روايه
#نورتي_عتمتي
حلقة 4
بقلم "رواسي بحرالدين "
انوار: خطرها اليوم مارنش عليها بوها غريبه وناضت حولت تلفونها من الشحن ورنت عليه .. و طلعت للمطبخ القت فيه شيماء و هي ماتحبش تتكلم بجنب حد لذالك طلعت للسور
عماد؛ ايوه انوار
انوار؛ اهلين بويا شن حالك
عماد:حمدلله بخير و نعمة و شن احوالك انتي
انوار : نقولوا باهي حمدلله ع كل حال .. غريبه اليوم مارنيتش عليا قبل لما انا مانرن انت ترن عليا
و ماتحسش انوار غير بيد تاخذ التلفون من ع وذنها
انوار: تتلفت وراها
حمزة: شكله متعصب وارفع حاجبه في يده التلفون فتح لسبيكر
انوار؛ طبقت يديها وهي تشوفله بغضب
عماد: والله يابنتي شغل في شغل وانتي عارفه
حمزة: استغربت من كلمه بنتي ، بصوت هافت من هذا
انوار:خذت التلفون .. اها باهي ربي يعاون بابا
عماد : سلمك يابنتي تبي شي ؟
انوار؛ سلامتك بس تصبح ع خير
عماد:تلاقي الخير و فصل الخط
انوار؛ من تكون انت ؟؟ ماتتحشمش ع وجهك تاخذ التلفون من وذني ولا شنو
حمزة: الساعه 10:40 ليل ووتكلمي بدلع في السور مانحسابش بوك
انوار: وحتي لو ماكانش بويا انت شن دخلك ولي امري ونا مش عارفه ولا شنو
حمزة؛ انا راجل في هذا البيت مش طرطور احترمي نفسك و اعرفي شن يطلع لسانك
انوار: وحتي لو نحن قاعدين في حوشكم الشي هذا مايخليك تفرض رايك عليا فاهم 😏 و مشت خشت للحوش لقت امها بتطلع ... لوين يام ؟
بسمه: يا انوار نحساب خالك بيجي اليوم بس ماصارش لطلعله موضوع وحيقعد يومين مزال غادي ولذالك ماشيه نقعد عند حنك لازم مرافق معاها مرات تحتاج شي
انوار؛ عليك همي يارب ... انتي صحتك ماتسمحش يام اقعدي انا يلي حنمشي
بسمه؛لا يابنتي مانقدر نخليك بروحك غادي
انوار: مش قلتي عادي تخليني غير خالي حيديرلك دوشه خلاص خالي مش حيجيب علم انا نمشي لحني وانتي خليك هنا
بسمه: بس ..
انوار؛ لا بس لا شي ماتقوليش اعذار وماتخافيش عليا من غرفه حني مش حنطلع و الليل نسكرها علينا وانتي عارفه نومي خفيف نقعد معاها اليومين هذين وبعد ايجي خالي لا من نسمع لا من شاغ
بسمه: باهي باهي غير استعجلي خلي خالتك سوسن تقلك غادي
انوار؛ هي وخذيت شنطة صغيره حطت فيها شحنها وكم حاجة تحتاجها و ملابس و بعد دقايق ..... طلعت انوار و بسمه و سوسن للمستشفي بس شالهن حمزة
و طول الطريق حمزة يشوف لانوار من لمرايا و مركز عليها
انوار و بسمه نزلن للمستشفي خشت بسمه سلمت ع امها وشافت وضعها
بسمه: خلاص يابنتي بالهي هنيني وماتخليني نندم انك خليتك تجي
انوار؛ ولا يهمك يام كوني هانيه وماتنسي خوذي دواك
بسمه؛ نشاءالله .. تصبحوا ع خير
انوار؛ وانتي من اهلو💛
و طلعت بسمه..
_______________
رواد: مقعمز ع الصالون يدخن و يخمم
ريهام" اخته" : تفكر في حبيبة القلب مال
رواد: ااااه اين حبيبة قلب 💔
ريهام : واضح انك تفكر في شي قولي مش عشقان ؟
رواد: اااه عشقان بس ، لو في شي بعد العشق انا فيه
ريهام؛ اوووااووووه لازم نتعرف عليها يلي تحكي عنها هكي
رواد: تي انا مش عارف غير اسمها
ريهام: تبصر ! كيف هكي ؟
رواد: خليني ساكت بالله
ريهام: تي ادوي
رواد: شفتها في الشارع اول مرة في المقهي و بعدها شفتها كم مرة في المستشفي امها مريضة ماقدرتش نعرف عنها شي غير اسمها
ريهام: وشن اسمها
رواد : انوار✨ ااااه يا انوار و خلاص
ريهام: باه هي معاش جت للمستشفي
رواد: كيف
ريهام: مش قلت امها مريضة
رواد: ايه
ريهام: خلاص عدي للمستشفي مرات تلقاها صارحها وخوذ رقمها
رواد: زعمك !
ريهام: تي مش عاجبتك البنت
رواد: طفي الدخان مش غير عاجبتني
ريهام: خلاص غدوا عدي و استفسر عنها احسن ماتضيعي من بين يديك
رواد: انا ماقدرتش نمشي كنت خايف نسببلها شبهه او مشاكل لاكن فعلا مرات معاش نشوفها توا حنمشي مش حنراجي لبكرا وخذا جاكته و طلع ...
__________
في السيارة:-
حمزة؛ كيف تخليها ياخالتي تقعد بروحها
سوسن: هي في السمشتفي يا حمزة عادي مش في الشارع
حمزة: بس بنت صغيره بدون محرم صعبه اشوي
بسمه: انوار تهني ياولدي ماعليها خوف ونا فعلا صحتي معاش تلايم لذالك الاحسن انوار تقعد مع حناها
حمزة: اممم باهي ربي يشفيها نشاءالله
بسمه: نشاءالله
____________
انوار؛ قعمزت بجنب حناها وقعدت تهدرز معاها وطلعت ترمس فيه شاهي اخضر وصبت منه ليها ولحناها
عزة : بالك يسهرني يابنتي
انوار؛ لالا درته خفيف ياحني زي مانشربوا فيه قبل
عزة: والله ليا كم عليه باهي يلي فكرتي وجبتيه
انوار؛ عارفته غالي عليك زي مانحبه انا ... و قعمزت تشرب و تهدرز مع حناها و الوضع عادي جدا
____________
رواد: نزل للمستشفي ومشي للحجره يلي مرة رقدت فيها ام انوار و مالقاهاش وقعد يبرم ايمين و يسار ومالقى اي اثر لانوار و هو نازل لما فقد الامل انه يشوفها شاف الممرضه نفسها يلي خذا منها الوصفه ومشى لعندها
رواد: معليش
الممرضة: تفضل
رواد: نبيك ع انفراد اشوي
الممرضة: شافت للبنات يلي معاها باستغراب ومشت معاه
رواد: تذكرتيني !
الممرضة: لا والله شايفتك من قبل
رواد: امس خذيت منك الوصفه كانت في مرا مريضة ومعاها بنتها قتلك انا قريبهم
الممرضة: بااه
رواد: البنت اسمها انوار
الممرضة: اه قصدك ع المدام بسمه
رواد: مش عارف اسم امها
الممرضة : مش قلتلي انك قريبهم
رواد؛ حط يده ع كتفها كذبت عليك سامحيني بس توا محتاح مساعدتك
الممرضة: تلبكت تفضل
رواد: الحق انا عاجبتني هلبا البنت ونبي نوصللها باي طريقه ساعديني ومش حننسى معروفك هي مزال تجي عنها ولا تعرفي اي معلومه عليها
الممرضة؛ ايه مزال تجي بس كيف نساعدك
رواد: نكتبلك رقمي حاولي تجيبلي رقمها ولا لو عارفه اسم عيلتها عطيه ليا
الممرضة : هي من الجنوب راه مش من هنا و طلعت تلفونها اكتبلي رقمك نحاول نحكي معاها بس لازم تعرف بالموضوع هي ولو تبي حترن عليك
رواد؛ تمام غير خبريني شن يصير و خذا تلفونها كتب رقمه .. صحيتي اختي هلبا
الممرضة : العفو عن اذنك
رواد : تصبحي ع خير
الممرضة: تلاقي الخير... و رقت الممرضة فوق لحجرة انوار
دق دق
انوار؛ كانت راده الباب و مقعمزه تقرا في كتاب .. تفضل
الممرضة: انوار
انوار؛ زهره تفضلي
زهره"الممرضة": كيف حالك اليوم
انوار؛حمدلله شن اخبارك انتي
زهرة: وعمتي بسمه شن اخبارها واخبار صحتها
انوار : حمدلله
زهره: في شي جايه بنخبرك بيه
انوار: حطت لكتاب من يديها ونزلت النظارات من عيونها .. حني بخير !
زهره: لالا مش شور حنك وصحتها حمدلله
انوار: باهي ع شنو !
زهره: في شاب لما داخت امك هذا من الروشيته و كان واقف قدام الحجره
انوار : خطر ع بالها رواد .. خيره !!
زهره: قبل اشوي كان هنا و الباين عاجبته ومش عارف كيف يوصل فيك
انوار: شن قالك بالضبط ؟
زهره: عطاني رقمه و حكالي يبي اي معلومه عندك انا قتله هي مزال تجي لانه فعلا عندها مريضة هنا بس ماخبرته اي شي عنك حتي ماخبرته اني تعرفت عليك
انوار: وشن يعرف عني هو
زهره: يعرف اسمك وعارف انه امك مرضت هنا بس حتي انه مش عارف انك من الجنوب
انوار : تمام
زهره؛ والراي
انوار : مش عارفه الحق نا مانعرفاش من يكون هو ريته بالصدف كم مرة بس
زهره: كان تسمعي مني خوذي رقمه وكلميه شوفيه شكله كبد عليك الولد
انوار : لا يازهره راه المواضيع هذين ماعنديش فيهن فكيني
زهره: براحتك بس والله الولد خش خاطري وباين عليه معجب فيك
انوار: امتي حله يعجب فيا هن مرتين ولا 3 بس شافني
زهره: لو اعجب فيه ماجا في هل ليل يدور عليك و ساعه وهو يوصي فيا عليك نجيبله اي معلومه
انوار: وكان ضحك عليا ؟؟ شباب توا يضحكوا ضحك واصلا العلاقات حرام فكيني
زهره: باه نقولك كلميه وتعرفي عليه و خليه يتعرف عليك بعدها قوليله انا مش للعلاقات يا تعال اخطب طول يا تشاو
انوار: لالا فكيني
زهره: باهي براحتك غير عندك قلم
انوار : اها راجي وفتحت شنطتها و طلعت منها قلم
زهره: خذت لكتاب يلي ع السرير يلي كانت تقرا فيه انوار فتحاته و فتحت تلفونها كتبت رقم رواد
انوار : شن تكتبي !!
زهره: هذا رقمه انتي حره يلي عليا درته " طلعت مش ساهله هذي زهره😁"
انوار : باهي صحيتي
زهره: مادرت شي هي تصبحي ع خير
انوار : وانتي من اهلو
و فتحت انوار كتابها وهي تخمم ترن عليه ولا معقولة عمرها هذا كله وهي مبعده عن سريب العلاقات و الحب و ملتزمه قدر الامكان ايجي يوم و ترن ع شخص ماتعرف غير شكله
و قعدت اتفكر و تخمم لعند رفعت تلفونها ورنت عليه
رواد: شاف رقم غريب ابتسم وكانه حاس انها انوار الوو
انوار: ... يتبع
اليوم ماذكرناش صقر بكل ركزتوا ؟ و شن القصة يلي حتصير بين انوار و ورواد ؟
ملاحظة : عارفه طولها مش زي قبل وهذي اقصر لانه التفاعل بجد مش عاجبني يعني الكاتب يشجع وقت يشوف تفاعل ع الروايه و يلقى كلمة طيبه او راي مكتوب في التعليقات تقديرا لجهده لا اكثر نبي نشوف كم شخص يقرا في الروايه و هي مزال في بدايتها الحلقات القادمه اقوى وغير متوقعه بإذن الله ❤
