولدي شن فيه في هل صبح
صقر: وهو متعثلم .... نبي السيارة ياعمي اختي مريضة الحقني
عبدالرزاق : سلامتها ياولدي هي نجيب المفتاح و خش عمكم عبد الرزاق جاب المفتاح وجا مده لصقر
ولع صقر السيارة و خش طلع اخته
سارة: بنمشي معاك
صقر؛ تي خش اقعدي جوا مع امك
إفطيمه ؛ خليها ياولدي تمشي و عدي الحقي اختك ..... ومشي صقر بسرعه للمستشفي و دخلوها للطوارئ
صقر: منهار ومش قادر يشد روحي لدموع في عينه بس كان قانع نفسه انه راجل ومستحيل يبكي 👎💔
طلع الدكتور : الحالة صاير معاها تسمم ولازم غسيل شن واخذه او واكله
سارة : مش عارفه يادكتور هي امس طول الليل تبكي و تشكي من بطنها
الدكتور : لا حول الله وخلاص ومشى عنهم
صقر؛ شن واكله البنت يا سارة
سارة : امس يا صقر كنا عند هاجر ولا نسيت و هي قدمتلنا حاجات اول مرة نشوفوهن وتسنيم جربت من كل شي
صقر: انهد يبكي ومعاش قدر يشد دموعه حس انه كل جهده في انه يسعد عيلته ماكفى
اما سارة ماقدرتش تتحمل تشوف خوها يبكي ومشت عنه
___________
انوار : بعد كملت قرايه في المصحف و وقرت رساله رواد ناضت فتحت نافذه الحجره و ضمت سريرها وحاست فيها اشوي وطلعت بتكلم الممرضه عشان تغير الكيس تاع الفضلات " اكرمكم الله" لجدتها
طلعت انوار لقت في القسم ولد بس كان صبح تحشمت تجي تقوله غير الكيس لذالك نزلت ادور ع ممرضه و هي ماشيه شافت صقر كان منهار ويبكي قربت منه وهي متسأله خيره هذا شنو فيه !!
انوار : العفو خويا صاير معاك شي
صقر؛ نزل راسه ومسح دموعه لالا اختي مافيه شي
انوار : باهي نشاءالله لاباس و مشت عنه بس قلبها وجعها عليه ... ومشت كلمت ممرضه وجت راده من نفس الطريق عشان تشوف شن صار معاه و تشوف ...
الممرض : مدله وصفه لازززم توا تجيب الحاجات هذين للمريضة
صقر: شاف جيبه مالقاش شي طلع تلفونه ورن ع رواد بس رواد كان في عمله وماردش
انوار: قربت منه خويا محتاج مساعده !
صقر: لالا اختي صحيتي
انوار : انت !
صقر: شني !
انوار : انت نفسك يلي تخدم في محل الساعات ولا
صقر: زبطها وانتي متاع الساعه السوده ولا
انوار : زي ماقلت اخر مرة سبحان رب الصدف ... وتوا بعد طلعت تعرفني ونعرفك قولي خويا لو نقدر نساعدك مافيها احراج راه " هي كانت حاسه من وجهه وحركاته انه ناقصه شي "
صقر: لالا صحيتي ورن تلفونه لقاه رواد ... عن اذنك
و مشى ع جنب يكلم في رواد
صقر؛ قتلك يارواد والله متحشم منك بس تسنيم في المسشفي و وصوني ع كم دواء انجيبه ليها والحق ياصاحبي ماعنديش حقه بالهي عليك تعال وعارفك ماتقصر
رواد: حاظر ياصقر اني جاي مسافه الطريق بس
و مشى صقر بيشوف تسنيم شن وضعها
الممرض :- شن صار جبت الدواء
صقر: لالا خويا مزال بس توا اني طالع
الممرض : باهي استعجل خويا المريضه حالتها غير مستقره
صقر؛ حاظر هي
انوار : جاته وقفت قدامه وهي معصبه توا لما قتلك تبي شي رفضت و حتي الممرض قالك المريضة حالتها غير مستقره و فتحت شنطتها طلعت فلوس 50 دينار ... تفضل خويا جيب العلاج والله مافيها شي مش عيب راه
صقر: انحرج وحس بذل..... لالا صحيتي وصح انا طلع منغير فلوس بس توا رفيقي جاي في الطريق
انوار : اعتبره دين ولما ايجي رفيقك رده ليا بس توا اطلع مايصير تخليهم ايراجوا
صقر: خذاهم صحيتي بس خليك هنا لما نجي نردهم لك
انوار : حاظر .. وخلاته يطلع ورقت لحجرة جدتها لقت انها واصله
بسمه: وهي مش عاجبها وينك يا انوار كم ليا جايه نا وخالتك وما القيناك وين كنتي
انوار : نزلت نكلم في الممرضه تغير الكيش
بسمه : اي القيت الممرضه تغير فيه وانتي مهناش
انوار: الحق يام القيت عيله وضعهم صعب شكله عندهم مريضة وحالتهم تاعبه ماقدرتش نخليهم
بسمه: قولي هكي من البدايه
انوار : مش ديما تقوليلي دير الخير و انساه عشان الاجر مايضيع
بسمه: اي والله يابنتي ❤ نشاءالله غير عندك فلوس باهي
انوار؛ اي عطيتهم من فلوس يلي عطاهن ليا بويا
عزة: وينه يابنتي بوك نشاءالله خير
انوار : اي الحمدلله ياحني امس كلمته
بسمه: نزلت راسها
انوار؛ خليني توا نرن عليه ورنت عليه وقعدت تهدرز معاه ومن حديث لحديث
عماد: امتي بتروحوا يابنتي
انوار : مش عارفه الحق يا بويا توا نعطيك امي تسالها
عماد: ها !!! امك ؟
انوار: كلمت امها وحطتلها التلفون ع وذنها وردت قعمزت مع حنها و هي مبتسمه لانها ديما تحاول ترد امها وبوها لبعض❤
بسمه: انصدمت بحركه انوار بس مشتها و حكت مع عماد اشوي و سكرت
______________
صقر: مشى جاب المطلوب ورد ولقي رواد يراجي فيه
رواد : وينك ياصقر ليا كم جاي
صقر: لحظة يارواد بس وعدي عطي للممرض الدوا
رواد؛ مشى لحقه ... فهمني ياصقر شن صاير
صقر؛ اااه شن بنقول تسنيم متسممه و نا طالع منغير فلوس " هو مسكين ماعنداش اصلا 💔 "
رواد: اختي هيا اختك ياصقر فهمني شن ناقص وتوا نعدي نجيبه
صقر: الحق في بنت عطتني بس لقتلها دين عليا
رواد: وينها به ؟
صقر؛ مش عارف وين اختفت ... عارف اين بنت هذي
رواد: اين
صقر: نفسها يلي مرة هزباتك وجتني في المحل بعدها
رواد: حس بصدمه تكذب
صقر؛ قسما بالله ... وبعدها مسع صوت اختك ساره تكلم فيه ... اشوي ونجيك
رواد: قعد سارح لفترة معقولة كل الصدف هذين والله لو حد يحكين ليا نكذب يعني مرة اثنين باهي بس هذي مش عارف المرة الكم وراها شي البنت هذي يلي قاعد نتلاقي معاها وخلاص والله راسي لف معقولة حتي توا هي تطلع نفس البنت باالك صقر يخرط لا وياودي فعلا هذي نفس المستشفي يلي فيها هي لا حول الله وخلاص
....ومشى جنب صقر و سارة
رواد: صباح الخير سارة كيف حالك
سارة: وهي متحشمه........ صباح النور رواد ،حمدلله وانت
رواد: بخير ، لاباس عليها سومه خبريني لو احتجتي شي
سارة؛ ماتشوف باس .. سلامتك بس
رواد : سلمك
صقر :قتلك يارواد عدي شوفها انت البنت وهي عطتني 50 ردهم ليها وتوا نردهم لك غدوا
رواد: مايهمك شي و لو احتجت شي كلمني
صقر؛ نشاءالله
و مشى رواد يدور ع انوار في مستشفي الصدف هذا
سارة : تشوف لرواد كيف يمشي وقلبها ينبض و مشاعرها متبعثره
رواد ساعه وهو يدور فيها مالقاها اتصل بيها
_________
بسمه: كملت من عماد وخشت جوا حذفت لانوار تلفونها حذف ... حركاتك البايخه ماتبطلي عنهم😒
انور و عزة : ضحكن ع الخفيف
و كملن هدرزتهن و بسمه جايبه الفطور فطرو مع بعض و ضموا الحوسه و خش الدكتور شاف عزة و وضعها و طمنهم عنها
و بعد دقايق رن تلفون انوار
انوار؛ شافت امها تحكي مع الدكتور سيبتها و طلعت ردت ... الو
رواد: ايوه كيف حالك
انوار؛ حمدلله بس محددتش الوقت انا كيف ترن
رواد: صار شفتي الرسالة ليش مارديتي
انوار؛ انحرجت 😅... ماكنتش فاضية باهي توا تبينا نتعرفوا من صبح الله ولا شنو
رواد؛ لالا نبيك في موضوع انتي وين توا
انوار : ضروري هل موضوع لين تتصل توا قاعده في المستشفي شن فيه نشاءالله خير ؟
رواد: ليا ساعه ندور فيك انزلي و تلقيني قدام حمامات النساء " حشاك " في الدور الالي
انوار: رفعت حاجبها لالا اسفة نقدرش
رواد: تجي ولا نجي لعندك
انوار : شافت لامها باهي باه اني جايه
رواد: نراجي فيك.
انوار: يام نازله اشوي نبي الممرضه زهره
الدكتور : قصدك هذي امك
انوار : ايه
الدكتور : والله تبان صغيره نحسابكم غير خوات
بسمه: ضحكت و انحرجت باهي يابنتي انزلي واصلا بتجي خالتك سوسن و حمزة بعد اشوي تبينا نطلعوا معاها
انوار : تمام يام هي عن اذنكم و نزلت وهي تقول : تعالي في موضوع اين موضوع يلي توا في هل صبح ولا قدام الحمامات استغفر الله وخلاص ع شنو ناوي الولد هذا بس نعرف كيف نحطله حد
و اول ماوصلت شافت رواد كان لابس لبسه رسمية جاكة و بنطلون لونهم ازرق كل عصبيتها تحولت لحنيه وقت شافاته قربت منه و هي ترعش خايفه
رواد
رواد: رفع راسه و .... يتبع
صدف عجيبه والله انا بروحي نكتب و متعجبه للجو 😁✨ رأيكم في الحلقة و توقعاتكم لوين بيوصل الثلاثي هذا ؟
